مارافونشى قاريا

ادەتتە سپورتشىلاردىڭ سپورتتىق ءومىرى قىسقا بولاتىنى بەلگىلى. دەگەنمەن, بۇل قاعيدانى بۇزىپ, ادام ورگانيزمىنىڭ مۇمكىندىگى وراسان زور ەكەنىن ىسىمەن دالەلدەپ جۇرگەندەر دە جوق ەمەس. ءبىز بۇعان دەيىن سولتۇستىكقازاقستاندىق گىر كوتەرۋشىلەر – بىرنەشە دۇركىن الەم چەمپيو­نى, 10 رەت الەمدىك رەكوردتى جاڭارتىپ, 58 جاسىندا گيننەستىڭ رەكوردتار كىتابىنا ەنگەن ۆيكتور سايكو جانە 63 جاسىندا رەسەيدىڭ ارحانگەلسك قالاسىندا ءبىر مەزگىلدە وتكەن الەم, ەۋروپا جانە ازيا بىرىنشىلىكتەرىندە جەڭىسكە جەتىپ, ءبىر ءوزى 12 مەدال الىپ كەلگەن ەرىك نۇرپەيىسوۆ تۋرالى جازعان بولاتىنبىز. ەلىمىزگە تانىمال مارافونشى, سپورت شەبەرى, 43 جاستاعى جەلاياق اسكەر قوجانوۆ تا رەسپۋبليكالىق جانە حالىقارالىق مارافوندار مەن ۋلترا مارافونداردان ءبىر قالىپ كورگەن ەمەس. قازىبەك اعانى دا سولاردىڭ قاتارىنا جاتقىزۋعا بولادى.

بۇگىنگى تاڭدا 66 جاستى ەڭسەرگەن قازى­بەك كاكىم ۇلى اققايىڭ اۋدانىنداعى ارا­لاعاش اۋىلىندا تۋعان. الدىمەن اۋىل مەكتەبىندە ءبىلىم الىپ, ارتىنان پەترو­پاۆل­داعى پەداگوگيكالىق ۋچيليششەدە وقۋىن جالعاستىرعان. بىراق ەڭبەك جولىن مەك­تەپتە ەمەس, شارۋاشىلىقتا باستاپ, اندرەەۆكا جانە امانگەلدى كەڭ­شا­ر­لارىندا بريگادير بولادى.

«مەن ۇلدارىمدى ۇياعا قوندىرىپ, قىزدارىمدى قياعا ۇشىرعان باقىتتى جانمىن. ونداعان نەمەرەم مەن شوبەرەم بار. بالا-شاعا ەرجەتكەن سوڭ دەنساۋلىعىمدى تۇزەۋ ماقساتىندا سپورتپەن اينالىسۋعا كىرىستىم. ماقساتىما جەتۋ ءۇشىن وبلىس ورتا­لى­عىنداعى جەڭىل اتلەتيكا ۇيىرمەسىنە بارىپ, جاستارمەن قاتار جاتتىعا باستادىم. اللاعا شۇكىر, بىرنەشە جىلدان كەيىن تاجىريبەلى مارافونشىلارمەن تەڭ دارە­جەدە ناتيجە كورسەتەتىن دەڭگەيگە جەتتىم. ەل اۋماعىندا ۇيىمداستىرىلعان مارا­فون­دارعا قاتىسىپ, ءوزىمنىڭ جاسىمداعىلار توبىندا باعىمدى سىناي باستادىم. بۇگىن­گە دەيىن قول جەتكىزگەن جەتىستىكتەرىمە ريزامىن. دەنساۋلىعىم دا نىعايىپ, جىل سايىنعى تۇماۋ مەن انگينا سياقتى اۋرۋلاردان ءبىرجولا قۇتىلدىم», دەيدى قازىبەك كاكىم ۇلى.

