كەمبريدج ءبىلىم بەرۋ بويىنشا سەرىكتەستىگىنىڭ باسقارۋشى ديرەكتورى دجەين مانن II دارەجەلى "دوستىق" وردەنىمەن ماراپاتتالدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ماراپات قازاقستان رەسپۋبليكاسى پرەزيدەنتى قاسىم-جومارت توقاەۆتىڭ جارلىعىمەن قازاقستان مەن ۇلىبريتانيا جانە سولتۇستىك يرلانديا قۇراما كورولدىگى اراسىنداعى دوستىق قارىم-قاتىناستاردى نىعايتۋعا قوسقان ەلەۋلى ۇلەسى ءۇشىن, سونداي-اق قازاقتىڭ ۇلى اقىنى, فيلوسوف جانە اعارتۋشىسى اباي قۇنانباي ۇلىنىڭ مۇراسىن ناسيحاتتاۋعا سىڭىرگەن ەڭبەگى ءۇشىن بەرىلدى.
دج.مانن باسشىلىعىمەن كەمبريدج ۋنيۆەرسيتەتىنىڭ باسپاسىندا اباي شىعارمالارىنىڭ اعىلشىن تىلىندەگى العاشقى تولىق جيناعىن باسىپ شىعارۋ جونىندەگى بىرەگەي جوباسى جۇزەگە اسىرىلۋدا. "ۇلتتىق اۋدارما بيۋروسى" قق-مەن (ۇاب) بىرلەسە وتىرىپ, جۇزەگە اسىرىلاتىن جوبا شەڭبەرىندە اتاقتى بريتانيالىق اقىن شون و’برايەن اباي پوەزياسىن اۋدارۋمەن اينالىسادى, ال قارا سوزدەردى ءتارجىمالاۋ مىندەتى بەلگىلى شوتلاند جازۋشىسى جانە اقىنى دجون بەرنسايدقا جۇكتەلگەن. اعىلشىن تىلىندەگى باسىلىم – اتى اڭىزعا اينالعان قازاق اقىنىنىڭ شىعارمالارىن الەمنىڭ ون تىلىندە جاريالاۋ جونىندەگى ۇاب-نىڭ اۋقىمدى جوباسىنىڭ ءبىر بولىگى.
ماراپاتتى تابىستاي وتىرىپ, قازاقستاننىڭ ۇلىبريتانياداعى ەلشىسى ەرلان ىدىرىسوۆ دج.ماننىڭ جانە كەمبريدج ۋنيۆەرسيتەتى باسپاسىنىڭ ۇلى ابايدىڭ مۇراسىن اعىلشىن ءتىلدى اۋديتورياعا تانىمال ەتۋدە عانا ەمەس, سونىمەن بىرگە ەكى ەل مادەنيەتتەرىن ءوزارا جاقىنداستىرۋ ىسىندە دە زور ۇلەسى بار ەكەندىگىن اتاپ ءوتتى. كەمبريدج ۋنيۆەرسيتەتى كوپتەگەن جىلدار بويى نازارباەۆ ۋنيۆەرسيتەتىمەن جانە نازارباەۆ زياتكەرلىك مەكتەپتەرىمەن قازاقستاندىق ءبىلىم بەرۋدى دامىتۋ سالاسىندا تابىستى قىزمەت ەتىپ كەلەدى. ال 2019 جىلى "رۋحاني جاڭعىرۋ" باعدارلاماسى اياسىندا كەمبريدج ۋنيۆەرسيتەتىنىڭ باسپاسى ۇاب-مەن بىرلەسىپ, اعىلشىن تىلىندە زاماناۋي قازاق ادەبيەتىنىڭ العاشقى ەكى تومدىق انتولوگياسىن (پوەزيا مەن پروزا) جاريالاپ, الەمنىڭ جەتەكشى ۋنيۆەرسيتەتتەرى مەن كىتاپحانالارىنا جەتكىزدى.
ءوز كەزەگىندە دج.مانن بۇگىن كەمبريدجدىڭ قوسار ۇلەسى اباي ميسسياسىن جالعاستىرۋ جانە قازاق ادەبي ءداستۇرىن وتە كەڭ حالىقارالىق اۋقىمدا ىلگەرىلەتۋ ارقىلى دامىتۋعا ىقپال ەتۋ ەكەندىگىن مالىمدەدى.
"دوستىق" وردەنىمەن ماراپاتتالۋ تەك جەكە ءوزىم ءۇشىن عانا ەمەس, كەمبريدج ۋنيۆەرسيتەتىنىڭ بۇكىلۇجىمى ءۇشىن ۇلكەن مارتەبە جانە زور قۇرمەت. بۇل – قازاقستان مەن كەمبريدج اراسىنداعى دوستىقتىڭ, بىرگە اتقارعان جۇمىسىمىزدىڭ جانە بىرگە قولعا العان باستامالارىمىزدىڭ تاماشا بەلگىسى. جۇمىسىمىز وسىلاي تانىلعانىن ءبىز اسا باعالايمىز", دەپ اتاپ ءوتتى ول.