تامىز ايىنىڭ سوڭعى ونكۇندىگىندە سىر كۇرىشىنە وراق ءتۇستى. قازىر ايماقتاعى باستى ءونىمنىڭ 14 929 گەكتارى ورىلىپ, جارتىسىنان استامى باستىرىلدى. ورتاشا ءونىم گەكتارىنا 47,7 تسەنتنەردەن اينالۋدا. ماماندار بولجامىنا سايكەس, بيىل جينالاتىن ءونىم بىلتىرعى كولەمنەن كەم بولمايدى.
جالپى, وسى جىلى وبلىس بويىنشا 184,2 مىڭ گەكتارعا اۋىل شارۋاشىلىعى داقىلدارى ەگىلگەن. نەگىزگى داقىل – كۇرiشتىڭ كولەمى 89,5 مىڭ گەكتار. ەل نەسىبەسىن ەسەلەگەن ديقاندار وسى جازدا داريا دەڭگەيى تومەن تۇسكەن تۇستا الاڭداپ قالعان بولاتىن. «قازسۋشار» وبلىستىق فيليالىنىڭ ماماندارى شارۋاشىلىقتارعا سۋدى كەزەكپەن بەرۋدىڭ كەستەسىن جاساپ, بۇل تىعىرىقتان دا شىعۋدىڭ جولى تابىلدى. بىراق زاردابى جىلداعىدان قاتتى سەزىلگەن بيىلعى سۋ تاپشىلىعى وڭىردە ەگىستى ارتاراپتاندىرۋعا اسا ءمان بەرۋ قاجەتتىگىن كورسەتىپ كەتتى.
وسى باعىتتا وبلىستا العاش رەت قانت قۇمايى – 70, سويا – 240, جۇگەرى 1 667 گەكتارعا دەيىن جەتكىزىلىپ, ىلعال ساقتاعىش اكۆاگەلدەردى پايدالانۋ ارقىلى 80 گەكتارعا كۇزدىك بيداي ەگىلدى.
جالپى بيىل 59,8 مىڭ توننا مينەرالدىق تىڭايتقىشتار, 74,6 مىڭ ليتر گەربيتسيد ساتىپ الىنىپ, كۇرىش ەگىستىگىنىڭ 65,6 مىڭ گەكتارى ارامشوپكە قارسى وڭدەلدى, 67,5 مىڭ گەكتار القاپ تىڭايتقىشتارمەن ۇستەپ قورەكتەندىرىلدى. قازىر كۇرىشتەن باسقا ەرتە ەگىلەتىن ءداندى داقىلدار تولىعىمەن جينالىپ ءبىتتى.
ەگىن ناۋقانىندا 1640 تراكتور, 843 كومباين, 458 جاتكا, 308 جۇك كولىگى ءجۇر. جالپى, ەگىن جيناۋ مەن كۇزگى دالا جۇمىستارى ءۇشىن 12,5 مىڭ توننا ارزانداتىلعان ديزەل وتىنى بولىنگەن.
قىزىلوردا وبلىسى