ءبىر جىل تاعاتسىزدانا كۇتكەن جەڭىس!

تەلەديداردان بولعان ويىندى سۋرەتتەپ قايتەمىز, كوپشىلىگىڭىز تىكەلەي ەفيردەن كورىپ الدىڭىزدار دەپ ويلايمىن. سوندىقتان بۇل جولى تەك ءتۇرتىپ العانىمىزدى جانە ويىن ستاتيستيكاسىن نازارلارىڭىزعا ۇسىنىپ وتىرمىز.

 

– بۇرىن قۇرامانى «استانا» فۋتبولشىلارىنسىز ەلەستەتۋ مۇمكىن ەمەس ەدى. ءتىپتى, قايبىر جىلدارى نەگىزگى قۇرامعا 7-8 ويىنشى ەلوردالىق ۇجىمنان شىعاتىن ەدى. بۇگىن پەرتسۋحتان باسقا استانالىقتاردى كورگەنىمىز جوق. ناتيجەسىندە ءبىر جىل تاعاتسىزدانا كۇتكەن جەڭىسىمىزگە قول جەتكىزدىك.

 

– بۇل كەزدەسۋدىڭ ۇزدىك ويىنشىسى باۋىرجان يسلامحان دەپ تانىلدى. ماعان سالسا, ۇزدىكتەر قاتارىنا سول قاپتالداعى قورعاۋشى ءنۇرالى ءالىپتى قوسار ەدىم. 20 جاسار اقتاۋلىق اياقدوپ شەبەرى كادىمگىدەي الاڭدا سەنىمدى وينادى. اراسىندا شابۋىلعا ارالاسىپ, ءبىر-ەكى فۋتبولشىنى دا الداپ ءوتىپ ءجۇردى. ءوز مىندەتىن ابىرويمەن اتقارىپ, ليتۆا قۇراماسىنىڭ شابۋىلشىلارىن تىرپ ەتكىزبەدى.

 

– ءنۇرالى الىپتەن بولەك, بىزگە جيەن بولىپ كەلەتىن (شەشەسى قازاق) مارات بىستروۆ, يان ۆوروگوۆسكي, گافۋرجان سۇيىمباەۆتىڭ ويىندارىنا جوعارى باعا بەرۋگە بولادى.

 

– ءبىرىنشى تايمدا گول سوعىپ العانىمىز قانداي جاقسى بولدى. ايتپەسە, ليتۆالىقتار ويىننىڭ 46-70 مينۋتتارىندا گول بولادى-اۋ دەگەن التى بىردەي قاۋىپتى سوققى جاسادى. بىردە قاقپادان ءسال عانا قيىس كەتسە, بىردە قورعاۋشىلار ءوز مىندەتتەرىن ابىرويمەن اتقارا ءبىلدى. ءۇش رەت «قايرات» قاقپاشىسى ستاس پوكاتيلوۆ «سەيۆ» جاسادى.

 

– 82 مينۋتتا ويىنعا ارالاسقان يسلامبەك قۋات اراعا 3 مينۋت سالىپ ەسەپتى ەسەلەدى. گول سوققانعا دەيىن قۋات ءبىر عانا سوققى جاساعان ەدى. ەكىنشى سوققىسى گولعا اينالىپ, قاقپانىڭ «توعىزدىعىنان» كىردى.

 

– قۇرامىندا قانشاما مىقتىلار جينالعانىمەن, باپكەردىڭ قۇرعان تاكتيكاسى «شيكى» بولسا, وندا جەڭىستى ۇمىتا بەرۋگە بولادى. قازاقستان قۇراماسىنىڭ باس جاتتىقتىرۋشىسى ەكىنشى تايمدا ەكى ويىنشىنى دەر كەزىندە, ءدال ۋاقىتىندا الماستىردى. ابات ايىمبەتوۆ بىرنەشە شابۋىل جاساپ, قورعاۋشىلار مەن قاقپاشىنى ابىگەرگە تۇسىرسە, يسلامبەك قۋات ەكىنشى گولدىڭ اۆتورى اتاندى.

