سەنات دەپۋتاتى ەرىك سۇلتانوۆ سولتۇستىك قازاقستان وبلىسىنا ساپارى بارىسىندا قىزىلجار, اققايىڭ, ايىرتاۋ جانە ەسىل اۋداندارىندا بولدى. وبلىس اكىمىنىڭ ورىنباسارى عاني نىعىمەتوۆ ىسكە اسىرىلىپ جاتقان الەۋمەتتىك جوبالار مەن جالپى ءوڭىردىڭ دامۋى تۋرالى سەناتورعا ايتىپ بەردى, - دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
وڭىردە دەپۋتات ەرىك سۇلتانوۆ مەملەكەتتىك باعدارلامالاردىڭ, ونىڭ ىشىندە «اۋىل – ەل بەسىگى» باعدارلاماسىنىڭ قالاي ورىندالىپ جاتقانىنا جەكە كوز جەتكىزۋ ءۇشىن ءتۇرلى نىسانداردى ارالادى. قىزىلجار اۋدانىندا سەناتور 300 ورىندىق مەكتەپ قۇرىلىسىنىڭ بارىسىمەن تانىستى. اۋدان ورتالىعىنداعى حالىق سانىنىڭ ارتۋىنا بايلانىستى وقۋ ورىندارىنىڭ تاپشىلىعى سەزىلۋدە, وسىعان دەيىن بالالار ءۇش اۋىسىمدا وقىپ كەلدى. جاڭا وقۋ ورنىنىڭ بوي كوتەرۋى مەكتەپتەگى ورىن جەتىسپەۋشىلىگى ماسەلەسىن شەشەتىن بولادى.
ال سەناتور ەرىك سۇلتانوۆ استراحانكا, سميرنوۆو جانە انتونوۆكا اۋىلدارىنىڭ تۇرعىندارىمەن كەزدەسىپ, اتالعان ەلدىمەكەندەردى سۋمەن جابدىقتاۋ جانە اباتتاندىرۋ ماسەلەلەرىن تالقىلادى. وڭىردە حالىقتى اۋىز سۋمەن قامتاماسىز ەتۋ بويىنشا بەلسەندى جۇمىس جۇرگىزىلۋدە. وتكەن جىلى استراحان اۋىلدىق وكرۋگىنىڭ قاراتومار اۋىلىندا سۋمەن جابدىقتاۋ جەلىلەرىن جوندەۋ جۇمىستارى جۇرگىزىلدى. بۇگىندە اۋىل تۇرعىندارى ۇيلەرىنىڭ 80% - ى ورتالىق سۋ ارناسىنىڭ جەلىسىنە قوسىلعان.
دەپۋتات ەرىك سۇلتانوۆ جوندەلگەن بالاباقشالار مەن مەكتەپتەرگە, سونداي-اق جاڭا اۋداندىق فەلدشەرلىك پۋنكتكە باردى. سەناتور اۋداندار مەن شالعاي اۋىلداردا جەدەل مەديتسينالىق كومەك كورسەتۋ ءۇشىن مەديتسينالىق پۋنكتتەر سالۋدىڭ ماڭىزدىلىعىن اتاپ ءوتتى. بۇل ماسەلە, اسىرەسە, ەلدە كوروناۆيرۋس پاندەمياسىمەن كۇرەس ءجۇرىپ جاتقان كەزدە وزەكتى.
سەناتور ءوز ساپارىندا اۋىل شارۋاشىلىعىن دامىتۋ تاقىرىبىنا ءجىتى نازار اۋداردى. ەرىك سۇلتانوۆ اۋىل تۇرعىندارىن ءسۇتتى مال شارۋاشىلىعىن دامىتۋعا, مال باسىن كوبەيتۋگە شاقىردى. بۇل ءۇشىن ءتۇرلى مەملەكەتتىك قولداۋ تەتىكتەرى بار ەكەنىن دە اتاپ ءوتتى. سونىمەن قاتار, دەپۋتات ءوڭىردىڭ شارۋا قوجالىقتارىندا بولدى. ساپار سوڭىندا سەناتور ەرىك سۇلتانوۆ فەرمەرلەرگە ەلىمىزدىڭ الەۋمەتتىك-ەكونوميكالىق دامۋىنا قوسقان ۇلەستەرى ءۇشىن العىسىن ءبىلدىردى.