حاتيموللا بەردىعاليەۆ اباي تويىنا تارتۋ جاسادى

ەسىمى سۋىرىپ سالما اقىندىعىمەن دە, كەڭ تىنىستى انشىلىگىمەن دە التى الاشقا ايگىلى حاتيموللا اعامىزدىڭ اباي تويىنا تارتۋى بيىل مامىر ايىندا ءوتۋى ءتيىس بولاتىن. الايدا پاندەميانىڭ كەسىرىنەن كەرى ىسىرىلىپ, كۇزگە دە جەتىپتى.

– باسقا اناۋ-مىناۋ كىسى بولسا ەشتەڭە ەمەس, الىپ تۇلعا ابايدىڭ جۇگىن ارقالاپ جۇرە بەرۋ قيىن بولدى. عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ ديرەكتورى اسحات تاراس ۇلىنا "جىل اياعى دا جاقىنداپ قالدى عوي. حالىقتى جيناي الماساق, ەڭ بولماسا ونلاين كونتسەرت وتكىزەيىك" دەپ ۇسىنىس ايتتىم. ءسويتىپ, وسى كونتسەرتتى وتكىزۋگە تاۋەكەل ەتتىك. بۇل مەنىڭ جەكە وتكىزگەن سوڭعى كونتسەرتىم بولۋى مۇمكىن. ويتكەنى جاسىم جەتپىسكە تاياپ قالدى. جەكە كونتسەرت بەرۋ وڭاي ەمەس, وعان كوپ كۇش, قايرات كەرەك, – دەيدى حاتيموللا اعامىز.

كونتسەرت عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ ۇلكەن زالىندا, "سەرپەر", "جۇبانوۆ كوكتەمى" جانە تايۆان ەلىندە وتكەن حالىقارالىق فەستيۆالدەردىڭ لاۋرەاتى داۋلەتكەرەي اتىنداعى حالىق اسپاپتارى وركەسترىنىڭ سۇيەمەلدەۋىمەن ءوتتى. وركەستردىڭ كوركەمدىك جەتەكشىسى جانە باس ديريجەرى, "قۇرمەت" وردەنىنىڭ يەگەرى, مەملەكەتتىك "دارىن" جاستار سىيلىعىنىڭ لاۋرەاتى, قر "مادەنيەت سالاسىنىڭ ۇزدىگى" ەركىن نۇرىمبەتوۆ تە وسى كونتسەرتتىڭ ۇيىمداستىرىلۋىنا كوپ ۇلەس قوسىپتى. وسى كەشتە ورىندالعان ءبىراز ءاندى وركەسترگە تۇسىرگەن ءوزى ەكەن.

ابايدىڭ "ايتتىم سالەم قالامقاس" انىمەن باستالعان كونتسەرتتە بارلىعى 20 شىعارما ورىندالدى. ونىڭ نەگىزگى بولىگىن – 15 شىعارمانى حاتيموللا بەردىعاليەۆتىڭ ءوزى ورىنداسا, ءانشىنىڭ ونەردەگى ارىپتەستەرى دە قالىس قالمادى. نۇرعيسا تىلەنديەۆتىڭ "اباي تابيعاتى" شىعارماسىن قازاقستان رەسپۋبليكاسىنىڭ مادەنيەت قايراتكەرى ءجاميلا نۇرىمبەتوۆا جەكە قوبىزدا ورىنداسا, احمەت جۇبانوۆتىڭ "اباي" سيۋيتاسىن وركەستر مەملەكەتتىك "دارىن" جاستار سىيلىعىنىڭ لاۋرەاتى جاراس ساتىبالديەۆتىڭ ديريجەرلىك ەتۋىمەن ويناپ شىقتى. احمەت جۇبانوۆ پەن لاتيف ءحاميديدىڭ "اباي" وپەراسىنداعى ابايدىڭ "ەي, حالايىق" ارياسىن ەركىن نۇرىمبەتوۆ باستاعان وركەستردىڭ سۇيەمەلدەۋىمەن "ەرەن ەڭبەگى ءۇشىن" مەدالىنىڭ يەگەرى ايبار حايىرحانوۆ حالىققا ۇسىندى.

بىرقاتار شىعارمانى وركەستردىڭ قولداۋىمەن, ءبىر بولىگىن دومبىرامەن, ەندى ءبىر پاراسىن كونتسەرتمەيستەر گالينا اندرەەۆانىڭ سۇيەمەلدەۋىمەن ورىنداعان ءانشىنىڭ ونەرپاز قىرى جارقىراپ كورىندى. ءار شىعارمانىڭ سازى مەن ءسوزى ۇيلەسىپ, ورىنداۋشىنىڭ جۇرەگىنەن ءوتىپ, كومەيىنەن توگىلگەن كەزدە, تىڭداعان جاننىڭ جان-دۇنيەسىن ەرىكسىز باۋرادى. اتشاپتىرىم زالدا ارنايى شاقىرۋمەن كەلگەن ۇركەردەي توپ قانا وتىرعانىمەن, الەۋمەتتىك جەلىدە تىكەلەي كورسەتىلگەن ەفيردى قازاقستاننىڭ تۇكپىر-تۇكپىرىنەن تالاي كورەرمەن تاماشالاپتى.

