قمدب-نىڭ نۇر-سۇلتان قالاسى وكىلدىگى مەن "زەكەت" قورىنىڭ ۇيىمداستىرۋىمەن "ومىرگە ءۇمىت سىيلا" اكتسياسى بويىنشا ەلورداداعى اۋرۋحانالارعا 20 وتتەگى كونتسەنتراتورى مەن 20 وكپەنى تىنىستاندىرۋ اپپاراتى تاپسىرىلدى. بۇل تۋرالى قمدب ءباسپاسوز قىزمەتى حابارلايدى, دەپ جازادى Egemen.kz
قمدب "زەكەت" قورى ەلىمىزدە تىنىسى تارىلىپ, دەم جەتپەي جاتقان ناۋقاستاردى قولداۋ ماقساتىمەن "ومىرگە ءۇمىت سىيلا" اكتسياسىن جاريالاعان بولاتىن. بۇل شارا ەلىمىزدىڭ تۇكپىر-تۇكپىرىندە قولداۋ تاۋىپ, مەشىتتەر مەن "زەكەت" قورىنىڭ فيليالدارىندا بەلسەندى تۇردە جۇزەگە اسىپ جاتىر. نۇر-سۇلتان قالاسى مەشىتتەرى دە ىزگى شارادان قالىس قالمادى.
قايىرىمدىلىقتى جانى سۇيەتىن ازاماتتاردىڭ باسىن بىرىكتىرگەن "SAUAP" بەلسەندىلەر توبىنىڭ مۇشەلەرى دە اتسالىسقان يگى شاراعا "نۇر-سۇلتان قالاسىنىڭ ءدىن ىستەرى جونىندەگى باسقارماسى" مەملەكەتتىك مەكەمەسىنىڭ باسشىسى نۇرداۋلەت يمانالي ۇلى مەن "زەكەت" قورى ديرەكتورىنىڭ ورىنباسارى ءدىلمۇحان نۇركەن جانە نۇر-سۇلتان قالاسىنىڭ باس يمامى ەربولات ءجۇسىپوۆ قاتىستى.
اسىل ءدىنىمىز بەن قازاق تاعىلىمىندا دەر كەزىندە قول ۇشىن سوزىپ, كومەك كورسەتۋ ۇلكەن ساۋاپتى امالداردىڭ قاتارىنا جاتادى. وسى باعىتتا تالماي ەڭبەكتەنىپ جۇرگەن "SAUAP" ەرىكتىلەر توبىنىڭ ازاماتتارىنا نۇر-سۇلتان قالاسىنىڭ باس يمامى ەربولات ءجۇسىپوۆ سىڭىرگەن ەڭبەكتەرىن اللا ساۋاپتان جازسىن دەپ دۇعا ەتىپ, ايرىقشا العىسىن ءبىلدىردى.