بۇگىنگى تاڭدا 100 جىلدىق تاريحى بار باسىلىم "Egemen Qazaqstan" گازەتى 185 مىڭ وقىرماندى قامتىپ وتىر. بۇل تۋرالى اقپارات جانە قوعامدىق دامۋ ءمينيسترى ايدا بالاەۆا قر پرەزيدەنتى تەلەراديوكەشەنىنىڭ YouTube ارناسىنداعى "بالاەۆاعا 3 سۇراق" باعدارلاماسىندا ايتتى, - دەپ حابارلايدى Egemen.kz.
شىلدە ايىنىڭ سوڭىندا اقپارات جانە قوعامدىق دامۋ ءمينيسترى ايدا بالاەۆا "Egemen Qazaqstan" گازەتىنىڭ ديرەكتورلار كەڭەسىنە جانە "قازمەديا ورتالىعى" باقىلاۋشىلار كەڭەسىنىڭ قۇرامىنا ەنگەن بولاتىن. مينيستر "بالاەۆاعا 3 سۇراق" باعدارلاماسىندا مۇنداي شەشىمنىڭ نە سەبەپتى قابىلدانعانى جايىندا ءسوز ەتتى.
"مىندەتتى تۇردە ءار قوسىمشا جۇكتەمەنىڭ ءوزىنىڭ جاۋاپكەرشىلىگى بار. اقپارات مينيسترلىگىن باسقارىپ وتىرعاننان كەيىن ەلىمىزدەگى ەڭ بەدەلدى مەديا قۇرىلىمداردىڭ ىشىندەگى پروتسەستەردى قاداعالاپ وتىرۋ كەرەك. "Egemen Qazaqstan" 100 جىلدىق تاريحى بار باسىلىم, بۇگىنگى تاڭدا 185 مىڭ وقىرماندى قامتىپ وتىر. ەلدە بولىپ جاتقان تىنىس-تىرشىلىكتىڭ بارلىعىن وسى "Egemen Qazaqstan" گازەتىنەن جانە "كازپراۆدا" باسىلىمى ارقىلى بىلۋگە بولادى. "قازمەديا ورتالىعى" 10-نان استام ءىرى باق رەداكتسيالارى شوعىرلانعان ۇلكەن ورتالىق. وسى ەكى ۇيىمنىڭ ىشىندەگى ىشكى پروتسەستەردىڭ بارلىعىن دەر كەزىندە كورىپ وتىرۋ, شەشىم قابىلداۋ, ىشىندەگى كوكەيكەستى ماسەلەلەر بولسا, ونى بىرگە شەشىپ وتىرۋ ءۇشىن وسىنداي شەشىم قابىلداندى. مەنىڭ ويىمشا, بۇل ءداستۇرلى دۇنيە", - دەدى ايدا بالاەۆا.