بۇل كونتسەرت مۇعالىمدەر مەرەكەسى قارساڭىندا وتكەن ەدى. كونتسەرت سوڭىندا ءانشى ءوزىنىڭ اياۋلى ۇستازىن ەسكە الدى.

"مەنىڭ اباي اندەرىمەن تانىسۋىم سوناۋ مەكتەپ قابىرعاسىنان باستالعان. بىزگە اباي الەمىن العاش تانىتقان, ابايدىڭ تاتىمدى جىرلارىن ءبىزدىڭ تاڭدايىمىزعا تاتىتقان – ۇستازىمىز فاۋزيا اپاي عايسينا بولاتىن. ءتىرى بولسا بيىل 90 جاسقا تولار ەدى. قازتالوۆتا وقىپ جۇرگەن كەزىمدە 5 سىنىپتان باستاپ كلاسس جەتەكشى بولدى. تەك مەنىڭ ەمەس, بۇكىل سىنىپتىڭ ادەبيەتكە, ونەرگە وڭ قاراۋىنا سول ۇستازىمنىڭ كوپ سەپتىگى ءتيدى. بۇگىن سىزدەر تىڭداعان ءابلاحات ەسباەۆتىڭ "وزگەگە كوڭىلىم تويارسىڭ" ءانىن 5 سىنىپتا جۇرگەن كەزدە ەڭ العاش ۇيرەتكەن – سول فاۋزيا اپاي بولاتىن. كەيىن نوتاسىن تاۋىپ, وڭدەپ, رەپەرتۋارىما كىرگىزىپ الدىم. بۇل ءان ماعان ابايدان, ءابىلاحاتتان جانە فاۋزيا اپايدان قالعان ەستەلىك بولدى. مەن بۇگىنگى كونتسەرتىمدى ۇستازىم فاۋزيا اپايدىڭ رۋحىنا ارنايمىن", دەدى ءانشى تولقىپ تۇرىپ.

قازاقستاننىڭ باتىس وڭىرىندەگى ءداستۇرلى ءان مەكتەبىنىڭ ءىرى وكىلى سانالاتىن حاتيموللا بەردىعاليەۆ اعامىز ءار كونتسەرتىنە ۇلكەن دايىندىقپەن, ۇلكەن جاۋاپكەرشىلىكپەن كەلەتىنىن بۇرىن دا بايقايتىنبىز. 2012 جىلى ءوزىنىڭ 60 جىلدىق مەرەيتويىندا "ايمان-شولپان" داستانىن 1,5 ساعات بويى جىرلاپ بەرگەنى ەسىمىزدە. ول كونتسەرتكە ءانشى جارتى جىل دايىندالعان ەكەن. ال بۇگىنگى كونتسەرتى جوعارىدا ايتقانىمىزداي, ءبىر جىلعا جۋىق دايىندىق, قايتالاۋدىڭ جەمىسى بولدى.

"باياعىدان بەرگى ادەتىم – ۇلكەن ساحناعا شىعاتىن ۋاقىتىم جاقىنداعان سايىن الاڭداپ, ۇيقىدان ايرىلامىن. ءبىر قىزىعى, كونتسەرت بولاتىنىن ماعان الدىن الا ايتپاسا دا وزىمنەن ءوزىم مازاسىزدانىپ كەتەمىن. ونىڭ ۇستىنە بۇگىنگى كونتسەرتتىڭ ءجونى بولەك قوي. ابايعا كەلگەندە ابايلاپ كەلۋ كەرەك! وسى كونتسەرتىمدى ۇيىمداستىرۋعا, وتكىزۋگە قولعابىس بەرگەن باسشىلارعا, ارىپتەستەرىمە, وركەسترگە مىڭ سان العىسىمدى ايتامىن!", دەدى ءانشى ادەمى دە اسەرلى ءان كەشىنىڭ قورىتىندىسىندا سويلەپ تۇرىپ.

P.S. اباي اتامىز ء"اننىڭ دە ەستىسى بار, ەسەرى بار" دەمەكشى, ورالدا وسىنداي ەستى ءاننىڭ كەشى ءوتتى. ءبىر كەزدەرى ايتىستا دا جارقىراي كورىنىپ, ءان مەن جىردى قوس قاناتىنداي الىپ كەلە جاتقان حاتيموللا بەردىعاليەۆ وسى كەزگە دەيىن 30-عا جۋىق ءانشىنى تاربيەلەپ, دايىنداعان ۇلاعاتتى ۇستاز دا. كەيىنگى جاستارعا "ەستى اندەرگە ءۇيىر بولىڭدار!" دەۋدەن جالىقپايتىن اعامىزعا ۇزاق عۇمىر تىلەيمىز!