"قازترانسويل" اق قازاقستاننىڭ مەديتسينالىق مەكەمەلەرى ءۇشىن 68 ستاتسيونارلىق كوپ فۋنكتسيونالدى وكپەنى جاساندى جەلدەتۋ اپپاراتتارىن ساتىپ الىپ بەردى, دەپ حابارلايدى Egemen.kz.
بۇل ماقساتتا كومپانيا دەمەۋشىلىك كومەك رەتىندە 1 ملرد تەڭگە قاراجات ءبولدى. بۇل قاراجاتقا كوروناۆيرۋستىق پنەۆمونيامەن جانە باسقا دا تىنىس الۋ جۇيەسى اۋرۋلارىن ەمدەيتىن, ەۋروپادا شىعارىلعان ءوجج اپپاراتى ساتىپ الىندى. جابدىق ءوجج اپپاراتتارى جەتپەي تۇرعان 14 وبلىستىق جانە 3 رەسپۋبليكالىق ماڭىزى بار قالانىڭ ەمحانالارىنا تۇسەدى. مەديتسينالىق مەكەمەلەردىڭ ءتىزىمى دەنساۋلىق مينيسترلىگى جانە جەرگىلىكتى اتقارۋشى ورگاندار ۇسىنعان دەرەكتەردىڭ نەگىزىندە جاسالدى جانە قازىرگى تاڭدا 42 ءوجج اپپاراتىن الۋشىلار ايقىندالدى.
كومپانيا قىزمەتكەرلەرىنىڭ اپپاراتتى تاپسىرۋ شاراسى جاڭاوزەن كوپبەيىندى قالالىق اۋرۋحاناسىندا ءوتتى.
"بۇگىن ءبىز "قازترانسويل" كومپانياسى اتىنان دەمەۋشىلىك كومەك رەتىندە 2 اپپاراتتى جاڭاوزەن قالاسىنداعى اۋرۋحاناعا تاپسىردىق. اپپاراتتار ناۋقاستاردىڭ تەز ەمدەلىپ شىعۋىنا كومەكتەسەدى دەپ سەنەمىز", - دەدى تاپسىرۋ راسىمىندە "قازترانسويل" اق ماڭعىستاۋ مۇناي قۇبىرى باسقارماسى باستىعىنىڭ ورىنباسارى سالامات يسمۋرزين.
جاڭاوزەن قالالىق كوپبەيىندى اۋرۋحاناسىنىڭ ديرەكتورى مىندەتىن اتقارۋشى جاڭاباي وڭايباەۆ بۇگىندە 360 ورىنعا ەسەپتەلگەن اۋرۋحاناعا مۇنداي جابدىقتاردىڭ اسا قاجەتتىلىگىن اتادى.
"كەشەگىدەي ىندەت ورشىگەن ۋاقىتتا ءبىرىنشى كەزەكتە وكپەنى جاساندى جەلدەتۋ اپپاراتتارىنىڭ اسا كەرەك بولعانىن كوردىك. شۇكىر, كوپتەگەن كومپانيالار دەمەۋشىلىك كورسەتۋدە, سولاردىڭ ءبىرى رەتىندە "قازترانسويل" كومپانياسىنا راحمەت ايتامىز. ارينە قازىر ءتۇرلى بولجامدار ايتىلۋدا, دەگەنمەن ىندەتتىڭ ەكىنشى تولقىنى قايتالانباسىن دەپ تىلەيمىز. قالاي بولعاندا دا ناۋقاستاردى ەمدەۋدە وسى اپپاراتتاردىڭ كومەگى زور", - دەدى ول.
"قازترانسويل" اق قىزمەتكەرلەرىنىڭ ايتۋىنشا, الماتى قالاسىنىڭ ورتالىق قالالىق كلينيكالىق اۋرۋحاناسى, قالالىق جەدەل شۇعىل كومەك كورسەتۋ اۋرۋحاناسى جانە №4 قالالىق كلينيكالىق اۋرۋحانا ءبىر ءوجج اپپاراتىنان الدى. سونداي-اق قاجەت جابدىقتار نۇر-سۇلتان, اقتوبە, قاراعاندى, تەمىرتاۋ, قوستاناي, جەتىقارا, رۋدنىي جانە ليساكوۆسك مەديتسينالىق مەكەمەلەرىنە جىبەرىلدى جانە ءوجج اپپاراتتارىمەن باتىس قازاقستان, سولتۇستىك قازاقستان, تۇركىستان جانە جامبىل وبلىستارىنىڭ اۋرۋحانالارى جاراقتاندىرىلاتىن بولادى. ال قىركۇيەكتە پاۆلودار جانە ەكىباستۇز مەديتسينالىق مەكەمەلەرىنە جەتكىزۋ جوسپارلانىپ وتىر. قالعان 24 ءوجج اپپاراتى اتىراۋ, شىعىس قازاقستان, الماتى, اقمولا جانە قىزىلوردا وبلىستارىنا بولىنەدى.