كەشە استاناداعى ورتالىق كوممۋنيكاتسيالار قىزمەتىندە قاراعاندى وبلىسىنىڭ اكىمى باۋىرجان ابدىشەۆتىڭ رەسپۋبليكالىق بۇقارالىق اقپارات قۇرالدارى وكىلدەرىمەن ءباسپاسوز ءماسليحاتى بولىپ ءوتتى. ادەتتەگىدەي ونى اشىپ, جۇرگىزگەن ورتالىق كوممۋنيكاتسيالار قىزمەتىنىڭ وكىلى التاي ابيبۋللاەۆ ەڭ الدىمەن جۋرناليستەردى بۇل وبلىستىڭ ەرەكشەلىكتەرىمەن تانىستىرىپ ءوتتى.
كەشە استاناداعى ورتالىق كوممۋنيكاتسيالار قىزمەتىندە قاراعاندى وبلىسىنىڭ اكىمى باۋىرجان ابدىشەۆتىڭ رەسپۋبليكالىق بۇقارالىق اقپارات قۇرالدارى وكىلدەرىمەن ءباسپاسوز ءماسليحاتى بولىپ ءوتتى. ادەتتەگىدەي ونى اشىپ, جۇرگىزگەن ورتالىق كوممۋنيكاتسيالار قىزمەتىنىڭ وكىلى التاي ابيبۋللاەۆ ەڭ الدىمەن جۋرناليستەردى بۇل وبلىستىڭ ەرەكشەلىكتەرىمەن تانىستىرىپ ءوتتى.
قاراعاندى وبلىسى – قازاقستانداعى الدىڭعى قاتارلى ءىرى يندۋستريالىق ورتالىق. ونەركاسىپتىك ءوندىرىس تاۋ-كەن-مەتاللۋرگيالىق كەشەننىڭ باسىم دامۋىمەن ەرەكشەلەنەدى. تاماق, فارماتسەۆتيكالىق جانە حيميالىق ونەركاسىپ, جەڭىل ونەركاسىپ جانە قۇرىلىس ماتەريالدارىنىڭ يندۋسترياسى دامىعان. وبلىستىڭ جەر قويناۋى سيرەك كەزدەسەتىن مەتالدارعا باي: ۆيسمۋت, كۇمىس, سۇرمە, تيتان, نيكەل, كوبالت, كورۋند, كۇشالا, ولۋنيت جانە باسقالارى. وبلىس اۋماعىندا رەسپۋبليكاداعى مارگانەتستىڭ 100 پايىزى, مىستىڭ – 36, ۆولفرامنىڭ – 80, موليبدەننىڭ – 64, قورعاسىننىڭ – 54, كومىردىڭ 40-تان استام پايىزى (ونىڭ ىشىندە كوكستەلگەن كومىردىڭ 100 پايىز قورى) شوعىرلانعان.
وبلىس ونەركاسىپ ءونىمىنىڭ 50 پايىزدان استامى «قازاقمىس» كورپوراتسياسى جانە «ارسەلورميتتال تەمىرتاۋ» كومپانيالارى سياقتى ءىرى جۇيە قۇراۋشى كاسىپورىنداردىڭ ۇلەسىنە تيەسىلى.
مۇنان كەيىن ءسوز كەزەگىن العان وبلىس اكىمى باۋىرجان ءابدىشەۆ وبلىستاعى الەۋمەتتىك-ەكونوميكالىق دامۋدىڭ نەگىزگى كورسەتكىشتەرىنە, يندۋستريالىق-يننوۆاتسيالىق باعدارلامانىڭ جۇزەگە اسۋ جايىنا جانە ەلباسى تاپسىرمالارىنىڭ ورىندالۋىنا كەڭىنەن توقتالدى.
سوڭعى ءۇش جىل ىشىندە وبلىس ەكونوميكاسىنا 787,9 ملرد. تەڭگەنىڭ ينۆەستيتسياسى سالىنعان, ونىڭ ىشىندە شەتەلدىك ينۆەستيتسيالار اعىمى 2010 جىلدان بەرى 3 ەسە ارتقان.
– 46 ينۆەستيتسيالىق جوبا ىسكە اسىرىلدى (76 ملرد. 065,7 ملن. تەڭگە), 3,5 مىڭعا جۋىق جاڭا جۇمىس ورىندارى قۇرىلدى. «بيزنەستىڭ جول كارتاسى-2020» باعدارلاماسىن جۇزەگە اسىرۋ بارىسىندا 4 838 ملن. تەڭگە جۇمسالدى. جوبانى جۇزەگە اسىرۋ كەزىندە جالپى قۇنى 63 ملرد. تەڭگەنى قۇرايتىن 292 جوباعا قولداۋ كورسەتىلدى, – دەدى اكىم.
