«رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ (ققدي) ساراپشىلارى مەملەكەت باسشىسىنىڭ حالىققا ارناعان جولداۋىنداعى نەگىزگى باعىتتاردىڭ قوعامنىڭ دامۋى مەن سانانىڭ جاڭعىرۋىنا قالاي اسەر ەتەتىندىگى جونىندە پىكىرلەرىن ءبىلدىردى.
«رۋحاني جاڭعىرۋ» ققدي باسقارماسىنىڭ توراعاسى دانيار ەسيننىڭ پىكىرىنشە, جولداۋ مەملەكەتتىك باسقارۋ جۇيەسىندەگى جاڭا شەشىمدەردىڭ كاتاليزاتورى بولۋى ءتيىس. بيىل كوپتەگەن باعىتتارداعى قۇندىلىقتار قايتا قاراستىرىلعان جىل بولدى. حالىققا ارناعان جولداۋىندا مەملەكەت باسشىسى داعدارىستان شىعۋ شارالارىنا, مەملەكەتتىك اپپارات جۇيەسىن جەتىلدىرۋگە جانە قازاقستاندىقتاردىڭ الەۋمەتتىك جاعدايىن جاقسارتۋعا ەرەكشە نازار اۋدارعان.
«باستى نازار اۋداراتىن نارسە – بارشا ازاماتتاردىڭ بەلسەندىلىگى مەن سانامىزدىڭ جاڭعىرۋىن قامتاماسىز ەتۋ. بارلىق شەشىمدەر حالىقتىڭ قاجەتتىلىگىنەن تۋىنداپ وتىر. اتاپ ايتقاندا, شاعىن جانە ورتا بيزنەستى قولداۋ, ايماقتاردى دامىتۋ, باسپانا ماسەلەسى سىندى الەۋمەتتىك كومەك, وتباسىلىق-دەموگرافيالىق جاعدايدى جاقسارتۋ, ءبىلىم دەڭگەيىن كوتەرۋ, ەكولوگيالىق ساۋاتتىلىقتى ارتتىرۋ كەلەلى ماسەلەلەردىڭ بارلىعى قامتىلعان. وسىلاردىڭ بارىنەن ازاماتتىق قوعام مەن مەملەكەت اراسىنداعى بايلانىستىڭ كۇشەيىپ كەلە جاتقانىن كورۋگە بولادى. سوندىقتان بۇلاردىڭ بارلىعىن بىرلەسە وتىرىپ شەشۋىمىز كەرەك», دەدى د.ەسين.
قاسىم-جومارت توقاەۆ الداعى جىلدارداعى مەملەكەتتىك دامۋىنىڭ نەگىزگى ماقساتتارىن ايتىپ ءوتتى. «رۋحاني جاڭعىرۋ» ققدي قوعامدىق پروتسەستەردى زەرتتەۋ ورتالىعىنىڭ جەتەكشىسى گاۋھار مىساەۆانىڭ پىكىرىنشە, جولداۋ ازاماتتاردىڭ بارلىق سىندارلى ماسەلەلەرىنە دەر كەزىندە نازار اۋداراتىن «حالىق ۇنىنە قۇلاق اساتىن مەملەكەت» كونتسەپتسياسىنىڭ نەگىزىندە قۇرىلدى.
«جولداۋ بارلىق سالانى قامتىعان ءارى تەرەڭدەتە ءتۇسىندىرىلىپ, ناقتى قادامدارى كورسەتىلگەن. قازاقستاندىق قوعامنىڭ ەۆوليۋتسيالىق وزگەرۋ باعىتى, كوروناكريزيستەن قۇتقارۋ جولدارى, عالامدىق ترەندتەردىڭ اق-قاراسىن اجىراتۋ ماسەلەلەرى دۇرىس كوتەرىلگەن. جالپى, جولداۋ «حالىق ۇنىنە قۇلاق اساتىن مەملەكەت» تۇجىرىمداماسىنىڭ جالعاسى رەتىندە قوعامنىڭ تۇيتكىلدى ماسەلەلەرىن شەشۋگە تۇرتكى بولۋى ءتيىس», دەدى گ.مىساەۆا.
ساراپشىلاردىڭ پىكىرىنشە, بارلىق ازاماتتاردىڭ الەۋمەتتىك جاعدايىن جاقسارتۋعا باعىتتالعان جاڭا ەكونوميكالىق باعىتقا دا ەرەكشە نازار اۋدارعان ءجون. ول 7 قاعيدادان تۇرادى: يگىلىكتەر مەن مىندەتتەمەلەردى ادىلەتتى ءبولۋ, شاعىن جانە ورتا بيزنەستى قولداۋ, ءادىل باسەكەلەستىك, ەكونوميكانىڭ تەحنولوگيالىعى, ادام كاپيتالىنىڭ دامۋى, جاسىل ەكونوميكا, مەملەكەتتىك شەشىمدەردىڭ دالەلدىلىگى جانە قوعام الدىنداعى جاۋاپكەرشىلىك. جولداۋعا ءۇن قوسقان «جاستار» عىلىمي-زەرتتەۋ ورتالىعىنىڭ ديرەكتورى ايان ساكوشەۆ پرەزيدەنتتىڭ تاپسىرمالارى تەز ءارى ناقتى شەشىمدەردى قاجەت ەتەتىنىن ايتتى.
«كوروناۆيرۋستان كەيىنگى داعدارىس بۇگىندە قوعامنىڭ قاي سالاسىندا بولماسىن جاڭا وزگەرىستەردى قاجەت ەتەتىنىن كورسەتىپ جاتىر. بۇل مەملەكەتتىك باسقارۋعا دا قاتىستى. سوندىقتان مەملەكەت باسشىسىنان قوعامدى الاڭداتقان بارلىق ساۋالدارعا جاۋاپ الىپ, ناقتى شەشىم جولدارىن بىلدىك. سونداي-اق الەۋمەتتىك ماڭىزدى سالالاردى قولداۋ جۇمىستارى ودان ءارى جالعاساتىندىعى دا قۋانتادى», دەدى ا.ساكوشەۆ.
جولداۋدا قوعامدىق كەلىسىم مەن حالىقتىڭ الەۋمەتتىك جاعدايىنا دا ەرەكشە كوڭىل بولىنگەن. ولاردىڭ اراسىندا ازاماتتىق قوعامنىڭ 2025 جىلعا دەيىنگى دامۋ كونتسەپتسياسىن جاساۋ ماسەلەسى بار. ەستەرىڭىزگە سالا كەتەيىك, پرەزيدەنت ەلىمىزدەگى ءار التىنشى وتباسىنىڭ بالاعا زار بولىپ جۇرگەنىن ايتىپ, اجىراسۋلاردىڭ 20 پايىزعا جۋىعى سونىڭ كەسىرىنەن بولاتىنىن اتاپ ءوتتى.
«وتباسىلىق ساياسات تۇرعىسىنان العاندا ءبىرىنشى كەزەكتە وتباسىلىق-دەموگرافيالىق جاعدايدى كوتەرۋ ماسەلەسىن قولدايمىن. وسىعان وراي «اڭساعان ءسابي» باعدارلاماسى ەلىمىزدەگى بالاعا ءزارۋ وتباسىلارعا ۇلكەن كومەك بولادى دەپ سەنەمىن», دەدى وسى ورايدا «رۋحاني جاڭعىرۋ» ققدي وتباسىلىق ينستيتۋتتى زەرتتەۋ ورتالىعىنىڭ جەتەكشىسى ايگەرىم ءاشىموۆا.