كەربۇلاق اۋدانىنىڭ كوكسۋ اۋىلدىق وكرۋگىنە قاراستى قوساعاش اۋىلىندا 80 ورىندىق مەكتەپ اشىلدى.
ءبىلىم ورداسىنىڭ قۇرىلىسى 2019 جىلدىڭ ءساۋىر ايىندا باستالعان بولاتىن. مەكتەپتىڭ بوي كوتەرۋىنە رەسپۋبليكالىق بيۋدجەتتەن 700 ملن تەڭگە قارجى ءبولىندى. جاڭا ءبىلىم ورداسى تولىعىمەن زاماناۋي جابدىقتارمەن جابدىقتالىپ, كومپيۋتەرلىك قۇرىلعىلارمەن قامتاماسىز ەتىلدى. ودان بولەك, جەكە كومپيۋتەر سىنىبى, قىزدار مەن ۇل بالالارعا شەبەرحانا جانە زەرتحانا كابينەتتەرى جاساقتالدى.
«بۇگىن كوپتەن كۇتكەن مەكتەپتىڭ اشىلۋى بولىپ جاتىر. اۋىلىمىزدا جاڭا مەكتەپ بوي كوتەردى. وقۋشىلار مەن اتا-انالاردىڭ قۋانىشىندا شەك جوق. بۇرىنعى مەكتەپتىڭ جاعدايى ناشار بولعان. ەندى مۇعالىمدەر جاڭا كومپيۋتەرلىك سىنىپتا, ينتەراكتيۆتى تاقتامەن ساباق بەرەتىن بولادى», دەيدى كوكسۋ اۋىلدىق وكرۋگىنىڭ اكىمى ءاليا باحتياروۆا.
جاڭا مەكتەپ 38 ادامدى جاڭا جۇمىس ورنىمەن قامتيدى. ونىڭ 29-ى – ۇستازدار قاۋىمى. مۇعالىمدەر ءتول مەرەكەلەرى قارساڭىندا مۇنىڭ ۇلكەن سىي بولعانىنا قۋانۋدا.
ايتا كەتەلىك, بۇدان بولەك كەربۇلاق اۋدانىندا «جۇمىسپەن قامتۋ جول كارتاسى-2020» باعدارلاماسى اياسىندا سارىباستاۋ ورتا مەكتەبى جانە «اۋىل – ەل بەسىگى» باعدارلاماسى اياسىندا سارىبۇلاق ورتا مەكتەبى كۇردەلى جوندەۋدەن وتۋدە.
الماتى وبلىسى