 

– قازاقستان قۇراماسى 3-4-3 جۇيەسى بويىنشا الاڭعا شىقتى. شابۋىل وتىندە جۇرگەن زاينۋتدينوۆ پەن يسلامحان ءوز كلۋبتارىندا جارتىلاي قورعاۋشى, سۇيىمباەۆ جارتىلاي قورعاۋشى نە قورعاۋشى قىزمەتىن اتقارادى.

 

– ليتۆا قۇراماسى سوڭعى 10 ويىندا 1 رەت جەڭىسكە جەتىپ, 2 رەت تەڭ تۇسكەن. دوپ ايىرماشىلىعى – 5:25. ولار سوڭعى رەت (19.11.2019 ج.) جاڭا زەلانديا قۇراماسىن (جولداستىق كەزدەسۋ) 1:0 ەسەبىمەن جەڭگەن.

 

– قازاقستان ۇلتتىق قۇراماسى سوڭعى 10 ويىندا 3 رەت جەڭىسكە جەتىپ, 1 رەت تەڭ تۇسكەن. دوپ ايىرماشىلىعى – 12:17. جەرلەستەرىمىز سوڭعى رەت (16.11.2019 ج.) ەۋرو-2020 ىرىكتەۋ اياسىندا وتكەن ماتچتا تۇزدە سان-مارينو فۋتبولشىلارىنان 3:1 ەسەبىمەن باسىم ءتۇستى.

 

– ەكى قۇراما ءوزارا ءبىر رەت كەزدەسىپ (جولداستىق كەزدەسۋ), 1:1 ەسەبىمەن تەڭ تارقاسقان.

 

– قازاقستان قۇراماسى ۋەفا ۇلتتار ليگاسى س سەبەتىنىڭ 4-توبىندا مىنا كوماندالارمەن ءوزارا مىقتىنى انىقتايدى: بەلارۋس, البانيا جانە ليتۆا. وسى جەڭىسىنەن كەيىن قازاقستان قۇراماسى البانيا كومانداسىمەن 1-2-ورىندى ءبولىسىپ تۇر. الباندىقتار دا تۋرا ءبىز سەكىلدى تۇزدە بەلارۋس كومانداسىنان 2:0 ەسەبىمەن باسىم ءتۇستى.

 

– فيفا رەيتينگىسىندە قازاقستان ۇلتتىق قۇراماسى – 121, ليتۆا قۇراماسى – 132-ورىندا.

 

ويىن ستاتيستيكاسى:

 

ليتۆا – قازاقستان – 0:2 (0:1)

 

گول سوققاندار: زاينۋتدينوۆ, 5 – 0:1; قۋات, 85 – 0:2.

 

دوپتى يەلىك ەتۋ – 54% – 46%; سوققى – 16:10; ءدال سوققى– 3:5; بۇرىشتاما – 3:2; وفسايد – 1:2; ويىنشى الماستىرۋ – 3:3; سارى قاعاز – 4:2.

 

ەسكەرتۋ (سارى قاعاز): پاليونيس, 22 ميكوليۋناس, 33, سيرگەداس, 45+1, باراۆيكاس, 82 – مالىي, 42, ابىكەن, 69.

 

ليتۆا:

قاقپاشى – بارتكۋس;

قورعاۋشىلار – ميكوليۋناس, پاليونيس, گيردۆاينيس, باراۆيكاس (ۆەربيتسكاس 82), شيمكۋس;

جارتىلاي قورعاۋشىلار – كازلاۋسكاس, سيرگەداس (داپكۋس 89), ۆوروبيوۆاس, لاسيتسكاس;

شابۋىلشى – چەرنىح (لاۋكجياميس 46).

باس جاتتىقتىرۋشى: ۆ.ۋربوناس.

 

قازاقستان:

قاقپاشى – پوكاتيلوۆ;

قورعاۋشىلار – ماروچكين, مالىي, ءالىپ;

جارتىلاي قورعاۋشىلار – بىستروۆ, ابىكەن, پەرتسۋح (قۋات 82), ۆوروگوۆسكي;

شابۋىلشىلار – زاينۋتدينوۆ (فەدين 30), يسلامحان (ايىمبەتوۆ 70), سۇيىمباەۆ.

باس جاتتىقتىرۋشى: م.بيلەك.