الەۋمەتتىك جەلىدە الماتى وبلىسىنىڭ ەڭبەكشىقازاق اۋدانىنا قاراستى بايدىبەك اۋىلىندا جەرگىلىكتى تۇرعىندار جينالىپ, شەرۋ وتكىزگەنى جايىندا حابار تاراعان بولاتىن. وقيعاعا وسى اۋدانداعى اششىساي اۋىلىندا بولعان قىلمىستىق وقيعا تۇرتكى بولعان ەكەن, - دەپ حابارلايدى egemen.kz.
قۇقىق قورعاۋ ورىندارى تاراتقان مالىمەتكە سايكەس, 15 تامىز كۇنى بەلگىسىز بىرەۋلەر وسى اۋىل تۇرعىنىن ءولتىرىپ كەتكەن. دەنەسىنىڭ توعىز جەرىنەن پىشاق جاراقاتىن العان ادام اششىساي اۋىلىنىڭ تۇرعىنى, قوعام بەلسەندىسى نۇرلان احمەتوۆ بولىپ شىقتى. اۋىر جاعدايدا اۋرۋحانا جەتكىزىلگەن ازاماتتىڭ ومىرىنە دارىگەرلەر دە اراشا بولا الماعان. ال مارقۇمدى اقتىق ساپارعا شىعارىپ سالۋعا جينالعان جۇرت بۇعان دەيىن دە قوعام بەلسەندىسىنە بىرنەشە مارتە قاستاندىق جاسالعانىن ايتىپ, ءىستىڭ انىق-قانىعىن تەكسەرۋگە جەرگىلىكتى قۇقىق قورعاۋ ورگاندارىنىڭ ق ۇلىقسىزدىق تانىتىپ وتىرعانىنا نارازىلىق بىلدىرگەن. اۋىل تۇرعىندارىنىڭ ايتۋىنشا, نۇرلان احمەتوۆكە جاسالعان قاستاندىققا وسى اۋداننىڭ بايدىبەك اۋىلىندا تۇراتىن قىلمىستىق توپ مۇشەلەرىنىڭ قاتىسى بولۋى مۇمكىن ەكەن. ال پوليتسيانىڭ تەرگەۋ ىسىنە قاتىستى مالىمەتتەردى اشىق جاريالاماۋى تۇرعىنداردىڭ كوڭىلىندەگى كۇدىكتى ودان ءارى قويۋلاتا تۇسكەندەي. وسى ماسەلەنىڭ جايىن بىلمەك بولعان نارازى توپ بايدىبەك اۋىلىنا كەلىپ, جەرگىلىكتى بيلىك وكىلدەرىمەن كەزدەسكەن ەكەن. اۋىل تۇرعىندارى اشىق اڭگىمەلەسۋدەن كەيىن تارادى.
- كىسى ءولىمى 15 تامىز سەنبىگە قاراعان ءتۇنى بولدى. ەر ادامدى ءوز ۇيىندە بەلگىسىز بىرەۋ پىشاقتاپ كەتكەن. جاراقات العان ازامات شەلەك اۋىلىنىڭ اۋرۋحاناسىنا جەتكىزىلدى, بىراق ونى قۇتقارۋ مۇمكىن بولمادى. ازامات العان جاراقاتىنان قايتىس بولدى. اتالعان فاكتى بويىنشا قىلمىستىق كودەكستىڭ 99-بابىنىڭ 1-بولىگى بويىنشا سوتقا دەيىنگى تەرگەۋ باستالدى. كۇدىكتىلەردى ۇستاۋعا باعىتتالعان جەدەل-تەرگەۋ شارالارى جۇرگىزىلۋدە. جاعداي جەرگىلىكتى اتقارۋشى جانە قۇقىق قورعاۋ ورگاندارىنىڭ باقىلاۋىندا, - دەيدى وقيعاعا وراي رەسمي مالىمدەمە جاساعان الماتى وبلىسىنىڭ پوليتسيا دەپارتامەنتى. قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.