پاندەميا باستالىپ, قوعامدىق قاتىناستىڭ ونلاين ءتۇرى ورنىققالى, ينتەرنەت الاياقتاردىڭ قۇربانىنا اينالعان تۇرعىندار كوپ. ماسەلەن, قوستاناي قالاسىنىڭ تۇرعىنى بالسۇلۋ الەكەنوۆا بانكتەن ەشبىر قارىز الماسا دا, نەسيە وتەۋگە ءماجبۇر بولىپ وتىر, - دەپ حابارلايدى Egemen.kz.
ايتۋىنشا, جاقىندا عانا ول "قازپوشتا" ارقىلى نۇر-سۇلتان قالاسىنداعى قارجى ۇيىمى نوتاريۋسىنان حات العان.
– حاتتا مەنىڭ نۇر-سۇلتانداعى "شاعىن قارجى ۇيىمىنا" 20 كۇن مەرزىمگە 30 مىڭ تەڭگە كولەمىندە نەسيە رەسىمدەگەنىم جازىلىپتى. ءوز باسىم استانا تۇرماق, قوستانايدىڭ وزىندە ەشبىر نەسيە الىپ كورگەن ەمەسپىن. ينتەرنەتتى اقتارىپ وتىرىپ, الگى ۇيىمنىڭ تەلەفون ءنومىرىن تاۋىپ الدىم. بىراق ەشكىم جاۋاپ بەرمەدى. ودان كەيىن حاتتان نوتاريۋستىڭ بايلانىس ءنومىرىن تاۋىپ, حابارلاسىپ ەدىم, ول ماعان ارىزدانۋشىنىڭ ءنومىرىن بەردى. ارىزدانۋشىنىڭ ايتۋىنشا, مەن شىلدە ايىنىڭ بەسى كۇنى نەسيە رەسىمدەپپىن. مەن ەشبىر نەسيە رەسىمدەمەگەنىمدى ايتپاق بولىپ ەدىم, وپەراتور تەلەفون تۇتقاسىن قويا سالدى. ەندى مەن نەسيە تولەمىن ۋاقىتىندا وتەمەگەنىم ءۇشىن نەگىزگى قارىزدىڭ ۇستىنە ءوسىمپۇل ۇستەپ, 45 232 تەڭگە تولەۋىم كەرەك. ونشا كوپ اقشا ەمەس, بىراق مەن ونى العان جوقپىن. سوندا, نە ءۇشىن تولەۋىم كەرەك؟ بانكتىڭ ءوزى نەسيە اقشا اۋدارىلعان ەسەپشوتتى تەكسەرىپ, اقشانىڭ كىمنىڭ قالتاسىنا تۇسكەنىن وپ-وڭاي انىقتاي الادى عوي, - دەدى ب. الەكەنوۆا.
ايدالاداعى الدەكىمدەردىڭ الاياقتىق ارەكەتىنىڭ قۇربانىنا اينالعان بالسۇلۋ قازىر پوليتسياعا شاعىم ءتۇسىرىپ, نوتاريۋسقا قارسى حات دايىنداپ جاتىر.
- پوليتسياعا شاعىمدانىپ ەدىم, ولار مۇنداي قىلمىس تۇرلەرىن اشۋ مۇمكىن ەمەس دەپ وتىر. ينتەرنەت الاياقتارىنىڭ قۇرىعىنا تۇسكەن شاعىمدانۋشىلار مەنسىز دە كوپ ەكەن. ەندى نوتاريۋستىڭ حاتىنا قارسى حات جازىپ, ادۆوكات جالداۋعا تۋرا كەلەدى. بىراق مۇنىڭ بارىنە اقشا كەرەك. ءبۇيتىپ اۋرە بولعانشا, قارجى ۇيىمى تالاپ ەتىپ وتىرعان اقشانى تولەپ قۇتىلۋ جەڭىل شىعار دەپ تە ويلاپ قويامىن. قازىرگىدەي ونلاين الەمدە ءبىزدىڭ جەكە مالىمەتتەرىمىزدى الاياقتار وپ-وڭاي ءوز مۇددەلەرىنە پايدالانۋدا. سوندىقتان جەكە كۋالىكتە كورسەتىلگەن مالىمەتتەرىڭىزدى قۇپيا ساقتاۋعا تىرىسىڭىزدار, - دەيدى بالسۇلۋ. ادىلدىك ىزدەپ, اۋرە-سارساڭعا تۇسكەن بالسۇلۋ «قازپوشتادان» ينتەرنەت الاياقتارىنىڭ تورىنا تۇسكەن ءوزى سياقتى تاعى ءبىر تۇرعىندى كەزدەستىرگەنىن ايتادى. ول ازاماتشا دا اقىسىن ءوز ەسەبىنەن تولەپ نوتاريۋسكە قارسىلىق حاتىن جىبەرىپتى. ادۆوكاتتىڭ قىزمەتى 50 مىڭ تەڭگە تۇرادى ەكەن. الاياقتار بۇل قىزدىڭ اتىنا 2 بىردەي نەسيە رەسىمدەپ جىبەرگەن. باسىنا اشىق كۇندە جاي تۇسكەندەي بولعان بالسۇلۋ ءبىر جارىم كۇننىڭ ىشىندە شاعىن نەسيە بەرەتىن ۇيىمداردىڭ نەمەسە الدەبىر الاياقتاردىڭ قۇربانىنا اينالعان 5 ادامدى ىزدەپ تاپقان.
قوستاناي وبلىسى