وتكەن اپتا بويى تاسمانيا ارالىنىڭ قۇتقارۋشىلارى جاعاعا شىعىپ قالعان 470 كيتتى قۇتقارۋمەن اينالىستى.
الايدا ولاردىڭ باسىم بولىگى ءولى تابىلعان نەمەسە العان جاراقاتى تىم اۋىر بولعان. ايماق وكىلدەرى بارلىعى 108 جانۋاردى قۇتقارىپ قالعاندارىن مالىمدەدى. بەس كۇنگە سوزىلعان وپەراتسياعا سۋىق سۋدا تۇرىپ جاعاعا كەلگەن كيتتەردى تەڭىزگە قايتا باعىتتاۋعا جۇزدەگەن ۆولونتەر قاتىسقان. بۇل تاريحتا تىركەلگەن وسى ءتارىزدى وقيعالاردىڭ ەڭ ىرىلەرىنىڭ ءبىرى. جالپى, كيتتەردىڭ جاعاعا شىعىپ قالۋى – ۇنەمى قايتالاناتىن قۇبىلىس. عالىمدار بۇل قۇبىلىستىڭ ناقتى سەبەبىن ءالى انىقتاي الماي كەلەدى. ءدال وسى سەكىلدى جاعدايلاردا كوبىنە كيتتەر ازىعىن اڭدىپ ءجۇرىپ جولىنان جاڭىلۋى مۇمكىن ەكەن. كەيدە وزدەرى جەمتىككە اينالىپ قالۋى دا مۇمكىن. تاياز سۋعا, كوبىنە جاعاعا قاراي تىم جاقىن كەلگەندە وسىنداي جاعدايلار قايتالانادى. ازىرگە مۇنداي ەڭ ءىرى وقيعا 1918 جىلى جاڭا زەلانديادا تىركەلگەن. وندا ءبىر مىڭ جانۋار جاعاعا شىعىپ قالعان. قازىر قۇتقارۋشىلار جاعاجايدى ولەكسەلەردەن تازارتىپ جاتىر, ال تۇرعىندارعا ازىرگە جاعاجايعا كەلۋگە بولمايدى.