بيىلعى ادەبيەت سالاسى بويىنشا حالىقارالىق بۋكەر سىيلىعى نيدەرلاندىق جازۋشى ماريكا لۋكاس رەينەۆەلدكە بۇيىردى. "جايسىز كەش" (The Discomfort of Evening) رومانى ءۇشىن سىيلىققا لايىق دەپ تانىلعان اۆتور بەدەلدى ماراپات تاريحىنداعى ەڭ جاس لاۋرەات اتاندى. ايتا كەتەيىك, بۇل 29 جاستاعى رەينەۆەلدتىڭ دەبيۋتتىك شىعارماسى.
ماراپاتتاۋ ءراسىمى كارانتيندىك رەجىمگە بايلانىستى لوندوندا ونلاين تۇردە ءوتىپ, لاۋرەات ەسىمىن قازىلار القاسىنىڭ توراعاسى تەد حودجكينسون تىكەلەي ەفيردە جاريالادى. الەمدىك بەستسەللەر قاتارىنا ەنگەن رومان نيدەرلاندىدا 55 مىڭ تيراجبەن باسىلىپ, كەيىن فرانتسۋز, يسپان, كورەي, قىتاي, اراب جانە اعىلشىن تىلدەرىنە اۋدارىلعان. دەبيۋتتىك شىعارماسىنا التى جىل ۋاقىت جۇمساعان اۆتور اۋىر جاعدايعا تاپ بولعان فەرمەر وتباسىن سۋرەتتەيدى.
سىيلىقتىڭ رەگلامەنتىنە ساي رەينەۆەلدكە 50 مىڭ فۋنت ستەرلينگ (65 مىڭ دوللار) سىياقى بەرىلەدى. جانە بۇل قارجىنى شىعارمانى اعىلشىن تىلىندە وقىرمانعا ۇسىنعان ميشەل حاتچيسونمەن ءبولىسۋى شارت. ايتا كەتەيىك, بۋكەر سىيلىعىن تابىستاۋشىلار روماندى اعىلشىنشا سويلەتكەن اۋدارماشىنىڭ سۇبەلى ەڭبەگىن ەرەكشە اتاپ وتكەن ەدى.
ەسكە سالساق, بۋكەر سىيلىعىنىڭ قىسقا شورت-پاراعىندا نيدەرلاندىق رەينەۆەلدتەن بولەك بەس ۇمىتكەردىڭ, ياعني ارگەنتينا, گەرمانيا, يران, مەكسيكا جانە جاپونيا اۆتورلارى باسەكەگە تۇسكەن بولاتىن.
حالىقارالىق بۋكەر سىيلىعى 2004-2016 جىلدار ارالىعىندا ەكى جىلدا ءبىر رەت بەرىلسە, قازىر جىل سايىن تابىستالىپ كەلەدى. 2019 جىلعى سىيلىقتى كانادالىق مارگارەت ەتۆۋد پەن بريتاندىق بەرناردين ەۆاريستو العان ەدى.