2014 جىلى رەسەيدىڭ ومبى قالاسىندا وتكەن 21 شاقىرىمدىق جارتىلاي مارافوندا ول ءوزىنىڭ جاسىنداعىلار توبىندا ەكىنشى ورىنعا يە بولدى. بۇل – جەرلەسىمىزدىڭ ەڭ ۇزدىك ناتيجەسى. ودان كەيىنگى سايىستاردا دا جاقسى كورسەتكىشتەرگە قول جەتكىزىپ ءجۇر. اتاپ ايتقاندا, 5 مىڭ ادام قاتىسقان حالىقارالىق «Astana Marathon – 2018» جارىسىندا 42,2 شاقىرىمدا 60-69 جاس ارالىعىنداعى سپورتشىلاردىڭ ىشىندە جەرلەسىمىزگە ەكىنشى ورىن بۇيىردى. ءدال سول جىلى ەلوردادا بيىك عيماراتقا جۇگى­رىپ شىعۋ بويىنشا قايىرىمدىلىق شاراسى وتكەن بولاتىن. قاتىسۋشىلارعا 100 مەتر جۇگىرىپ, «Highvill» تۇرعىن ءۇي كەشە­نىنىڭ 34-قاباتىن ەڭسەرۋ قاجەت بولدى. مارا­فونعا جالپى 326 ءوتىنىش تۇسسە, سونىڭ تەك 280-ءى مارەگە جەتتى. ەرلەر اراسىندا ەڭ ەگ­دە قاتىسۋشى بولعان 64 جاستاعى ءبىزدىڭ قازى­بەك اعامىز بۇل قاشىقتىقتى 4 مينۋت 52 سەكۋندتا ەڭسەرىپ, ەكىنشى ورىنعا يە بول­دى.

بۇدان كەيىن ق.بەكەەۆ مەكتەپ بىتىر­گەنىنە 50 جىل تولۋىنا وراي نۇر-سۇل­تان مەن پەتروپاۆل قالالارىنىڭ اراسىن­داعى 503,7 شاقىرىمدىق قاشىقتىقتى ۆەلوسيپەدپەن ءجۇرىپ ءوتۋ جوسپارىنا كىرىستى. وسىعان دەيىن تەك جەڭىل اتلەتيكامەن اينالىسىپ كەلگەن ەگدە جاستاعى ادامعا بۇل وڭايعا تۇسپەسى انىق ەدى. سوندىقتان ەكى ايلىق دايىندىققا كىرىستى.

«بۇل جەردەگى ماقساتىم – ءارى ءوزىمدى سىناپ, ءارى قولدارىنان سمارتفوندارى تۇس­پەيتىن وقۋشىلار مەن جاستارعا ۇلگى كور­سەتۋ. ارينە ويىمدى جۇزەگە اسىرۋ قيىن بولاتىنىن جاقسى ءتۇسىندىم. سەبەبى جەڭىل اتلەتيكا ءبىر باسقا دا, ۆەلوسپورت ءبىر باسقا دۇنيە. ەلوردادا قوناقتاپ جۇرگەنىمدە ۆەلوسپورتتان قازاقستاننىڭ ەڭبەك سىڭىرگەن جاتتىقتىرۋشىسى, بۇگىندەرى زەينەتتىك دەمالىستا جۇرگەن ۆيتالي شيرياەۆ دەگەن ازاماتپەن تانىستىم. ول مەنىڭ ويىمدى ەستىپ, قولدايتىنىن ءبىلدىردى. مامىر ايى­نان باستاپ جاتتىعۋعا كىرىستىم. وتباسى مۇشەلەرىم قارسى بولعانىمەن, الىس جولعا شىقتىم. ءسويتىپ ماقساتىمدى جۇزەگە اسىردىم», دەيدى جەرلەسىمىز.

اڭگىمە بارىسىندا قازىبەك بەكەەۆ الداعى ۋاقىتتا جۇزەگە اسىرۋعا نيەت تانىتىپ وتىرعان جوبالارىمەن دە ءبولىستى. ۇستى­مىزدەگى جىلدىڭ ناۋرىز ايىنان بەرى كورو­نا­ۆيرۋسقا بايلانىستى بارلىق جارىس­تار مەن بۇقارالىق شارالاردىڭ توقتاتىل­عانى بەلگىلى. الداعى ماقساتى – شەكارا اشىلعان سوڭ ۆەلوسيپەدپەن قازاقستاننىڭ بىرقاتار قالاسىن باسىپ ەۋروپا ەلدەرىنىڭ تاس جولىن باعىندىرۋ. قازىرگى ۋاقىتتا جەرلەسىمىز الىس جولعا دايىندىق شارالارىنا كىرىسىپ, دەمەۋشىلەر ىزدەپ ءجۇر.

قانات اتامانوۆ,

جۋرناليست

سولتۇستىك قازاقستان وبلىسى