وبلىستىق پوليتسيا دەپارتامەنتىنىڭ مالىمەتىنشە, ايماققا قاپ تاۋىنىڭ باۋرايىنان بارلىعى 763 اۆتوكولىك اكەلىنىپتى. ونىڭ 450-ءى قايتا تىركەۋدەن ءوتۋى ءتيىس, - دەپ حابارلايدى Egemen.kz .
"بۇگىنگە دەيىن ارمەنيادان اكەلىنگەن 255 كولىك قۇرالى تىركەلدى. تىركەۋگە تۇرعان اۆتوكولىكتەر قازاقستان اۋماعىندا, سونداي-اق ودان تىس جەرلەردە ەركىن ءجۇرىپ, زاڭدى تۇردە جىل سايىنعى تەحنيكالىق تەكسەرۋدەن وتە الادى, سونداي-اق كولىككە سالىناتىن جول سالىعى ءۇشىن تولەم جاساي الادى. كولىكتى ۋاقىتشا تىركەۋ ماسەلەلەرى بويىنشا «جەدەل جەلى» تەلەفونىنا 500-دەن استام ازامات جۇگىندى. قازىر پوليتسيا قىزمەتكەرلەرى ءتۇسىندىرۋ جۇمىستارىن جۇرگىزىپ جاتىر. ماشينالاردى تىركەۋ ءۇشىن ءۇش ءتۇرلى تولەم جاساۋ قاجەت: تىركەۋ ءۇشىن الىم - 695 تەڭگە, تەحنيكالىق پاسپورتتىڭ باجى - 3 473 تەڭگە جانە مەملەكەتتىك نومىرگە تولەنەتىن باج - 7 778 تەڭگە. تولەمنىڭ جالپى سوماسى شامامەن 12 مىڭ تەڭگە بولادى, - دەدى وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى پوليتسيا پولكوۆنيگى نىعمەت يسماعۇلوۆ.
قوستانايلىق كاسىپكەر مىرزاحان سەيىتجانوۆ ارمەنيادان 3 اۆتوكولىك ايداپ اكەلىپتى. بىرەۋىن ءوزى ءمىنىپ, ەكەۋىن ايەلى مەن قىزىنا بەرىپ قويعان. – بۇل كولىكتەر ماعان ارزان ءتۇستى. قۇنى نارىق باعاسىنان تومەن. ۇكىمەتتىڭ قاۋىلىسى شىعا سالىسىمەن, ەلدىڭ الدى بولىپ تىركەۋگە قويدىم. 3 ماشينانى قوسقاندا بارلىعى 36 مىڭ تەڭگە تولەدىم. ەندى ەركىن جۇرە بەرۋگە بولادى. تىركەلۋ مەرزىمى دە اياقتالىپ قالدى. ەكىنشى رەت مۇنداي مۇمكىندىك تۋمايدى, - دەدى م. سەيىتجانوۆ.
ارمەنيادان اكەلىنگەن كولىك قۇرالدارىن تىركەۋ مەرزىمى 1 قىركۇيەكتە اياقتالادى. كولىك قۇرالى تىركەۋدەن وتپەگەن جاعدايدا يەسى قر اقبتك-ءنىڭ 590-بابىنىڭ 2-بولىگى بويىنشا كولىگىن ايىپپۇل تۇراعىنا قويىپ, ءوزى اكىمشىلىك جاۋاپكەرشىلىككە تارتىلادى. تىركەلۋ مەرزىمى ۇزارتىلمايدى.
قوستاناي وبلىسى