بۇگىندە حالىقارالىق رەيستەرمەن كەلگەن 150 جولاۋشى "رامادا پلازا" قوناق ۇيىندەگى كارانتين ستاتسيونارىنا وقشاۋلاۋعا الىندى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
5-نەن 6 قازانعا قاراعان ءتۇنى ەلورداعا شەتەلدەن 4 رەيس كەلدى. ەكى ۇشاق بىرىككەن اراب امىرلىگىنەن, قالعانى تۇركيا رەسپۋبليكاسىنان. قالاعا بارلىعى 483 ادام شەتەلدەن ۇشىپ كەلدى, ونىڭ 333-ءى COVID-19 تەستىنەن وتكەنى تۋرالى كۋالىكپەن كەلدى. قالعان 170 ادام انىقتاماسىز اۋەجايدان اۋرۋحاناعا جەتكىزىلدى. وندا ادامدار پتر ارقىلى زەرتحانالىق زەرتتەۋلەردەن ءوتتى. ولاردىڭ دەنساۋلىق جاعدايى قاناعاتتانارلىق.
"مۇنداي شارالار ءبىرىنشى رەت وتكىزىلىپ وتىرعان جوق. كوكتەمدە ءبىز شەتەلدەن كەلەتىن جولاۋشىلاردى كارانتين ستاتسيونارلارىنا ورنالاستىرىپ, ساراپتاما جۇرگىزدىك. سوندىقتان, بۇل باعىتتا ەلوردانىڭ دەنساۋلىق ساقتاۋ سالاسى تولىق دايىن. جالپى, حالىقارالىق رەيستەر جولاۋشىلارىنا 800 توسەك-ورىن ۇيىمداستىرۋعا دايىنبىز", دەيدى دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا.
قازاقستان رەسپۋبليكاسى باس مەملەكەتتىك سانيتارلىق دارىگەرىنىڭ 2020 جىلعى 5 قازانداعى جارلىعىنا سايكەس, دەنە تەمپەراتۋراسى جوعارى ادامدار, انىقتامانىڭ بولۋىنا قاراماستان, ينفەكتسيالىق ستاتسيوناردا وقشاۋلاۋعا جاتادى.
COVID-19 زەرتحانالىق زەرتتەۋلەرىنىڭ ناتيجەلەرىن العاننان كەيىن وڭ ناتيجەسى بار ادامدار جۇقپالى اۋرۋلار اۋرۋحاناسىنا اۋىستىرىلادى, تەرىس ناتيجەسى بارلارعا COVID-19 بەلگىلەرى تۋرالى تۇسىندىرمە جۇرگىزىلىپ, ۇيگە جىبەرىلەدى.