قىرعىز باۋىرلارىمىز وسىدان بەس جىل بۇرىنعى وقيعاعا قايتادان ۇرىنىپ وتىر. ەكونوميكالىق جاعىنان كەنجە قالعان ەل ءۇشىن ونىڭ وڭاي سوقپاسى ايتپاسا دا تۇسىنىكتى. وسىلايشا جاپپاي قارسىلىق اكتسياسىنا شىعۋىنىڭ ءوزى قيىن تۇرمىسپەن دە بايلانىستى ەكەنىندە داۋ جوق.
مىنە, وسى ماسەلەگە بايلانىستى مەملەكەت باسشىسى ن.نازارباەۆ تا ءوز باعاسىن بەرگەن بولاتىن. وندا ەلباسى قىرعىزداردىڭ الدىمەن ەلدىڭ تۇرمىسىن جاقسارتۋدىڭ ورنىنا ساياساتپەن اينالىسىپ كەتكەندىگىنە نازار اۋدارعان-تىن. وسى تۇرعىدان كەلگەندە كورشىلەرىمىز قازاقستاننان ۇلگى الۋلارى كەرەك ەدى. ياعني, الدىمەن ەكونوميكانى وڭداپ بارىپ ساياساتقا كىرىسۋلەرى ءتيىس بولاتىن. وسىمەن ەكىنشى رەت قايتالانعان وقيعا شىنىمەن دە حالىققا اۋىر ءتيىپ وتىر. اۋىزبىرشىلىك پەن تۇراقتىلىق قانا ەلدى ۇشپاققا شىعارا الادى. ەلدىڭ ەكىگە جارىلۋى دا جاقسى كورىنىس ەمەس.
ارينە, جاعدايدىڭ بۇلاي قالىپتاسۋى قيىنشىلىقتار اكەلەرى ءتۇسىنىكتى دە. اسىرەسە, بۇل قاراپايىم ادامدار ءۇشىن قيىن. جاستاردىڭ كوشەگە شىعىپ دۇكەندەر مەن وزگە دە قىزمەت كورسەتۋ ورىندارىن قيراتۋىنا جول بەرىلمەۋى ءتيىس ەدى. ويتكەنى, قيراعان, ورتەلگەن دۇنيەلەردى ولار قوسىمشا قارجى شىعارىپ, ءبارىبىر وزدەرى جوندەۋىنە تۋرا كەلەدى. قانشاما اقشالاي, ۋاقىتتاي شىعىن. ونىڭ ۇستىنە قىرعىز اعايىندار وسىنداي جولمەن بيلىكتى الماستىرۋعا ادەتتەنىپ العانداي اسەر قالدىرادى. ولار مىنا بيلىكتى اۋىستىرساق, جاقسى پرەزيدەنت نەمەسە ۇكىمەت كەلەدى دەپ ويلايدى. نەگىزىندە رەۆوليۋتسيالىق ءىس-ارەكەتتەر ەشقانداي جاقسىلىقتار اكەلمەيتىنىن ۋاقىتتىڭ ءوزى كورسەتتى.
قازاقستانداعى ورنىقتى ەكونوميكا مەن ۇستانعان دۇرىس ساياسات ونداي كەلەڭسىزدىكتەرگە جول بەرمەيدى دەپ ەسەپتەيمىن. قاراپ وتىرساق, قىرعىز باۋىرلارىمىز ءوز ەلىندە ەكى قولعا ءبىر جۇمىس تابا الماعاندىقتان, ءبىزدىڭ ەلىمىزگە كەلىپ ناپاقاسىن ايىرۋعا ءماجبۇر. ول-ول ما, ءتىپتى ءوز وتباسىلارىن تاستاپ, رەسەي جانە وزگە دە ەلدەرگە اسىپ جاتقان قىرعىزستاندىق ازاماتتار قانشاما. جاعدايدىڭ بۇلايشا قالىپتاسۋى زاڭدىلىق, ءويتكەنى, بيلىككە كەلگەندەر حالىقتى ويلاماي وتىر.
باۋىرلاس ەكى حالىق قيىن جاعدايلاردا قاشاندا ءبىر-بىرىنە قولۇشىن سوزىپ كەلگەن. سونداي يگى ءۇردىستى ۇستانا وتىرىپ, ءبىز دە كورشى باۋىرلارىمىزعا كومەك كورسەتۋىمىز دۇرىس دەپ سانايمىن.
حۋساين ۆاليەۆ, پارلامەنت سەناتىنىڭ دەپۋتاتى.