مينيستر سەنات دەپۋتاتتارىنا الەۋمەتتىك كاسىپكەرلىكتى دامىتۋ جايىن باياندادى

ءوز ءسوزىنىڭ باسىندا, ءبىرجان نۇرىمبەتوۆ, بۇگىنگى تاڭدا الەمنىڭ 18 ەلىندە عانا الەۋمەتتىك كاسىپكەرلەر قىزمەتىن رەتتەيتىن جەكەلەگەن زاڭدار قابىلدانعانىن جەتكىزدى. 20-عا جۋىق ەل قولدانىستاعى زاڭناماعا وزگەرىس ەنگىزۋدى ءجون كوردى.

«قازاقستاندا الەۋمەتتىك كاسىپكەرلىك جەكە نورماتيۆتىك تۇرعىدا بەكىتىلمەگەن. جالپى كاسىپكەرلىكتى دامىتۋعا باسىمدىق بەرىلگەن. بۇعان قاراماستان, ەڭبەك جانە حالىقتى الەۋمەتتىك قورعاۋ مينيسترلىگى ء(ارى قاراي - ەحاقم) باسقا ۆەدومستۆولارمەن جانە حالىقارالىق ۇيىمدارمەن سەرىكتەستىكتە, حالىقتىڭ الەۋمەتتىك وسال توپتارىن كاسىپكەرلىك قىزمەتكە تارتۋ بويىنشا 5 باعىت اياسىندا جۇيەلى جۇمىس جۇرگىزۋدە», - دەدى مينيستر.

ءبىرىنشى باعىت «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ مەملەكەتتىك باعدارلاماسى ارقىلى قولداۋ بولىپ, ونىڭ شەڭبەرىندە از قامتىلعان وتباسىلار مەن كوپبالالى وتباسىلاردىڭ مۇشەلەرى, جۇمىسسىزدار, مۇگەدەكتىگى بار تۇلعالار جانە تاعى باسقا تاراپتار كاسىپكەرلىك قىزمەتكە بەلسەندى تارتىلۋدا. باعدارلاما 2017 جىلدان باستاپ جۇزەگە اسىرىلۋدا. وسى ۋاقىت ىشىندە 2 ميلليونعا جۋىق ادام جۇمىسپەن قامتۋعا جاردەمدەسۋ شارالارىمەن قامتىلدى.

«بيىلدىڭ وزىندە 769 كوپبالالى جانە از قامتىلعان وتباسىعا جالپى سوماسى 2,8 ميلليارد تەڭگەنى قۇرايتىن جەڭىلدەتىلگەن شاعىن نەسيە بەرىلدى. سونىمەن قاتار, از قامتىلعان جانە كوپبالالى وتباسىلاردان شىققان 9 مىڭنان استام ادام مەملەكەتتىك گرانت الدى, 10 مىڭعا جۋىق مۇگەدەكتىگى بار ادام جۇمىسپەن قامتىلدى», - دەدى ءبىرجان نۇرىمبەتوۆ.

ەكىنشى باعىت ايەلدەر اراسىندا كاسىپكەرلىكتى دامىتۋدى كوزدەيدى. وسى ماقساتتا ەحاقم «بۇۇ-ايەلدەر» بەيىندى اگەنتتىگىمەن بىرلەسىپ, ولاردىڭ ەكونوميكالىق مۇمكىندىكتەرىن كەڭەيتۋ جوباسىن جۇزەگە اسىرۋدا.

مەملەكەت باسشىسىنىڭ تاپسىرماسى بويىنشا بۇكىل رەسپۋبليكا بويىنشا نۇر-سۇلتانداعى «جانۇيا» وتباسى ينستيتۋتىن قولداۋ ورتالىعى مەن الماتىداعى «باقىتتى وتباسى» ورتالىقتارى تاجىريبەسى تاراۋدا.

«بۇگىندە ەلىمىزدە 31 ورتالىق, ونىڭ ىشىندە 19-ى مەملەكەتتىك الەۋمەتتىك تاپسىرىس ارقىلى اشىلدى. بۇل ورتالىقتاردا 225 ادام جۇمىس ىستەيدى جانە ونىڭ 31-ءى بەلسەندىلەر قاتارىنان جانە كوپبالالى انالار مەن مۇقتاج انالار. وسى ۋاقىتقا دەيىن ورتالىقتاردا 170 مىڭنان استام ادام قىزمەت الدى. ورتالىقتار تەك جۇمىسقا ورنالاستىرۋعا عانا ەمەس, ايەلدەر كاسىپكەرلىگىنە باسىمدىق بەرەدى», - دەپ تولىقتىردى ەحاقم باسشىسى.

