مەملەكەتتىك قىزمەتكەرلەر مەن باق وكىلدەرى اراسىنان شىققان بالۋاندار ارقىلى دا تاعى ءبىر تانىلدى
قازاقتىڭ ءتول سپورتى سانالاتىن قازاق كۇرەسى تەكتى كۇرەس ەكەنىن بۇگىندەرى ءبىراز ەل مويىنداپ ۇلگەردى. وعان وسىعان دەيىن ەكى رەت الەم, بەس مارتە ازيا جانە ءبىرنەشە دۇركىن ەل چەمپيوناتتارى ءوتكەنى دالەل. بۇعان شۇكىر دەيمىز. دەسەك تە, ەلىمىزدە قازىرگى تاڭدا اتالمىش سپورتىمىزدى جان-جاقتى ناسيحاتتاۋدا كەمشىن تارتار تۇستارىمىز از ەمەس. ناۋرىز مەرەكەسى قارساڭىندا عانا كەي جەرلەردە بالۋانداردى بەلدەستىرگەن ءتۇر كورسەتكەنىمىزبەن, قالعان ۋاقىتتاردا تەك جوعارىداعى سياقتى ءبىرىنشىلىكتەردە عانا بالۋاندارىمىزدى كەزدەستىرۋگە مۇمكىندىك تۋادى. وسى ولقىلىقتاردىڭ ورنىن تولتىرۋ ماقساتىندا قاراعان جاننىڭ قانى قىزاتىن وسىناۋ بەكزات ونەرىمىزدى ناسيحاتتاۋدىڭ جاڭا ۇلگىسى جانكۇيەرلەرگە جول تارتتى. تۇڭعىش رەت ەلوردادا مەملەكەتتىك قىزمەتكەرلەر اراسىندا ۇيىمداستىرىلعان رەسپۋبليكالىق جارىس قازاق كۇرەسى دەسە ىشكەن اسىن جەرگە قوياتىن جانداردى ءبىر سەرپىلتىپ تاستادى. رەسپۋبليكالىق اقپاراتتىق-ساراپتامالىق ء“تىل” جۋرنالى مەن ء“تىل جاناشىرى” قوعامدىق بىرلەستىگىنىڭ ۇيىمداستىرۋىمەن وتكەن بۇل شاراعا ەلىمىزدىڭ تۇكپىر-تۇكپىرىنەن وتىزعا جۋىق بالۋان قاتىسىپ, باقتارىن سىنادى.
استاناداعى “استانالىق تسيرك” عيماراتىندا شوۋ-باعدارلاما نەگىزىندە وتكىزىلگەن جارىس ەرەجەسى بويىنشا قاتىسۋشىلاردىڭ مەملەكەتتىك قىزمەت ءوتىلى ءبىر جىلدان كەم بولماۋى ءوز الدىنا, مەملەكەتتىك ءتىلدى ەركىن مەڭگەرۋى باستى تالاپ بولدى. سونداي-اق سايىسقا تۇسەتىن بالۋاندار سالماعى 70 پەن 100 كيلو ارالىعىندا بولۋى دا مىندەتتى بولىپ تانىلعان. جالپى العاندا, ۇلتتىق ناقىشتارعا ءورنەكتەلگەن بۇل سىننىڭ بالۋانداردى تانىستىرۋى ءبىزدى ەرەكشە ءسۇيسىنتتى. ۇلتتىق كيىم ۇلگىسىندە كيىنىپ شىققان تورەشىلەرمەن بالۋانداردىڭ جەكە-جەكە اتا ءداستۇر مەن ءيىلىپ سالەم بەرۋى دە ءبىر عانيبەت بولدى دەسەك قاتەلەسپەيمىز.
سايىستا العاشقى بەلدەسۋدى توتەنشە جاعدايلار مينيسترلىگىنەن كەلگەن تالعات نۇراحمەتوۆ پەن بەيبىت ەسين (ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى) وتكىزدى. بۇل بەلدەسۋدە بەيبىتتىڭ اسىعى الشىسىنان ءتۇستى... اقتىق سىنعا بارار جولداما ءۇشىن كۇرەسكە دەيىن ءۇش اينالىمدى ارتقا تاستاعان بالۋانداردان سايدىڭ تاسىنداي ىرىكتەلىپ تورگە تورتەۋى شىقتى. فينالعا شىعۋ جولىندا قىزىلوردالىق جاسۇلان دوسىموۆ اقمولالىق نۇرلان جامالوۆتان باسىم تۇسسە, جامبىلدىق نۇرجان قازىبەكوۆ اۋىل شارۋاشىلىعى مينيسترلىگىنىڭ وكىلى داۋلەت ەسكەندىروۆتەن ايلاسىن اسىردى.
