ۇلى ابايدىڭ 175 جىلدىعىنا وراي قىزىلجاردا ەرەكشە ەسكەرتكىش جاسالىپ جاتىر. ول اباي جانە مۇحتار اۋەزوۆ كوشەلەرىنىڭ قيىلىسىنداعى بەس قاباتتى ءۇيدىڭ قابىرعاسىن تۇتاس العالى تۇرعان اقىننىڭ بەينەسى سالىنعان پاننو.
قالا باسشىلىعىنىڭ قولداۋىمەن ونى ىسكە اسىرىپ جاتقان الماتىلىق سۋرەتشى بولات اسەربەكوۆ. تۋىندىنى وسىلاي جاساۋدى ۇسىنعان دا سول. پورترەت كەراميكالىق پليتالاردان قالانۋدا. ول قىستىڭ سۋىعىنا, جازدىڭ ىستىعىنا توتەپ بەرەدى. ونىڭ ۇستىنە بەتىنە شاڭ قونبايتىنداي ەتىپ ارناۋلى مايمەن جىلتىراتادى ەكەن. اقىن پورترەتىنىڭ اينالاسىنا قازاقى ورنەكتەر قالانباق. جۇمىستى جۇرگىزىپ جاتقان الماتىدان ارنايى كەلگەن قۇرىلىسشىلار.
ايتۋلارىنا قاراعاندا, ۇلى اقىننىڭ مۇنداي بەينەسى ەلىمىزدىڭ باسقا ەشبىر جەرىندە جوق. راس, وسكەمەندىك شەبەرلەر ءۇيدىڭ قابىرعاسىن تۇتاس العان پاننو جاساعان, بىراق ول عيماراتتىڭ ىشىندە بولاتىن. ال مىناۋ سارى ايازى ساقىلداعان ارقانىڭ تورىندە, دالادا تۇسكەلى تۇر.
قازىر جۇمىستىڭ مونتاجداۋ جۇمىستارى اياقتالعان. ەندى شەبەرلەر سۋرەتتىڭ وزىنە كىرىسىپ كەتكەن. ەگەر الدىمىزداعى 10 كۇن اشىق بولسا, ابايدىڭ ايرىقشا بەينەسى تولىق جاسالىپ, قىزىلجار كوركىن ارتتىرا تۇسكەلى تۇر. الايدا اياقتان شالاتىن دۇنيەلەر دە جوق ەمەس. سونىڭ ىشىندە جارنامالىق پلاكاتتار مەن وسى ءۇيدىڭ قابىرعاسىنان اشىلعان دۇكەنىڭ كونديتسيونەرى جۇمىسقا كەدەرگى كەلتىرۋدە. بۇل ماسەلە الداعى كۇندەردە شەشىلەدى دەيدى قۇرىلىسشىلار.
ايتا كەتەتىن جايت, ابايعا ءبىزدىڭ قالامىزدا ەسكەرتكىش العاش رەت 2005 جىلى قويىلعان ەدى. قالانىڭ قاق ورتاسىنداعى ساياباقتا بۇل ەسكەرتكىش اباي مەن پۋشكينگە ارناپ اشىلعان. ەندى مىنا پاننو اباي بەينەسىن قىزىلجار تۇرعىندارىنا جاقىنداتا تۇسەرى ءسوزسىز. قازىردىڭ وزىندە حالىق وعان تاڭدانىسپەن قىزىعا قاراپ ءجۇر.
پەتروپاۆل