قىزىلوردادا «قالا كۇنى» مەرەكەسى اتالىپ ءوتىپ, بوي كوتەرگەنىنە ەكى عاسىردان اسقان تاريحي شاھاردا وسى كۇنى بىرقاتار نىسان ەل يگىلىگىنە بەرىلدى. شەجىرەلى شاھارداعى شارالار شىمىلدىعى «دەنساۋلىق ساياباعىندا» اشىلدى. جاڭا نىساندا وبلىس اكىمى گۇلشارا ابدىقالىقوۆا تۇرعىنداردى مەرەكەمەن قۇتتىقتادى.
– بيىل ىرگەسى قالانعانىنا 202 جىل تولاتىن قىزىلوردا كۇننەن- كۇنگە كوركەيىپ كەلەدى. جاڭادان شاعىن اۋداندار بوي كوتەرىپ, سىرداريا وزەنىنىڭ سول جاعالاۋى دا قارقىندى دامۋ ۇستىندە. بۇگىنگى كۇنگە ورايلاستىرىلىپ اشىلعان «دەنساۋلىق ساياباعى» وبلىس ورتالىعىنداعى تاعى ءبىر تاماشا نىسان بولادى دەپ سەنەمىز, – دەدى ايماق باسشىسى.
وبلىس اكىمى قايتا جاڭعىرتۋدان وتكەن «سىر انا» الاڭىن دا ارالاپ كوردى. اباتتاندىرۋ جۇمىستارىن «تەحوسناستكا-رەمسەرۆيس» جشس جۇرگىزگەن الاڭدا جاياۋ جۇرگىنشىلەر جولى, سپورتتىق ويىن الاڭى جانە 2 سۋ بۇرقاق ورنالاستىرىلعان.
قالا تويى اياسىنداعى ايشىقتى شارالاردىڭ ءبىرى جاپپاسباي باتىر كوشەسى بويىنداعى №282 مەكتەپ-ليتسەيدىڭ اشىلۋى بولدى. وسىدان ەكى جىل بۇرىن سالىنا باستاعان 200 ورىندىق ءبىلىم وشاعىنىڭ قۇرىلىسىن «اريا-جاڭا استانا» جشس جۇرگىزىپتى. جاڭا مەكتەپتە وقۋشىلار سانيتارلىق نورمالاردى قاتاڭ ساقتاي وتىرىپ, II توقساننان باستاپ وقيتىن بولادى.
قوس عاسىر جاساعان قالا مەرەكەسىندە بيىلعى ىندەتتە تالاي جاندى اجالدان اراشالاپ الىپ قالعان مارتەبەلى ماماندىق يەلەرىنە ارنالعان «دارىگەرلەر اللەياسىنىڭ» اشىلۋ ءراسىمى ءوتتى. «جۇمىسپەن قامتۋدىڭ جول كارتاسى» باعدارلاماسى شەڭبەرىندە نۇرسۇلتان نازارباەۆ داڭعىلىن اباتتاندىرۋ جوباسى بويىنشا سالىنعان نىساندا قالا اكىمى نۇرلىبەك نالىباەۆ وبلىس باسشىسىنا الداعى ۋاقىتتا كاسىپكەرلەردى ۇيىمداستىرىپ, ويىن اتتراكتسيوندارىن ورناتىپ, اللەيانى سپورتتىق, پاتريوتتىق ءىس-شارالار وتكىزەتىن ورىنعا اينالدىرۋ باعىتىنداعى جوسپارلارىن جەتكىزدى.
وتىز بەس گەكتار اۋماققا ورنالاسقان اللەيادا ۆەلوجول, 6 سپورتتىق ويىن الاڭى, اياق سۋ كانالى, تۇنگى جارىق شامدارى ورنالاسقان. سونىمەن قاتار 20 717 ءتۇپ كوشەت, 61 مىڭ گۇل ەگىلىپ, 10 450 شارشى مەتر اۋماق اباتتاندىرىلدى.
شارادا ايماق باسشىسى گۇلشارا ابدىقالىقوۆا كوپبەيىندى وبلىستىق اۋرۋحانانىڭ كارديولوگ دارىگەرى عالىمجان قورازوۆ پەن وسى مەكەمەدەگى رەابيليتاتسيا بولىمشەسىنىڭ مەڭگەرۋشىسى عاليا ابەنوۆاعا پاتەر كىلتىن تابىستادى.