قازىرگى ۋاقىتتا نۇر-سۇلتاندا از قامتىلعان ايەلدەر مەن مۇمكىندىگى شەكتەۋلى بالالاردى تاربيەلەپ وتىرعان انالارعا ارنالعان 8 ورتالىق اشىلدى. ولارداعى جۇمىس شاعىن بيزنەس-ينكۋباتورلار سيپاتىنا نەگىزدەلگەن. ءتيىستى ورتالىقتاردا 100-دەن استام كوپبالالى جانە از قامتىلعان انا ءوز بيزنەسىن باستادى.

ءۇشىنشى باعىت - ارنايى الەۋمەتتىك قىزمەتتەر كورسەتەتىن ءارتۇرلى جەكە مەديتسينالىق-الەۋمەتتىك مەكەمەلەردىڭ, داعدارىس ورتالىقتارىنىڭ جۇمىسىن جاقسارتۋ.

قازىرگى كەزدە قازاقستاندا ارنايى الەۋمەتتىك قىزمەتتەردى ۇسىناتىن 931 ۇيىم بار, ونىڭ ىشىندە 180-گە جۋىق مەملەكەتتىك ەمەس ۇيىم ءوز قىزمەتىن مەملەكەتتىك الەۋمەتتىك تاپسىرىستى ورنالاستىرۋ ارقىلى دا جۇزەگە اسىرىپ كەلەدى.

ءتورتىنشى باعىت - الەۋمەتتىك كاسىپكەرلىكتى تۇراقتى نەگىزدە كوتەرمەلەۋ جانە تانىمال ەتۋ.

2013 جىلدان باستاپ, ەحاقم, قوعامدىق باستامالاردى قولداۋعا جانە الەۋمەتتىك كاسىپكەرلىكتى دامىتۋ ءۇشىن جاعداي جاساۋعا باعىتتالعان «قازاقستاننىڭ ۇزدىك الەۋمەتتىك جوبالارى» رەسپۋبليكالىق كورمەسىن وتكىزىپ كەلەدى. 7 جىل ىشىندە بايقاۋعا 1192 جوبا قاتىستى, ونىڭ ىشىندە 171 الەۋمەتتىك جوبا ءتۇرلى اتالىمدار بويىنشا جەڭىمپاز دەپ تانىلدى.

بەسىنشى باعىت مۇگەدەكتىگى بار كاسىپكەرلەردى, مۇگەدەكتىگى بار ازاماتتاردى جۇمىسپەن قامتىعان, سونداي-اق مۇگەدەكتەرگە ارنالعان تاۋارلار, جۇمىستار مەن قىزمەتتەر وندىرەتىن كاسىپورىنداردى قامتيتىن «Scaleup» بيزنەستى قارجىلاي ەمەس قولداۋ باعدارلاماسىن ىسكە اسىرۋدى كوزدەيدى.

«دامۋ» كاسىپكەرلىكتى دامىتۋ قورى» اق-مەن بىرلەسىپ تاڭداعان تىزىمگە 76 ۇيىم كىرەدى. وسى كومپانيالارمەن بىرگە دامۋ مەن قىزمەت اۋقىمىن كەڭەيتۋدىڭ جول كارتالارى ازىرلەندى.           

ءوز ءسوزىنىڭ سوڭىندا, ءبىرجان نۇرىمبەتوۆ, ەحاقم مۇگەدەكتىگى بار تۇلعالارعا ارنالعان زاڭناماعا تۇزەتۋلەر لەگىن ازىرلەگەنىن ايتتى. ولاردىڭ ءبىرى وسى ساناتتاعى ازاماتتارعا ارنالعان جۇمىس ورىندارى كۆوتاسىن ىسكە اسىرۋدى ىنتالاندىرۋعا باعىتتالعان. وسىلايشا, بالامالى نۇسقا – توقسانىنا 1 ەڭ تومەنگى جالاقى مولشەرىندە نەمەسە 42,5 مىڭ تەڭگە وتەماقى جارناسىن ەنگىزۋ جوسپارلانۋدا. بۇل شارا مۇگەدەكتىگى بار تۇلعالاردى الەۋمەتتىك جاۋاپتى كاسىپورىندار اراسىندا جۇمىسقا ورنالاستىرۋعا باعىتتالادى.

سونداي-اق, مۇگەدەكتىگى بار ادامداردى جۇمىسقا ورنالاستىراتىن جەكە HR-اگەنتتىكتەردىڭ قىزمەتىنە تولەنەتىن اقىنى ۇلعايتۋ جوسپارلانىپ وتىر.