تۇركىستان وبلىسى پوليتسەيلەرى شىمكەنت قالاسىنىڭ تۇرعىندارىنان سينتەتيكالىق ەسىرتكى مەن ەكى كەلىدەن استام ماريحۋانا تاركىلەدى. بۇل تۋرالى Egemen.kz Polisia.kz سايتىنا سىلتەمە جاساپ حابارلايدى.
“كوكنار-2020” جەدەل-پروفيلاكتيكالىق ءىس-شاراسى اياسىندا تۇلكىباس اۋدانى كەلتە-ماشات اۆتوجولىندا تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسى مەن پاترۋلدىك پوليتسيا باتالونىنىڭ قىزمەتكەرلەرى “ۆاز-21099” اۆتوكولىگىن توقتاتىپ, تەكسەردى. جەدەل ۋاكىلدەر اۆتوكولىكتى ءتىنتۋ كەزىندە ەسىرتكى زاتتارى سالىنعان پوليەتيلەن پاكەتتەرىن تاركىلەدى. ال, اۆتوكولىكتىڭ جۇك سالعىشىنان ماريحۋانا سالىنعان قاپ الىندى.
ساراپشىلاردىڭ قورىتىندىسىنا سايكەس , پوليەتيلەن پاكەتتەردە جالپى سالماعى 1,5 گرامم بولاتىن سينتەتيكالىق ەسىرتكى ساقتالعان. ال وسىمدىك تۇپتەرى, قۇرامىندا ەسىرتكى زاتى بار سالماعى 2 كگ-نان اساتىن “كەپتىرىلگەن ماريحۋانا” بولىپ شىقتى. سونداي-اق سايرام اۋدانىندا سينتەتيكالىق ەسىرتكىنى ساتپاق بولعان تاعى ءبىر شىمكەنت قالاسىنىڭ تۇرعىنى ۇستالدى. كۇدىكتىدەن جەدەل ۋاكىلدەر سالماعى ءۇش گراممعا جۋىق سينتەتيكالىق ەسىرتكى سالىنعان ءتورت وراما (پاكەتيك) تاركىلەدى.
"ەكى جاعدايدا دا ءبىز, الفا پيرروليدينو ۆالەروفەنون (نەمەسە الفاPVP) سينتەتيكالىق ەسىرتكىلەرىن تاركىلەدىك", - دەدى تۇركىستان وبلىسى پد باستىعىنىڭ ورىنباسارى قۇرمانبەك ساحوۆ.
بۇل ءبىزدىڭ تاجىريبەمىزدە العاش رەت ورىن الىپ وتىر. ەسىرتكىنىڭ بۇل ءتۇرى سينتەتيكالىق ساناتقا جاتادى, ياعني زەرتحانالىق جاعدايدا, باسقاشا ايتقاندا جاساندى تۇردە وندىرىلەدى. بۇل وتە قاۋىپتى پسيحوستيمۋلياتور. اق نەمەسە قىزعىلت ءتۇستى كريستالدار. مۇنىمەن ەسىرتكىگە تاۋەلدىلىك وتە تەز جۇرەدى. تىنىس الۋ جانە جۇرەك قىزمەتىنە تەرىس اسەر ەتەدى. ال مامانداندىرىلعان كومەكسىز سوڭى ولىمگە اكەلۋى مۇمكىن. ەسىرتكى قىلمىستارىن اشۋ ءۇشىن بىزگە بىرنەشە اي جۇمىس ىستەۋ كەرەك ەكەنىن اتاپ وتكىم كەلەدى. قىلمىستىڭ بۇل ءتۇرى جاسىرىن جۇزەگە اسىرىلادى.
قازىرگى ۋاقىتتا اتالمىش ەسىرتكىلەر شىمكەنتتەن اكەلىنگەنىن انىقتادىق. اتالعان ەكى جايت بويىنشا كۇدىكتىلەر مەگاپوليس تۇرعىندارى بولىپ شىقتى, ولاردىڭ بىرەۋى بۇرىن سوتتى بولعان. ەر ادامدار قاماۋعا الىندى. ۇستالعانداردىڭ بىرىنە قاتىستى قر قك-ءنىڭ 296-بابى (وتكىزۋ ماقساتىنسىز ەسىرتكى, پسيحوتروپتىق زاتتارمەن, ولاردىڭ انالوگتارىمەن زاڭسىز جۇمىس ىستەۋ) بويىنشا سوتقا دەيىنگى تەرگەۋ امالدارى جۇرگىزىلۋدە, ال ەكىنشىسى قر قك-ءنىڭ 297-بابىمەن (ەسىرتكى قۇرالدارىن وتكىزۋ ماقساتىندا زاڭسىز دايىنداۋ, وڭدەۋ, ساقتاۋ, تاسىمالداۋ, جونەلتۋ نەمەسە ساتۋ) تىركەلىپ, قىلمىستىق جاۋاپكەرشىلىككە تارتىلۋدا.
ءوز كەزەگىندە تۇركىستان وبلىسىنىڭ پوليتسەيلەرى ازاماتتاردى ەسىرتكىگە بايلانىستى قىلمىس جاساۋدان ساق بولۋعا, سونداي-اق دەنساۋلىققا زيان كەلتىرەتىن زياندى ادەتتەردەن باس تارتۋعا كەڭەس بەرەدى. ءتارتىپ ساقشىلارى تۇرعىنداردى سپورتپەن شۇعىلدانۋعا جانە سالاۋاتتى ءومىر سالتىن ۇستانۋعا شاقىرادى.