ەلوردادا كومىردى قايدان ساتىپ الۋعا بولادى

"قاتتى وتىننىڭ جالپى قورى 2 قازانداعى جاعداي بويىنشا 10 570 توننانى قۇرايدى. ەلورداعا 1 ماۋسىم مەن 5 قازان ارالىعىندا 1962 ۆاگون, ياعني 136 561 توننا كومىر كەلدى. ونىڭ ىشىندە قىركۇيەك ايىندا – 44 ۆاگون نەمەسە 2967 توننا "مايكۇبى" كومىرى, 6 ۆاگون نەمەسە 414 توننا "قاراجىرا" كومىرى", دەپ حابارلادى ەلوردانىڭ وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى.

ەلوردالىقتار قاتتى وتىندى ون ءبىر ساتۋ نۇكتەسىنەن الا الادى, ولار كەلەسى مەكەن-جايلاردا ورنالاسقان: گەرتسەن, 4/1, 40-ست.; گەرتسەن, 6 ب; كوكتال, 28/1; جۇبانوۆ, 35; ليتەينايا, 44; دۋلاتوۆ, 182/1, تسەنتر بەتون; جاباەۆ, 68; ماقات, 40.

ورتاشا باعا كومىر سورتىنا قاراي جانە جەتكىزۋ قىزمەتىن قوسپاعاندا, 9500 تەڭگەدەن 13000 تەڭگەگە دەيىن. سونىمەن, ءبىر توننا "شۇباركول" كومىرى 12750 تەڭگەدەن, "قاراجىرا" – 12700, "مايكۇبى" – 13000, "بوگاتىر" – 9500 تەڭگەدەن ساتىلۋدا.

قاتتى وتىن باعاسى, تۇرلەرى مەن مولشەرى تۋرالى تولىق اقپاراتتى 109 سەنىم تەلەفونى ارقىلى الۋعا بولادى.

وتىن الدىن-الا ساتىپ الىنىپ, قاراڭعى جانە قۇرعاق جەردە ساقتالسا, قاسيەتتەرىن جوعالتپايدى. باسقارمانىڭ مالىمەتى بويىنشا, قىستا ەلوردادا ورتا ەسەپپەن 500 مىڭ توننا كومىر تۇتىنىلادى.

ەستەرىڭىزگە سالا كەتەيىك, ەلوردالىق توتەنشە جاعدايلار دەپارتامەنتى جەكە سەكتور تۇرعىندارىن جىلىتۋ پەشتەرىن پايدالانۋ كەزىندە قاۋىپسىزدىك تەحنيكاسىن ساقتاۋعا شاقىرادى. مەملەكەتتىك ورگان كەلەسى ەرەجەلەردى ساقتاۋدى ۇسىنادى:

- پەشتى 50ح70 سم ولشەمدى مەتالل توسەگىش جابدىقتاۋ قاجەت;

- پەشتىڭ جانعىش قۇرىلىمداردان ورتكە قارسى قاشىقتىعى كەمىندە 26 سم بولۋى كەرەك;

- ءتۇتىن قۇبىرىنىڭ ىشكى بەتىنەن قورعالماعان جانعىش قۇرىلىستارعا دەيىنگى ارا قاشىقتىق 50 سم-دەن, ال قورعالعان جانعىش قۇرىلىستارعا دەيىن ارا قاشىقتىق 38 سم-دەن كەم بولماۋى ءتيىس;

- پەشتىڭ قاتتى قىزۋىنا جول بەرمەۋ, پەشتەردە جانە ولارعا جاقىن جەردە وتىن, كيىم جانە باسقا دا جانعىش ماتەريالداردى قۇرعاتپاۋ;

- پەشتەردى جاعۋ ءۇشىن جانعىش سۇيىقتىقتاردى پايدالانۋعا, جانىپ جاتقان پەشتى قاراۋسىز قالدىرۋعا, سونداي-اق ولاردى قاداعالاۋدى جاس بالالارعا تاپسىرۋعا;

- قۇرامىندا قىزعان جانە بىقسىعان ماتەريالدار بار كۇل مەن قوج وتتىقتان شىعارىلعاننان كەيىن ءورتتىڭ پايدا بولۋ مۇمكىندىگىن بولدىرمايتىن جانە سۋمەن توگىلمەيتىن ارنايى بولىنگەن ورىنعا شىعارىلۋى ءتيىس.

ايتا كەتۋ كەرەك, قالانى گازداندىرۋ جۇمىستارى جالعاسۋدا. تۇرعىن الاپتاردا ۇيلەردى گازبەن جابدىقتاۋ جەلىلەرىنە قوسۋ ءۇشىن تەگىن تەحنيكالىق شارتتار الۋعا فرونت-وفيستەر اشىلدى.

وسى جىلىتۋ ماۋسىمدا جەلەزنودوروجنىي, پرومىشلەننىي, كوكتال-2, كوكتال-1, اگروقالاشىق ء(ىشىنارا) تۇرعىن اۋداندارىنداعى ۇيلەر گازبەن جىلىتا الادى دەپ كۇتىلۋدە.

سونداي-اق ۇستىمىزدەگى جىلى جەو-1 جانە جەو-2 قازاندىقتارىنىڭ ءبىر بولىگىن گازعا اۋىستىرۋ جوسپارلانىپ وتىر.