القيسا قازاقتىڭ اقجۇرەك پەيىلىن اڭگىمەگە ارقاۋ ەتسەڭىز نەدەن باستار ەدىڭىز. جارلىعى جالعىز اتىڭ سويىپ بەرەتىن ادەتىن ايتاسىز با, جوق جاۋىن دا سۇيسىنتكەن جومارتتىعىن جازاسىز با؟ الدە ء"ار قازاق مەنىڭ جالعىزىم" دەپ باز بىرەۋگە جاساعان جاردەمىن جىپكە تىزەسىز بە؟ قالاي دەسەڭىز دە, كوڭىلى داريا حالىقتىڭ باسى بىرىكسە جاقسىلىق جاساۋعا بەيىل كەلەتىنى بىزگە ايان. وعان دالەل بۇگىندە "حارەكەت" قايىرىمدىلىق قورى.
ادام ومىرىندەگى ەڭ يگى ىستەردىڭ ءبىرى – مۇقتاج جاندارعا قامقورلىق جاساۋ. قاراجات "1000 تەڭگەگە – باسپانا" جوباسى اياسىندا جينالادى. رەسپۋبليكا بويىنشا بارلىق وڭىردە قوردىڭ ەرىكتىلەرى جۇمىس ىستەيدى. ولار ءوڭىر بويىنشا مۇقتاج وتباسىلاردى انىقتاپ, ساتىپ الىناتىن باسپانالار بازاسىن دايىندايدى. سونداي-اق ءارتۇرلى ءىس-شارالار ۇيىمداستىرىپ, جينالعان قاراجاتتى ەسەپشوتقا اۋدارىپ وتىرادى.
قايىرىمدىلىق قورىنىڭ نەگىزگى 6 مۇشەسى بار. اتاپ ايتساق, گۇلميرا مۇقانقىزى, العاداي ابىلعازى ۇلى, ارداق بەكزات ۇلى, ازامات ەلۋباي ۇلى, "نۇر-مۇباراك" يسلام ۋنيۆەرسيتەتىنىڭ دوكتورانتى, قوردىڭ كەڭەسشىسى قۋات قابدولدا. مىنە, وسى كوميسسيا كومەككە مۇقتاج ادامنىڭ جاعدايىمەن ءجىتى تانىسىپ شىققان سوڭ بارىپ شەشىم قابىلدايدى. جالپى كومەككە ءزارۋ وتباسىنىڭ جايى 1 اي كولەمىندە تەكسەرىلەدى. سودان سوڭ قوردىڭ قۇرىلتايشىلارى قاتىسقان جالپى جيىندا اقىلداسىپ, كىمدەرگە بەرىلەتىنى شەشىلەدى. ساتىپ الىنعان ءۇي نەمەسە جەر تەلىمى الەۋمەتتىك جەلىدە جاريا تۇردە كورسەتىلەدى.
ماسەلەن بيىل الماتى وبلىسى بويىنشا 18 باسپانا بەرىلگەن. مۇنى قوردىڭ تالدىقورعان ءوڭىرى بويىنشا باسشىسى امانگەلدى تولاميسوۆ اتاپ ءوتتى.
"اقجان جانە ەرنار ەسىمدى ەل ازاماتتارىنىڭ ارقاسىندا 10 پاتەر مۇقتاج جاندارعا تابىستالسا, وسى سوڭعى 4 ايدا 8 وتباسى باسپانا باقىتىنا كەنەلدى. جايىق تازابەك ۇلى, دارىن ءسالىىمجانوۆ, عابيت چۋكەەۆ, تالعات بەيبىت, ەرلان قاسىمحانوۆ جانە ميراس مۇحامەتشارىپ ەسىمدى جىگىتتەر بىزبەن بىرگە بەلسەندى قىزمەت ەتۋدە. وسى قۇرامداعى تالدىقورعاندىق ەرىكتىلەر دە قىرۋار جۇمىستار اتقاردى. ءوڭىر بويىنشا قوردىڭ تانىمالدىلىعى ارتىپ كەلەدى. ءبىز كىلتتى تاپسىرۋ ءۇشىن ارنايى پەكين وليمپياداسىنىڭ جۇلدەگەرى نۇرباقىت تەڭىزباەۆ, ايتىسكەر اقىن جانداربەك بۇلعاقوۆ جانە كاراتەدەن الەم چەمپيونى مەرەي ءسۇيىنوۆ سەكىلدى رەسپۋبليكاعا تانىمال ازاماتتار شاقىردىق", – دەيدى ا.تولاميسوۆ.
يگى ءىس جاساۋدا قايىرىمدى جانداردىڭ ەڭبەگى ەرەن. بەلسەندىلىك تانىتقان جاقسى ادامداردىڭ ارقاسىندا تالاي جىل پاتەر جاعالاپ جۇرگەن وتباسىنىڭ ەندى ءوز باسپاناسى بار. جاقىندا تالدىقورعان قالاسىنداعى "جاستار" ساياباعىندا ەڭبەك ەتەتىن باتىر اناعا شاڭىراق كىلتىن "قارەكەت" قايىرىمدىلىق قورىنىڭ وبلىستاعى مۇشەلەرى جانە ايتىسكەر اقىن, "الاتاۋ" گازەتىنىڭ باس رەداكتورى ايتاقىن بۇلعاقوۆ تابىستادى.
"حارەكەت" قورى ەلىمىزدىڭ بارلىق قالالارى مەن ايماقتارىندا قايىرىمدىلىق ىسىمەن بەلسەندى اينالىسىپ كەلەدى. باتىر اناعا بەرىلگەن باسپانا رەسپۋبليكا بويىنشا 275-ءشى ءۇي.
جىلدار بويى ارمانداعان باسپاناسىنا قول جەتكىزگەن كوپبالالى انا قۋانىشتان كوزىنە جاس الىپ, بارشا قايىرىمدى جانعا العىس ايتتى.
"جىرتىق ءۇيدىڭ قۇدايى بار". جولداسىم ومىردەن وتكەن سوڭ بارلىق جاۋاپكەرشىلىك ءوز موينىما ارتىلدى. تاعدىر وڭاي ەمەس قوي. بۇل بالالارىمنىڭ نەسىبەسى. ەكى قىزىم تۇرمىستا. كەنجەم 4 جاستا. وسىنداي قۋانىش مەنىڭ وتباسىمدا بولىپ جاتقانىنا ءالى دە سەنە الار ەمەسپىن. مەن ءۇشىن توسىنسىي بولدى. ەڭ باستىسى ءۇمىت ۇزبەۋ كەرەك. قايىرىمدىلىق قورىنا, حالقىما مىڭ العىسىمدى بىلدىرەمىن. قۋانىشىمدا شەك جوق", – دەيدى راۋشان مومبەكوۆا.
قايىرىمدىلىق جاساۋ قازاقتىڭ قانىندا ەجەلدەن بار قاسيەت. اسىل ءدىنىمىز دە مۇقتاج جاندارعا جاقسىلىق جاساۋعا بۇيىرادى. ولاي بولسا, جاقسىلىق جاساپ جارىسايىق, اعايىن!