قاراعاندى وبلىسى بويىنشا تۇرعىن ءۇي قۇرىلىسىن دامىتۋدىڭ ايماقتىق باعدارلامالارىن ىسكە اسىرۋ شەڭبەرىندە كەيىنگى 4 جىل ىشىندە (2010-2013 ج.ج.) 976,3 مىڭ شارشى مەتر تۇرعىن ءۇي نەمەسە 8 311 پاتەر سالىنىپ, پايدالانۋعا بەرىلگەن. ونىڭ ىشىندە مەملەكەتتىك قاراجات ەسەبىنەن 247,7 مىڭ شارشى مەتر تۇرعىن ءۇي نەمەسە 4 006 پاتەر سالىنعان.
ءباسپاسوز ءماسليحاتى كەزىندە وبلىس اكىمىنە جۋرناليستەر تاراپىنان كوپتەگەن وتكىر سۇراقتار قويىلدى. سولاردىڭ بىرقاتارى جولداردىڭ جاعدايىنا, اۋىل حالقىنىڭ تۇرمىس-تىرشىلىگىنە قاتىستى بولدى. ماسەلەن, جۋرناليستەردىڭ ءبىرى جىل باسىندا وبلىس اكىمىنىڭ ءوزى باسقارىپ وتىرعان ءوڭىردىڭ بارلىق اۋىلدارىن ارالاپ, ولاردىڭ جاعدايىمەن تولىق تانىسامىن دەپ ۋادە بەرگەندىگىن ەسكە سالا كەلە, «سول ۋادەڭىزدەن شىقتىڭىز با, وسى ۋاقىتقا دەيىن قانشا اۋىلدا بولدىڭىز؟», – دەپ سۇرادى. بۇل سۇراققا وبلىس اكىمى بايىپپەن جاۋاپ بەردى. وبلىستىڭ كولىكتىك ينفراقۇرىلىمى تەمىرجول, اۆتوكولىك, اۋە كولىگى, سونداي-اق اۆتوجول سالاسىن قامتيتىندىعىن, كەيىنگى ءۇش جىلدا وبلىستىڭ جۇك اينالىمىنىڭ كورسەتكىشتەرى 1,5 ەسە, جولاۋشىلار تاسىمالىنىڭ اينالىمى ەكى ەسە ارتقاندىعىن, بۇل كورسەتكىشتەر بويىنشا وبلىستىڭ رەسپۋبليكاداعى الدىڭعى قاتاردا ەكەندىگىن ايتتى. سونىمەن قاتار, وبلىستاعى اۆتوكولىك جولدارىنىڭ جاعدايى ءماز ەمەس ەكەندىگىن, وسىعان وراي جول جوندەۋ جۇمىستارىنىڭ قارقىن العاندىعىن, بىراق وبلىستاعى جول ساپاسىنىڭ جاقسارۋىنا ءالى دە ءبىراز ۋاقىت قاجەت ەكەندىگىن جەتكىزدى. ءوزىنىڭ وبلىستىڭ بارلىق اۋىلدارىن ارالاپ شىعامىن دەگەن ۋادەسىن ەستە ۇستاپ كەلە جاتقاندىعىن, وبلىستا 400-دەن استام اۋىل بار ەكەندىگىن, ءبىر جىلعا تاياۋ ۋاقىتتىڭ ىشىندە سونىڭ 100-دەن استامىندا بولعاندىعىن جەتكىزدى.
قاراعاندى وبلىسىندا بۇقارالىق سپورتتىڭ دامۋى جاقسى جولعا قويىلعان دەۋگە بولادى. سونىڭ ناتيجەسىندە بۇل وبلىستان الەمدىك جەتىستىكتەرگە جەتكەن ەلگە تانىمال سپورت جۇلدىزدارى كوپتەپ شىعۋدا. ماسەلەن, سەرىك ساپيەۆ بوكستان وليمپيادا چەمپيونى اتانسا, گەننادي گولوۆكين كاسىپقوي بوكستان حالىقارالىق قاۋىمداستىقتاردىڭ ەكى نۇسقاماسى بويىنشا الەم چەمپيونى اتانىپ, وسى اتاقتى لايىقتى قورعاپ كەلەدى. مىنە, وسىنداي جۇلدىزدى جىگىتتەردىڭ سپورت سالاسىندا جەتكەن جەتىستىكتەرىن وبلىستاعى جاستارعا پاتريوتتىق تاربيە بەرۋ ىسىنە پايدالانۋ جاعدايى قالاي؟
بۇل سۇراققا دا وبلىس اكىمى لايىقتى جاۋاپ بەرىپ, وبلىستا سپورت سالاسىندا جوعارى ناتيجە كورسەتكەن جاستارعا قامقورلىقتىڭ بار ەكەنىن ايتىپ ءوتتى.
سۇڭعات ءالىپباي,
«ەگەمەن قازاقستان».