ەلىمىزدىڭ قىلمىستىق كودەكسىنە ماسكۇنەم جۇرگىزۋشىلەردى باس بوستاندىعىنان ايىراتىن باپ ەنگىزۋ ماسەلەسى قاراستىرىلۋدا. بۇل تۋرالى «استانا» تەلەارناسى حابارلادى.
قازىرگى قولدانىستاعى قىلمىستىق كودەكس 422 باپتان تۇرادى. جاڭا زاڭ جوباسى نەگىزىندە ونىڭ سانىن ارتتىرۋ كوزدەلگەن. سەبەبى, ول وسى ۋاقىتقا دەيىن بىرنەشە رەت وزگەرىسكە ۇشىراعانىمەن, ءالى دە تولىقتىرۋلاردى قاجەت ەتەدى. باسىم بولىگى قوعامدىق قىلمىستارعا قاتىستى بولىپ وتىر.
«ەگەر جۇرگىزۋشى جول اپاتىن ىشىمدىككە بوي الدىرىپ جاساسا, وندا ول اۋىر قىلمىسقا جاتقىزىلادى. ياعني, ونى بۇرىنعىداي ەكى تاراپتىڭ تاتۋلىعىمەن شەشۋگە بولمايدى. قىلمىستىق كودەكستىڭ جاڭا جوباسى بويىنشا, قازا تاپقان ءار ادام ءۇشىن جۇرگىزۋشىنىڭ باس بوستاندىعى شەكتەلەدى. مىسالى, 1 ادام كوز جۇمسا 7 جىلعا دەيىن, 2 ازامات ءۇشىن 12, ودان كوپ بولسا 15 جىلعا دەيىن تەمىر تورعا قامالادى»,-دەيدى باس پروكۋروردىڭ ءبىرىنشى ورىنباسارى يوگان مەركەل.
جوعارىدا كوتەرىلگەن ماسەلەگە بايلانىستى تۇسىنىكتەمە بەرگەن ىشكى ىستەر ءمينيسترىنىڭ ورىنباسارى ەرلىك كەنەنباەۆ باس بوستاندىعىنان ايرىلعان ازاماتتارعا 95 ۇستاۋ اباقتىسىن اشۋ قاجەتتىگىن مالىمدەدى. دەگەنمەن, ناقتى جۇمىس الداعى ۋاقىتتا شەشىمىن تابادى.
باقىتبەك كەنەش ۇلى.