مەرەكەگە وراي اۋىلشارۋاشىلىق ونىمدەرى جارمەڭكەسى ۇيىمداستىرىلىپ, ونى ارالاۋ بارىسىندا وبلىس اكىمىنە شاھار باسشىسى نۇرلىبەك نالىباەۆ الەۋمەتتىك ماڭىزى بار ونىمدەردىڭ تۇرعىندارعا نارىقتاعىدان تومەن باعامەن ساتىلىپ جاتقانىن جەتكىزىپ, جارمەڭكە جەلتوقسان ايىنا دەيىن ءار سەنبى سايىن ۇيىمداستىرىلاتىنىن ايتتى.
وسى كۇنى وبلىس ورتالىعىندا مەملەكەت جانە قوعام قايراتكەرى, سوعىس جانە ەڭبەك ارداگەرى ىدىرىس قاليەۆتىڭ ءبيۋستى اشىلدى.
ادال ەڭبەگىمەن ەل قۇرمەت تۇتقان قايراتكەرگە اينالعان ازامات رۋحىن ۇلىقتاۋعا ارنالعان شارادا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ قۇتتىقتاۋ جەدەلحاتى وقىلىپ, وبلىس اكىمى گۇلشارا ابدىقالىقوۆا ەل ارداقتىسى جايلى جىلى لەبىزىن جەتكىزدى.
تالاي قىزمەتتى ابىرويمەن ەڭسەرگەن قايراتكەر تۇلعانىڭ ەڭبەگى ءار كەزدە لايىقتى باعالانىپ, 2 مارتە ەڭبەك قىزىل تۋ وردەنىن يەلەنگەن, «وتان سوعىسى», «قۇرمەت بەلگىسى», تاۋەلسىز ەلىمىزدىڭ «قۇرمەت» وردەندەرىمەن, بىرنەشە مەدالمەن ماراپاتتالعان. قىزىلوردا وبلىسىنىڭ, قالانىڭ, قازالى, ارال اۋداندارىنىڭ قۇرمەتتى ازاماتى اتاندى, سىر ءوڭىرىنىڭ باتاگويى, اقىلمان اقساقالى بولدى. قالا ورتالىعىنداعى جەلتوقسان مەن ا.توقماعامبەتوۆ كوشەلەرى قيىلىسىنا قويىلعان قولا بيۋست اۆتورى – قازاقستان سۋرەتشىلەر وداعىنىڭ مۇشەسى, ءمۇسىنشى امانكەلدى كەنەنباەۆ.
مەرەكەلىك شارالار شەڭبەرىندە سىرداريا وزەنىنىڭ سول جاعالاۋىنان «نۇرلى جەر» باعدارلاماسى اياسىندا بوي كوتەرگەن نەسيەلىك ۇيلەر پايدالانۋعا بەرىلدى. وبلىس اكىمى تۇرعىندارعا پاتەر كىلتىن تابىستاپ, قونىس تويىمەن قۇتتىقتادى. وسى اۋماقتاعى ۇيلەر قۇرىلىسىن «باق-بەرەكە 2030», «دانەكەر», «ساپاق», جانە «استانا سەرۆيس لتد» كومپانيالارى سالعان. بەس قاباتتان تۇراتىن 200 پاتەرلىك تۇرعىن ءۇيدىڭ جالپى اۋدانى 12 مىڭ 619 شارشى مەتر.
كەيىنگى جىلدارى قىزىلوردا قالاسىندا 14 جاڭا شاعىن اۋدان, 7 تۇرعىن ءۇي كەشەنى بوي كوتەرىپ, 10 مىڭعا جۋىق قىزىلوردالىق باسپانالى بولدى.
بيىل جىل سوڭىنا دەيىن 680 پاتەرلىك ارەندالىق 14 كوپقاباتتى ءۇيدىڭ قۇرىلىسىن اياقتاۋ كوزدەلىپ وتىر. جەكە ينۆەستورلار قاراجاتى ەسەبىنەن 86 پاتەرلىك 1 كوپقاباتتى تۇرعىن ءۇيدىڭ قۇرىلىسى جۇرگىزىلۋدە.
قىزىلوردا