قازاق-قىرعىز ءبىر تۋعان...

ۇلتتىق كەلىسىم مەن قوعامدىق بىرەگەيلىكتى ودان ءارى نىعايتۋ ماق­ساتىندا تاراز قالاسىندا «جام­بىل وبلىستىق «ماناس اتا» قىرعىز ەتنومادەني بىرلەس­تىگى» قو­عامدىق بىرلەستىگىنىڭ ۇيىمداس­تى­رۋىمەن قىرعىز ەتنوسىنىڭ مادەنيەتى مەن ونەرى كۇنى ءوتتى. مادەني شارا بارىسىندا اتالعان قوعامدىق بىرلەستىكتىڭ توراعا­سى ساعىمبەك مىرزابەكوۆ ءسوز سوي­لەپ, جالپىۇلتتىق بىرلىكتى نىعاي­تۋ باعىتىندا جۇمىس جۇرگىزۋ بىر­لەستىكتىڭ نەگىزگى ماقساتى ەكە­نىن جەت­كىزدى. سونىمەن قاتار ول قازاق پەن قىرعىزدىڭ ۇلتتىق داس­تۇر­لەرىندەگى ۇقساستىقتار مەن تامىر­لاستىقتى ساقتاۋ تۋرالى اڭگىمەلەدى.

اتاقتى ءسۇيىنباي مەن قاتاعان, جامبىل مەن مولدا باعىش, سارباس پەن قالمىرزا سياق­تى اقىنداردىڭ ايتىستارى ەكى ەلدىڭ دە ورتاق قۇندىلىعى بو­لىپ سانالادى. سول سياقتى ونەر­دىڭ بارلىق سالاسىندا دا قازاق پەن قىرعىزدىڭ رۋحاني ۇندەس­تىگى بىردەن اڭعارىلادى. قىر­عىز ەتنوسىنىڭ مادەنيەتى مەن ونەرى كۇنىنە وراي اۋليەاتا تو­پى­را­عىندا ۇيىمداستىرىلعان شا­راعا وڭىردەگى «اقساقالدار مەن انا­لار» كەڭەستەرىنىڭ وكىلدەرى دە قاتىسىپ, بىرلەستىكتىڭ «جاستار قاناتى» كوپشىلىككە ءوز ونەرلەرىن كور­سەتتى. قوبىز جانە دومبىرا اس­پاپتارىنىڭ سۇيەمەلدەۋى­مەن «ارمان-اي», «جىلقىچىنىڭ جىرى» اندەرى شىرقالدى. ونەر­پازدار مىڭجىلدىقتارعا جالعاس­قان رۋحاني مۇرا «ماناس» ەپوسىنان ۇزىندىلەر وقىپ, تارازدىقتار­دى ءتانتى ەتتى. سونداي-اق قىرعىز حالقىنىڭ ۇلى پەرزەنتى, ايگىلى جازۋشى شىڭعىس ايتماتوۆتىڭ تۋىندىلارى جايىندا اڭگىمە ءوربىدى. قالامگەردىڭ ءاربىر شىعارما­سىن­دا قازاقتىڭ ۇلى بولمىسى, تاعدىرى مەن تاريحى كورىنىس تاباتىنى ايتىلدى. سونىمەن قاتار جازۋشىنىڭ «قوش بول, گۇلسارى», «ەرتە قايتقان تىرنالار» اتتى اتاقتى شىعارمالارىنان ۇزىندى­لەر ساحنالاندى. شىعارمادا بەي­نە­لەنەتىن تۇلپار گۇلسارىنىڭ تاع­دىرى, تاناباي مەن شورانىڭ دوس­تىعى, جالپى, سوعىستان كەيىنگى كەزەڭ­نىڭ قيىندىعى, ادامداردىڭ ارا­سىن­داعى ادىلەتسىزدىك سياقتى كورى­نىس­تەرگە كوپشىلىك كۋا بولدى.

جيىن سوڭىندا ونەر كورسەتكەن ونەرپازدارعا العىس حاتتار مەن سىيلىقتار تابىس ەتىلدى.

جامبىل وبلىسى