ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook-تەگى پاراقشاسىندا پەداگوگ مارتەبەسىن كوتەرۋ بويىنشا قانداي جۇمىستار اتقارىلاتىنىن مالىمدەدى, دەپ حابارلايدى Egemen.kz
"مەملەكەت باسشىسى قاسىم-جومارت توقاەۆ مينيسترلىككە "پەداگوگ مارتەبەسى تۋرالى" زاڭ نورمالارىن ىسكە اسىرۋ بويىنشا اتقارىلىپ جاتقان جۇمىستاردى جالعاستىرۋدى تاپسىردى. اتالعان قۇجاتتىڭ ماڭىزدى ەرەجەلەرىنىڭ ءبىرى – پەداگوگتى مىندەتىنە جاتپايتىن فۋنكتسيالارعا تارتۋدان قورعاۋ, ورىنسىز ەسەپتىلىكتەن بوساتۋ. بۇل نورمالار جاڭا وقۋ جىلى قارساڭىندا وتە وزەكتى", دەدى ءبىلىم جانە عىلىم ءمينيسترى.
اسحات ايماعامبەتوۆتىڭ ايتۋىنشا, مينيسترلىكتىڭ وسىعان قاتىستى قاتاڭ ۇستانىمدارىنا قاراماستان, وسى ەرەجەلەردى بۇزۋ فاكتىلەرى ءالى دە كەزدەسەتىنىن اتاپ ءوتتى.
"وسىدان بىرنەشە اپتا بۇرىن لەنگىر مەكتەپ-ينتەرناتىندا اكىمشىلىك ءىس قوزعالدى, وندا پەداگوگتەردى لاۋازىمدىق مىندەتتەرىنە كىرمەيتىن جۇمىستارعا تارتقان. ءبىلىم سالاسىندا ساپانى قامتاماسىز ەتۋ دەپارتامەنتى وقيعا ورنىنا بارىپ, قىزمەتتىك تەكسەرۋ جۇرگىزدى. فاكتىلەر راستالدى جانە مەكتەپ ديرەكتورىنىڭ مىندەتىن اتقارۋشى اكىمشىلىك جاۋاپقا تارتىلدى", دەيدى ا.ايماعامبەتوۆ.
ايتا كەتەيىك, تۇركىستان وبلىسىنىڭ كەنتاۋ قالاسىنداعى مولدا مۇسا اتىنداعى مەكتەپتە دە قىزمەتتىك تەكسەرۋ جۇرگىزىلگەن. وندا مۇعالىمدى مەكتەپتى جوندەۋ جۇمىستارىنا تارتقان. اتالعان فاكتىنى تەكسەرۋ بارىسىندا راستالعان. مەكتەپ ديرەكتورىنىڭ مىندەتىن اتقارۋشى دا, كەنتاۋ قالالىق ءبىلىم ءبولىمىنىڭ قىزمەتكەرى دە اكىمشىلىك جاۋاپقا تارتىلعان ەكەن.
سونداي-اق ءبىلىم ءمينيسترىنىڭ اقپاراتى بويىنشا, جالپى وسى قىسقا ۋاقىتتىڭ وزىندە ءبىلىم سالاسىندا ساپانى قامتاماسىز ەتۋ جونىندەگى اۋماقتىق دەپارتامەنتتەرگە جۇزدەن استام ءوتىنىش كەلىپ ءتۇستى. ناتيجەسىندە, لاۋازىمدى تۇلعالارعا دا, وقۋشىلاردىڭ اتا-انالارىنا دا قاتىستى 30-دان استام اكىمشىلىك جازا قولدانىلدى. بۇل جۇمىس تۇراقتى تۇردە جۇرگىزىلەدى. زاڭسىزدىققا جول بەرگەن جاۋاپتى تۇلعالارعا قاتىستى شارالار مۇنىمەن شەكتەلمەيدى. اكىمشىلىك جازالاردان بولەك, جۇمىستان بوساتۋ تۋرالى شەشىمدەر دە قابىلدانعانىن قوسا كەتتى.
"مۇعالىمدەردىڭ قۇقىعىن قورعاۋ – جەرگىلىكتى اۋماقتىق ورگان باسشىلارىنىڭ دا, مەكتەپ ديرەكتورلارىنىڭ دا تىكەلەي مىندەتى. پەداگوگتەردىڭ قۇقىقتارىن قورعاۋ تۋرالى ايتقاندا, مۇعالىمدەر ءوز مىندەتتەرىن ادال ورىنداۋ ماسەلەسىن دە ەستە ساقتاۋى قاجەت. ويتكەنى جاڭا زاڭنىڭ تالاپتارى دا جاڭا. پەداگوگيكالىق قىزمەتپەن اينالىساتىن ءاربىر جان جاس ۇرپاققا ۇلگى بولىپ, ءوز جۇمىسىندا ادامگەرشىلىك قاعيدالارى مەن مورالدىق قۇندىلىقتاردى باسشىلىققا الۋى ءتيىس. مىنەز-ق ۇلىق مادەنيەتى, ادەپتىلىك, ادالدىق, ادامنىڭ ار-نامىسى مەن قادىر-قاسيەتىن قۇرمەتتەۋ – پەداگوگيكالىق ەتيكانىڭ نەگىزى. وسى قاعيدالاردىڭ ساقتالۋىن باقىلاۋ ءۇشىن ءبىز مۇعالىمدەرگە قاتىستى قۇقىقبۇزۋشىلىقتار مەن پەداگوگيكالىق ەتيكانى ورەسكەل بۇزۋ تۋرالى داۋلى ماسەلەلەردى قاراستىراتىن ارنايى القالى ورگان قۇرۋدى قاراستىرۋدامىز. بۇل – پەداگوگيكالىق ەتيكا جانە مۇعالىمدەردىڭ قۇقىقتارىن قورعاۋ جونىندەگى كەڭەس. مۇنداي ينستيتۋت العاش رەت پيلوتتىق رەجىمدە وسى جىلدىڭ تامىز ايىنان باستاپ, نۇر-سۇلتان قالاسىندا جۇمىس ىستەۋدى باستادى. "بولاشاقتا ەتيكا بويىنشا كەڭەستەر ەلىمىزدىڭ بارلىق ايماعىندا قۇرىلا الادى. ولار ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرى جانىندا جۇمىس ىستەيتىن بولادى. بارلىعىمىز مەملەكەتتىك قىزمەتكەرلەردىڭ ادەپ جونىندەگى كەڭەسىنىڭ ءتيىمدى جۇمىسىنىڭ كۋاسى بولدىق. ءبىزدىڭ جاڭادان قۇرىلعان كەڭەستەرىمىزدىڭ قىزمەتى سونىڭ ۇلگىسى بويىنشا ۇيىمداستىرىلادى. مۇنىڭ ءبارى – ۇلكەن باستاما: ءار مۇعالىم ءوزىنىڭ مارتەبەسىن ماقتان تۇتۋى كەرەك. ىڭعايلى جاعدايدا جۇمىس ىستەپ, ساپالى ءبىلىم بەرۋى كەرەك. ويتكەنى ءبىزدىڭ بالالارىمىزدىڭ ءال-اۋقاتى مەن ءبىلىمى ۇستازداردىڭ قولىندا", دەيدى اسحات ايماعامبەتوۆ.