جۋىردا پەتروپاۆلعا بەلگىلى رەجيسسەر سەرگەي ءازىموۆ كەلىپ, ۇلى وتان سوعىسىندا سلوۆەنيادا قازا تاپقان قازاق سولداتى تۋرالى فيلم تۇسىرگەلى جۇرگەنىن ايتتى. ونىڭ دەنەسى سول جەردەگى كوستەلدىڭ قاسىنا جەرلەنگەن ەكەن.
جەرگىلىكتى تۇرعىندار ونىڭ باسىن كۇتىپ-تازالاپ, گۇل ەگىپ وتىراتىن كورىنەدى. ونىڭ اسقان ەرلىكپەن قازا تاپقانىن دا كوزى كورگەندەر ايتىپ كەتىپتى. فاشيستەر شوعىرلانعان ورتاعا ول جاسىرىنىپ بارىپ, بىرنەشە گراناتا لاقتىرعان ەكەن. ءوزى دە اۋىر جارالانادى. حۋتور تۇرعىندارى ونى جاسىرىپ, ءبىر ۇيدە باعادى, بىراق اۋىر جاراقاتتان جاۋىنگەر قايتىس بولادى.
ال كوستەل قىزمەتكەرىنىڭ شىركەۋ كىتابىنداعى جازۋىنا قاراعاندا ول سولتۇستىك قازاقستان وبلىسىنىڭ وكتيابر اۋدانىنداعى باعاناتى اۋىلىنىڭ تۋماسى. ەسىمىن كاسسە سەبەرو دەپ كورسەتكەن. بۇل قاسىم سيبيردەن (سەبەرو دەگەن وسى سيبير دەگەن سوزگە ۇقسايدى عوي) نەمەسە سولتۇستىكتەن دەپ بولجاۋعا نەگىز بولىپ وتىر. رەجيسسەر باعاناتى اۋىلىنان سوعىسقا اتتانعانداردىڭ اراسىنان 3-اق ادام حابارسىز كەتكەنىن دە انىقتاپ كەلىپتى. «دەمەك, وسىلاردىڭ بىرەۋى سلوۆەنياعا جەرلەنگەن باتىر بولۋى مۇمكىن», دەيدى رەجيسسەر.
سەرگەي ءازىموۆتىڭ ايتىپ بەرگەن دەرەكتەرى وسىنداي. ول مۇنى قازاقستان ەلشىلىگىنىڭ قىزمەتكەرلەرىنەن ەستىپتى. قازاق سولداتىنىڭ زيراتى سونداي جاقسى كۇتىمدە ەكەنىن كورگەن ول قاتتى تەبىرەنىپ, دەرەكتى فيلم ءتۇسىرۋدى قولعا العانى سول ەكەن. ماقساتى – باتىردىڭ تۋعان جەرىن ءتۇسىرىپ, تۋىستارى, تانىستارى بولسا – اڭگىمەلەرىن جازىپ العىسى كەلگەن.
سويتسە مۇنداعى جۇرتقا كاسسە سەبەرونىڭ ەسىمى وسىدان ەكى جىل بۇرىن بەلگىلى بولعان ەكەن. ءتىپتى جامبىل اۋدانىنان ونىڭ تۋىستارى دا تابىلىپ, حابارسىز كەتكەن ءبىزدىڭ اعامىز بولۋى كەرەك دەگەن بولجامدار ايتىلعان. ولاردىڭ ايتۋىنا قاراعاندا, باتىردىڭ اتى-ءجونى قاسىم جاقىپوۆ. كاسسە دەگەندى ولار قاسىم دەپ قابىلداعانى حاق.
الايدا وكتيابر اۋدانىندا تۋعان دەگەن دەرەكتى العا تارتۋشىلار ونىڭ بۇل ادام ەكەنى ناقتى ەمەس دەيدى. سونىڭ ىشىندە وبلىستىق ءارحيۆتىڭ ديرەكتورى ساۋلە مالىكوۆانىڭ ايتۋىنا قاراعاندا, قۇجاتتى نەگىزدە دالەلدەنبەگەن سوڭ ونى قاسىم جاقىپوۆ دەپ ايتۋ قيىن. ارحيۆ ديرەكتورىنىڭ ءوزى باعاناتى اۋىلىنان حابارسىز كەتكەندەر 3 ەمەس 10 ەكەنىن انىقتاعان. ء«بىز بۇرىنعى وكتيابر, قازىرگى شال اقىن اۋدانىنىڭ اسكەري كوميسسارياتىنداعى بارلىق قۇجاتتاردى اقتارىپ شىققانبىز. سول كەزدەگى باعاناتىدا 42 ءۇي بولسا, سول جەردەن 48 ادام اسكەرگە شاقىرىلىپتى. اتى-جوندەرىن دە اتاپ بەردى. سونىڭ 10-ى حابارسىز كەتكەن ەكەن», دەدى ول. زەردەلەۋ بارىسىندا سونىڭ ىشىندە پارتيزاندار بولعانى انىقتالعان. ساۋلە زەينوللاقىزى ولاردىڭ كىم ەكەندەرىن دە اتاپ بەردى. سولاردىڭ ىشىندە جيانشا ەسىمسەيىتوۆ دەگەن ءبىر جاۋىنگەر سلوۆەنيا ماڭىنداعى پارتيزان وتريادىندا بولعانى انىقتالعان. كاسسە سەبەرو وسى شىعار دەپ جۇرسە – ول يتاليانىڭ تريەست قالاسىنىڭ ماڭىندا جەرلەنگەن بولىپ شىقتى. سلوۆەنيا مەن يتاليانىڭ جەرى جاپسارلاس بولعانىمەن بۇل جاۋىنگەردىڭ زيراتى تابىلعاننان كەيىن كاسسە سەبەرونىڭ بۇل ەمەس ەكەندىگى انىقتالعان.
ءسويتىپ كاسسە سەبەرونىڭ تۋىستارى تابىلماي, رەجيسسەردىڭ قىزىلجار وڭىرىندەگى جولى بولىڭقىرامادى.
سولتۇستىك قازاقستان وبلىسى