سەنبى, 10 ءساۋىر كۇنى تاڭەرتەڭ رەسەي فەدەراتسياسىنىڭ سمولەنسك وبلىسىنداعى پەچەرسك قالاسىنىڭ تۇبىندە قالىڭ تۇمان جاعدايىندا قونۋعا بەت العان پولشا پرەزيدەنتى لەح كاچينسكيدىڭ تۋ-154 ۇشاعى اپاتقا ۇشىراپ, بورتىنداعى 96 ادام تۇگەل قازا تاپتى.
لەح كاچينسكي باستاعان پولشا مەملەكەتى ساياسي ەليتاسىنىڭ ءبىر توبى وسى ۇشاقپەن سمولەنسك وبلىسىنداعى كاتىن مەكەنىندە وسىدان 70 جىل بۇرىن, 1939 جىلى ءستاليننىڭ وزبىر ساياساتى سالدارىنان جازىقسىز اتىلعان پولياك وفيتسەرلەرىنىڭ رۋحىنا تاعزىم ەتۋ شارالارىنا قاتىسۋ ءۇشىن كەلە جاتقان ەدى. دەلەگاتسيا قۇرامىندا پولشا ورتالىق بانكىنىڭ باسشىسى س.سكپيشەك, سىرتقى ىستەر ءمينيسترىنىڭ ورىنباسارى ا.كرەمەر, اسكەري كۇشتەردىڭ باس قولباسشىسى ف.گاگور, پولشا سەيمىنىڭ 50 دەپۋتاتى جانە پرەزيدەنتتىڭ جۇبايى ماريا كاچينسكايا بولعان. سونىمەن قاتار, بورتتا جازىقسىز اتىلعان پولياك وفيتسەرلەرىنىڭ تۋىستارى مەن ۇرپاقتارى دا بار ەدى. قازىر اپاتتىڭ بولۋ سەبەپتەرىن انىقتايتىن رەسەيلىك كوميسسيا قۇرىلدى. سونداي-اق پولشا دا ءوزى تاراپىنان ارناۋلى كوميسسيا قۇرۋدى قولعا الدى. رەسەيلىك مامانداردىڭ ازىرگى مالىمەتتەرىنە قاراعاندا, اپات ۇشقىشتىڭ قاتەلىگىنەن بولعانعا ۇقسايدى. بىراق پولياك جاعى ونى جوققا شىعارىپ, قاتەلىك اۋە ديسپەتچەرلەرى تاراپىنان ورىن العان سەكىلدى دەپ وتىر... پرەزيدەنت ل.كاچينسكيدىڭ ءمايىتى جەكسەنبى كۇنى پولشاعا جەتكىزىلدى.