اقتىق ايقاستا نۇرجان قازىبەكوۆ پەن جاسۇلان دوسىموۆ ءبىر-بىرىنە بەرىسپەي ءبىراز ءجۇردى. الايدا سوڭعى مينوتتە جاسۇلان قارسىلاسىن ايلالى ادىسپەن الىپ ۇرىپ, جارىس جەڭىمپازى اتاندى. ءسويتىپ, قىزىلوردا وبلىسىنىڭ قارماقشى اۋدانىنان كەلگەن جاس بالۋان بەلگىلى كاسىپكەر, مەتسەنات ورالبەك بوتباي تىككەن تەمىر تۇلپاردى ولجالادى. ال كۇمىس جۇلدەگەر نۇرجان قازىبەكوۆ تۇرىك اۋە كومپانياسى تاعايىنداعان الەمنىڭ 150 ەلىنىڭ بىرىنە بارىپ-قايتۋ بيلەتىنە يە بولدى. بوز كىلەمدە سۇلۋ كۇرەس ونەرىن كورسەتىپ, كورەرمەنىن ءسۇيسىنتكەن رۋحتى نار ۇل نۇرجان ءوزىنىڭ مەككەگە بارعىسى كەلەتىنىن جاسىرمادى. ءۇشىنشى تۇعىر ءۇشىن قارسىلاسىن قاپى قالدىرعان اقمولا وبلىسىنىڭ ۇكىلەگەن ءۇمىتى نۇرلان جامالوۆ جارىستى ۇيىمداستىرۋشىلار تاراپىنان دايىندالعان تەلەديدارعا يەلىك ەتتى.
ەلىمىزگە بەلگىلى ەسترادا جۇلدىزدارى قىدىرالى مەن قاراقات بولمانوۆتار, گۇلباۋشان تەرگەۋبەكوۆا, “ ۇلىتاۋ” توبى جانە استانالىق تسيرك ارتىستەرىنىڭ ونەرىن تاماشالاعان جۇرتشىلىق شوۋ-باعدارلاماعا قاتىسامىن دەگەن ۇمىتكەرلەردىڭ قازاق كۇرەسىنە دەگەن ىنتا جىگەرلەرىنە دە شەك قويىلمادى. ءاۋ باستاعى ەرەجەگە سايكەس 100 كيلودان ارتىق سالماقتاعى بالۋاندار بەلدەسپەيدى دەپ كورسەتىلگەن-ءدى. دەسە دە اسا اۋىر سالماقتا كەلگەن قوس بالۋان بولەك سىنعا ءتۇستى. پرەزيدەنتتىڭ كۇزەت قىزمەتىنەن كەلگەن ارمان ابەۋوۆ پەن ىشكى ىستەر مينيسترلىگىنىڭ وكىلى تالعات قوجاباەۆتىڭ بەلدەسۋلەرى دە تارتىستى ءوتىپ, ارمان ابەۋوۆ جەڭىسكە جەتتى. ول ەير استانا اۋە كومپانياسى ازىرلەگەن ەۋروپاعا بارىپ قايتۋ جولداماسىن قالتاسىنا باستى.
قىزىقتىڭ كورىگى باق وكىلدەرى اراسىنداعى كۇرەستە قىزدى. كتك تەلەارناسىنىڭ وپەراتورى نۇربولات قۇلمانوۆ پەن ستۆ تەلەارناسىنىڭ ءجۋرناليسى باقىتبەك حاميتوۆ كۇرەسىندە نۇربولات باسىمدىق تانىتتى. قوس ارىپتەسىمىز دە “التىن سوفت” ساۋدا بەلگىسى شىعارعان قوس ءتىلدى (قازاقشا-ورىسشا, ورىسشا-قازاقشا) ەلەكتروندى قالتا سوزدىكتەرىنە يە بولدى.
تۇساۋكەسەرى بارشانىڭ باتاسىن العان يگى باستاما الداعى ۋاقىتتا جىل سايىن جالعاسىن تاپسا ەكەن دەيمىز. قازاق كۇرەسىنىڭ كوسەگەسىنىڭ كوگەرۋىنە قارلىعاشتىڭ قاناتىمەن سۋ سەپكەندەي دەمەۋ بەرەتىن وسىنداي قاناتقاقتى جوباعا دەمەۋشىلەر جيىرەك شىعىپ جاتسا, سپورتقا دەگەن قامقورلىقتىڭ ۇلكەنى وسى بولماق!
ءابدىراحمان قىدىربەك, استانا.