كەشە پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن وتكەن پالاتا بيۋروسىنىڭ وتىرىسىندا دەپۋتاتتىق كورپۋستىڭ زاڭ شىعارۋشىلىق قىزمەتىنە قاتىستى ماسەلەلەر قارالدى, دەپ حابارلادى ءماجىلىستىڭ ءباسپاسوز قىزمەتى.
الداعى اپتادا وتەتىن جالپى وتىرىستا دەپۋتاتتاردىڭ تالقىسىنا كەيبىر زاڭنامالىق اكتىلەرگە مۇناي ونىمدەرىنىڭ اينالىمى سالاسىندا مەملەكەتتىك باقىلاۋدى كۇشەيتۋگە قاتىستى زاڭ جوباسىن ءبىرىنشى وقىلىمدا قاراۋ ماسەلەسى ۇسىنىلاتىن بولدى. سونداي-اق, ءبىرىنشى وقىلىمدا اۋە كەڭىستىگىن پايدالانۋ جانە اۆياتسيا قىزمەتى تۋرالى, بىرقاتار زاڭدارعا كولىك ماسەلەلەرى بويىنشا تولىقتىرۋلار ەنگىزۋدى كوزدەيتىن زاڭ جوبالارىن تالقىعا سالۋ كوزدەلىپ وتىر.
ءماجىلىستىڭ جالپى وتىرىسىنىڭ كۇن تارتىبىنە پالاتانىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ ۇسىنۋىمەن كەدەن وداعىنىڭ كەدەندىك اۋماعىندا ءسايكەستىكتى مىندەتتى باعالاۋعا جاتاتىن ءونىمنىڭ اينالىمى تۋرالى, سونداي-اق شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق اقپاراتتىق قاۋىپسىزدىكتى قامتاماسىز ەتۋ سالاسىنداعى ىنتىماقتاستىق تۋرالى كەلىسىمدەردى راتيفيكاتسيالاۋ تۋرالى زاڭ جوبالارى ەنگىزىلەتىن بولدى.
“ەگەمەن-اقپارات”.