«ىزعار» بايگە العان كۇن

سىرداعى دامەلى جۇيرىكتەردىڭ ءبىرازىن باپتاعان ورەكەڭ سول تۋعان جەرىنەن تابان اجىراتقان جوق. ءالى سول شيەلىنىڭ العا­باسىندا تۇرىپ كەلەدى. ءالى دە سول بايگەگە شاباتىن تۇقىم الۋ­دىڭ قامىمەن ءجۇر.

– حاكىم ابايدىڭ 150 جىل­دىعى تاۋەل­سىزدىكتىڭ العاشقى جىلدا­رىن­داعى ۇلكەن تويدىڭ ءبىرى بولدى عوي. كوشە-كوشە بولىپ تىگىلگەن كيىز ۇيلەر, قازاق, ورىس جانە اعىلشىن تىلدەرىندە ايتىلىپ جاتقان حابارلاندىرۋلار ءار ەلدەن وكىل جينالعان سالتاناتتىڭ مەرەيىن اسىرىپ تۇرعانداي ەدى. ءبىز «ىزعاردى» قۇنان بايگەگە قوسامىز دەپ اپارعانبىز. سويتسەك بۇل وڭىردە ونداي بايگە جوق ەكەن. سونشا جەردەن كەلگەندە مەسەلى قايتىپ قالماسىن دەپ, اتتار جاسىنا قاراماي ارالاسا شاباتىن 20 شاقىرىمدىق كىشى الا­مانعا قوستىق, – دەيدى ورىنباي احمەت ۇلى.

 «كورمەگەن جەردىڭ وي-شۇقىرى كوپ» دەگەن عوي. بايگە ۇيىمداستىرىلعان جەر تاستاق­تاۋ ەكەن. ال شيەلىنىڭ قۇم­داۋىت توپى­راعىن كەشىپ جۇرگەن «ىز­عار» تاعالان­­باعان ەدى. سوعان قارا­ماستان بارىن سالىپ, وزگە اتتاردان ارقان بويى الدا كەلگەن جۇيرىكتىڭ تاس جەپ تاستاعان ءتورت تۇياعى­نان قان سورعالاپ كەتىپتى. باۋىرلاس تاتار­ستان ەلىنىڭ سول تۇستاعى پرەزيدەنتى مين­­تيمەر شايميەۆتىڭ جۇيرىك يەسىنە جۇل­دە تا­بىس­تاعانى ەستەن كەتپەس ءساتتىڭ ءبىرى بولدى.

سول بايگەدەن كەيىن اتاعى قازاق­­ستاننىڭ ءار تۇكپىرىنە تاراعان «ىزعار­دىڭ» شاباندوزى ابات ەرزاقوۆ دەگەن بالا ەدى. قازىر بالالى-شاعالى ءبىر ءۇيدىڭ وتاعاسىنا اينالعان ابات نۇر-سۇلتان قالاسىندا جۇمىس ىستەيتىن كورىنەدى.

باس بايگەگە تىگىلگەن كاماز كولىگىن جيىر­ما جىلداي قىزىعىنا جاراتىپتى. با­لالار ەسەيىپ, جۇمىسقا تۇرعاسىن كولىك تە ساتىلىپ كەتتى.

ورەكەڭ كەيىن دە ءبىراز ات باپتادى. ەلوردانىڭ ءبىر جىلدىعىنا ارنالعان بايگەدە «ساندۋعاشى» قاراقشىعا ال­عاشقى بولىپ جەتىپ, يەسىنە گاز-3110 كولىگىن مىنگىزدى. «كاگور», «ايبەك», «قۇن­دىز» اتتى تۇلپارلارىنىڭ دا جەرگە قاراتقان كەزى جوق. بىراق اباي تويىندا الاپاتىن اسىرعان «ىزعارداي» قايدان بولسىن...

ودان بەرى دە تالاي ۋاقىت ءوتىپتى-اۋ. ەرتەڭ «ىزعاردىڭ» جۇزدەگەن جۇيرىكتەن قارا ءۇزىپ كەلىپ, بايگەلى بولعانىنا 25 جىل تولادى.

قىزىلوردا