ماۋلەن اشىمباەۆ الەۋمەتتىك كاسىپكەرلەرمەن كەزدەستى. كەزدەسۋ بارىسىندا سەنات توراعاسى بۇل سالانىڭ شاعىن جانە ورتا بيزنەستى وركەندەتۋ, حالىقتى جۇمىسپەن قامتۋ, الەۋمەتتىك ماسەلەلەردى شەشۋ جانە مۇمكىندىگى شەكتەۋلى ازاماتتارعا قولداۋ كورسەتۋ ءۇشىن ماڭىزى زور ەكەنىن ايتتى. سونداي-اق, ماۋلەن اشىمباەۆ الداعى ۋاقىتتا الەۋمەتتىك كاسىپكەرلىكتى دامىتۋعا مەملەكەت تاراپىنان ناقتى قولداۋ كورسەتۋ كوزدەلىپ وتىرعانىنا نازار اۋداردى.
«مەملەكەت باسشىسى وسى ماسەلەگە باسا ءمان بەرىپ وتىر. پرەزيدەنتىمىز ناقتى تاپسىرمالار دا بەردى. سوندىقتان الداعى ۋاقىتتا مەملەكەتتىك ورگاندار تاراپىنان الەۋمەتتىك كاسىپكەرلىككە جۇيەلى قولداۋ كورسەتىلۋ كەرەك. بۇل رەتتە ەرەكشە قاجەتتىلىگى بار ادامدار مەن الەۋمەتتىك وسال توپتاردىڭ كاسىپكەرلىكپەن اينالىسۋىنا جانە جۇمىسقا ورنالاسۋىنا مۇمكىندىكتى ارتتىرۋعا ەرەكشە كوڭىل ءبولۋ قاجەت. وسى باعىتتاعى نەگىزگى قادامداردىڭ ءبىرى – الەۋمەتتىك كاسىپكەرلىكتىڭ قىزمەتىن رەتتەيتىن جانە مەملەكەت تاراپىنان قولداۋ كورسەتۋدىڭ ءتيىمدى تەتىكتەرىن انىقتايتىن زاڭ قابىلداۋ», – دەدى سەنات توراعاسى.
سونىمەن قاتار ماۋلەن اشىمباەۆ قازىرگى تاڭدا الەۋمەتتىك كاسىپكەرلىك كوپتەگەن ەلدە كەڭ تاراعانىن تىلگە تيەك ەتتى. اقش, ۇلىبريتانيا, كانادا, گەرمانيا سياقتى ەلدەردە جالپى ىشكى ءونىمنىڭ 3-تەن 5 پايىزعا دەيىنگى كولەمىن الەۋمەتتىك كاسىپكەرلىك قامتاماسىز ەتەدى.
«بۇل زاڭ جوباسىن ءبارىمىز بىرلەسىپ دايىنداۋىمىز كەرەك. بۇگىنگى وتىرىستى وسى باعىتتاعى اۋقىمدى جۇمىستىڭ باسى دەپ قابىلدايمىز. جالپى الەۋمەتتىك كاسىپكەرلىكتىڭ نەگىزگى مىندەتتەرىنىڭ ءبىرى – ەرەكشە قاجەتتىلىگى بار ادامداردى ورتاعا بەيىمدەۋ جانە ولاردىڭ الەۋمەتتىك, ەكونوميكالىق بەلسەندىلىگىن ارتتىرۋ. قازىرگى تاڭدا ەلىمىزدە الەۋمەتتىك باعىتتاعى جوبالاردى ءساتتى ىسكە اسىرىپ جۇرگەن كاسىپكەرلەر دە بار. زاڭ جوباسىن دايىنداۋ كەزىندە ولاردىڭ پىكىرى مەن ۇسىنىستارى مىندەتتى تۇردە ەسكەرىلۋگە ءتيىس», – دەدى ماۋلەن اشىمباەۆ.
سونداي-اق, سەنات توراعاسى قازاقستاندا الەۋمەتتىك كاسىپورىنداردىڭ قارىم- قاتىناسىن رەتتەيتىن زاڭنامالىق بازانىڭ جوقتىعىن جانە مەملەكەتتىك قۇرىلىمدار مەن الەۋمەتتىك كاسىپكەرلىك اراسىنداعى ءوزارا ءىس-قيمىلدىڭ قاجەتتى دەڭگەيدە ەمەس ەكەنىن اتاپ ءوتتى.
ماۋلەن اشىمباەۆ سەنات جانىنان الەۋمەتتىك كاسىپكەرلىكتى قولداۋ جانە دامىتۋ ماسەلەلەرى بويىنشا زاڭ جوباسىن ازىرلەيتىن جۇمىس توبى قۇرىلاتىنىن ايتتى. بۇل جۇمىس ماجىلىسپەن بىرلەسىپ ىسكە اسىرىلادى.
كەزدەسۋگە قاتىسقان الەۋمەتتىك كاسىپكەرلەر بىرقاتار ناقتى ۇسىنىستارىن جەتكىزىپ, سالانى دامىتۋعا قاتىستى ءوز ويلارىمەن ءبولىستى. ودان بولەك, ءىس-شاراعا ۇلتتىق ەكونوميكا ءمينيسترى رۋسلان دالەنوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جانە ءماجىلىس دەپۋتاتتارى قاتىستى.