ىشكى ىستەر ءمينيسترى ەرلان تۇرعىمباەۆ اقمولا وبلىسى تسەلينوگراد اۋدانى رودينا اۋىلىندا بولىپ, اۋدان اكىمى باقىتبەك وسپانبەكوۆ, اۋىلدىق وكرۋگ اكىمى تالعات مۇقىشەۆ جانە “رودينا” اگروفيرماسى” جشس-نىڭ ديرەكتورى يۆان ساۋەرمەن كەزدەستى, دەپ حابارلايدى Egemen.kz Polisia.kz سايتىنا سىلتەمە جاساپ.
ول ءوز سوزىندە اقمولا وبلىسىنداعى رودينا اۋىلى كەزدەسۋ ورنى رەتىندە كەزدەيسوق تاڭدالماعانىن اتاپ ءوتتى. ە.تۇرعىمباەۆ مەملەكەت باسشىسى قازاقستان حالقىنا ارناعان جولداۋىندا جەرگىلىكتى پوليتسيا قىزمەتىنە “جۇرتقا جاقىن پوليتسيا” قاعيداسى بويىنشا تۇتاستاي رەفورما جۇرگىزۋگە باسا نازار اۋدارعانىنا توقتالدى.
وسى رەفورمانى ىسكە اسىرۋدا قۇقىق بۇزۋشلىقتىڭ الدىن الۋداعى نەگىزگى بۋىن سانالاتىن ۋچاسكەلىك ينسپەكتورلاردىڭ قىزمەتىن جەتىلدىرۋگە باسا ءمان بەرىلەدى. مينيستر كەزدەسۋ بارىسىندا جەرگىلىكتى اتقارۋشى ورگانداردىڭ باسشىلارىنا جانە بەلگىلى كاسىپكەرگە قۇقىقتىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋگە قوسقان ۇلەسى ءۇشىن العىس ءبىلدىردى. ولاردىڭ قولداۋى مەن كومەگىنىڭ ارقاسىندا وكرۋگ اۋماعىندا جىل باسىنان بەرى بىردە-ءبىر قىلمىس تىركەلمەگەن.
“سىزدەردىڭ ارقالارىڭىزدا ۋچاسكەلىك ينسپەكتوردىڭ جۇمىس جاساۋىنا بارلىق جاعداي جاسالدى. قىزمەتتىك تۇرعىن ۇيمەن قامتىلىپ, قازىر ول وتباسىمەن تۇرىپ جاتىر. ارنايى قىزمەتتىك اۆتوكولىكپەن قامتىلدى. ەڭ باستىسى – ۋچاسكەلىك پوليتسيا پۋنكتىنە ارنايى عيمارات ءبولىنىپ, وعان اۋىل بويىنشا ورناتىلعان 145 بەينەكامەرا ورتالىقتاندىرىلدى”, – دەدى ۆەدومستۆو باسشىسى.
مينيستر بۇل ساپارىندا №33 بالالار مەن جاسوسپىرىمدەر سپورت مەكتەبىنىڭ باسشىلىعى جانە مۇعالىمدەرىمەن, سونداي-اق ۋچاسكەلىك ينسپەكتورعا اۋىلدا قۇقىقتىق ءتارتىپتى قامتاماسىز ەتۋگە كومەكتەسىپ جۇرگەن ەرىكتىلەرمەن كەزدەستى.
ول ەرىكتىلەرگە قوعامدىق ءتارتىپتى ساقتاۋعا بەلسەندى قاتىسىپ, ىشكى ىستەر ورگاندارىنا كورسەتكەن قولداۋى ءۇشىن ريزاشىلىعىن جەتكىزدى. قۇقىق بۇزۋشىلىقتىڭ الدىن الۋ ماسەلەسى بويىنشا مەكتەپتىڭ قوعامدىق ومىرىنە بەلسەندى ارالاسقاندارى ءۇشىن بىرقاتار وقۋشىلار ءىىم العىس حاتتارمەن ماراپاتتالدى.
بەلسەندى ازاماتتىق پوزيتسياسى جانە ىشكى ىستەر ورگاندارىنا كورسەتكەن كومەگى ءۇشىن مينيستر “رودينا” اگروفيرماسى” جشس-نىڭ ديرەكتورى يۆان ساۋەردى ۆەدومستۆالىق «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ماراپاتتادى. “سىزدەردىڭ وسىنداي وڭ تاجىريبەلەرىڭىزدى ءبىز ءاربىر اكىمنىڭ نازارىنا جەتكىزىپ, سولاردىڭ كومەگىمەن بۇكىل ەلىمىزگە ەنگىزەتىن بولامىز”, – دەدى ەرلان تۇرعىمباەۆ.