وسى جىلى قازالى اۋدانىنىڭ ديقاندارى جالپى كولەمى 17 675 گەكتارعا اۋىل شارۋاشىلىعى داقىلدارىن ەكتى. كوكتەمگى ناۋقان بارىسىندا ءارتاراپتاندىرۋ باعىتىنداعى داقىلدارعا ەرەكشە ءمان بەرىلىپ, بىلتىرعىمەن سالىستىرعاندا بيىل جازدىق بيداي – 140, ارپا – 108, تارى – 4 جانە جۇگەرى 200 گەكتارعا ارتىق ەگىلدى. كۇرىشپەن سالىستىرعاندا سۋدى مەيىلىنشە از «ىشەتىن» بۇل داقىلدار ديقانداردى جازداعى قۋاڭشىلىق كەزىندە كوپ قيىندىققا سالا قويعان جوق.
بيىل اۋداندا كارتوپ, كوكونىس, باقشا داقىلدارىننىڭ كولەمى دە ارتىپ وتىر. مىسالى, سارىكول اۋىلدىق وكرۋگىندەگى «دانيار» شارۋا قوجالىعى – 20, ال اقجونا اۋىلدىق وكرۋگى اۋماعىنداعى «دۇزباەۆ اسەت» قوجالىعى 23 گەكتارعا ءتۇرلى داقىلدار ەگىپ, قازىر ونىمدەرىن وتكىزۋدە. بۇدان وزگە 900 گەكتار كوكونىستىڭ 40, ال جالپى كولەمى 1050 گەكتار بولاتىن باقشا ونىمدەرىنىڭ 32 پايىزى جينالدى.
تابيعات جاعدايىنا بايلانىستى باسقا اۋدانعا قاراعاندا كۇرىشكە وراق سالۋعا كەشتەۋ كىرىسەتىن اۋداندا وراققا قاتىساتىن جاتكا مەن كومبايننىڭ 22 داناسى شەتەلدىك جوعارى ءونىمدى, ساپالى, زاماناۋي تەحنيكالار. جالپى, قولدا بار 42 كومباين, 29 جاتكا, 115 تراكتور, 40 جۇك كولىگى مەن 59 تراكتور تىركەمەسى تولىق دايىندىقتان ءوتىپ, ەگىن جيناۋ جۇمىستارىن باستاۋدا.
شارۋاشىلىقتار بويىنشا ەگىن جيناۋ ناۋقانىنا قاتىساتىن تەحنيكالارعا قاجەتتى قوسالقى بولشەكتەر مەن قويۋ ماي جانە جاعار مايدىڭ قوسىمشا قورلارى جەتكىلىكتى.
بيىل اۋدانداعى اۋىلشارۋاشىلىق قۇرىلىمدارى «قازاگروقارجى» اق ارقىلى جانە باسقا دا قارجى كوزدەرىنەن 652,5 ملن تەڭگەگە 22 تەحنيكا ساتىپ الۋدى جوسپارلاسا, بۇگىندە 359 ملن تەڭگەگە 16 تەحنيكا الىندى.
اۋدان بويىنشا كۇرىشتىڭ سۋىن بايلاۋ, ورۋ جانە باستىرۋدىڭ كەستەسى بەكىتىلىپ, القاپتاردىڭ سۋىن تارتۋ 5 تامىزدان باستالىپ, بۇگىندە اۋىل شارۋاشىلىعى قۇرىلىمدارى بويىنشا 6 496 گەكتار كۇرىشتىكتىڭ ساعاسى تولىق بايلاندى.
وسى كۇنگە دەيىن مىڭ گەكتاردان استام القاپتىڭ كۇرىشىنە وراق ءتۇسىپ, 490 گەكتار جەردىڭ كۇرىشى باستىرىلدى. ورتاشا ءونىم گەكتارىنا 40 تسەنتنەردەن اينالۋدا.
قىزىلوردا وبلىسى