قىزىلوردا وبلىسى سىرداريا اۋدانىنىڭ كەزەكشى بولىمىنە ن. ءىلياسوۆ اۋىلىنىڭ تۇرعىنىنان 25 تامىز كۇنى قوراسىنان 1 باس جىلقىسىن ۇرلانعانى تۋرالى ارىز كەلىپ ءتۇستى, - دەپ حابارلايدى Egemen.kz.
جەدەل-ىزدەستىرۋ شارالارى بارىسىندا پوليتسيا قىزمەتكەرلەرى 38 جاستاعى وبلىس ورتالىعىنىڭ تۇرعىنىن ۇستادى.
وسى فاكتىگە قاتىستى قازاقستان رەسپۋبليكاسى قىلمىستىق كودەكسىنىڭ 188/1-بابى 3-بولىگىنە سايكەس سوتقا دەيىنگى تەرگەۋ جۇرگىزىلۋدە. قازىر كۇدىكتى قاماققا الىندى.
– مال ۇرلىعى قىلمىستارىنىڭ تىركەلۋى بىلتىرعى جىلمەن سالىستىرعاندا 37,4 پايىزعا ياعني 230-دان 144-كە تومەندەدى. دەگەنمەن, مال ۇرلىقتارىنىڭ جاسالۋى ءالى دە ازايماي وتىر. وبلىس بويىنشا مال ۇرلىعىمەن اينالىسقان جالپى 67 ادامنان, ونىڭ ىشىندە 13 قىلمىستىق توپ قۇرىقتالىپ, سول توپتار جاساعان 43 ەپيزود قۇرايتىن قىلمىستارى اشكەرەلەندى.
مال ۇرلىعىنىڭ ءوسىم الۋىنىڭ بىردەن - ءبىر سەبەبى ازاماتتاردىڭ مالدىڭ جوعالعانى تۋرالى كەش حابارلاۋى بولۋدا.
مال يەلەرى وزدەرىنىڭ مالدارىن جوعالعانىن بايقاسا دا پوليتسياعا حابارىن بەرمەي, كومەگىنە جۇگىنبەي ءوز بەتىنشە ىزدەيدى, قىلمىس ورىن العان ساتتەن ارادا ءبىراز ۋاقىت ءوتىپ, ۇرلانعان مال مەن وعان قاتىستى تۇلعالاردى ىزدەستىرۋدى جەڭىلدەتەتىن ماڭىزدى ايعاقتار مەن ىزدەر جوعالىپ كەتەدى, – دەدى وبلىستىق پوليتسيا دەپارتامەنتىنىڭ باستىعى بەكتورە سۇلتان.