سەناتور رىسقالي ابدىكەروۆ ءوزى ساپارلاپ جۇرگەن قاراعاندى وبلىسىنىڭ ءدارىحانالارىندا ءدارى-دارمەكتەردىڭ قول جەتىمدىلىگى مەن ءدارى-دارمەكتەردىڭ قۇنىن باقىلاۋدى جالعاستىرۋدا. دەپۋتات جەرگىلىكتى بيلىك تۇرعىنداردىڭ سۇرانىستارىنا مۇقيات جاۋاپ بەرىپ, پاندەميا كەزىندە ءدارى-دارمەك جەتىسپەۋشىلىگى جاعدايىنىڭ قايتالانۋىنا جول بەرىلمەۋى كەرەكتىگىن اتاپ ءوتتى, - دەپ حابارلايدى Egemen.kz.
رىسقالي ابدىكەروۆ سونىمەن بىرگە دارىگەرلەردى قولداۋ, كوروناۆيرۋسپەن كۇرەستە ولاردى بارلىق قاجەتتىلىكتەرمەن قامتاماسىز ەتۋ ماڭىزدى ەكەنىن ەسكە سالدى. قورعانىس قۇرالدارمەن, ءدارى-دارمەكتەرمەن عانا ەمەس, سونىمەن قاتار ىستىق تاماقپەن دە قامتاماسىز ەتۋدىڭ ماڭىزىن اتاپ ءوتتى. دارىگەرلەر ءالى كۇنگە دەيىن ستاتسيونارلاردا, ادامداردىڭ ءومىرى ءۇشىن كۇرەسۋدە.
سونداي-اق سەناتور اۋدانداردىڭ بىرىندەگى دۇكەندەردەگى ازىق-ت ۇلىك باعالارىنا مونيتورينگ جۇرگىزدى. ول اكىمدىك نارىقتاعى وزگەرىستەردى مۇقيات قاداعالاپ, ساۋداگەرلەرگە الەۋمەتتىك ماڭىزدى تاۋارلاردىڭ رۇقسات ەتىلگەن باعاسىنان اسىپ كەتۋىنە جول بەرمەۋ كەرەكتىگىن اتاپ ءوتتى. سونىمەن قاتار, دەپۋتات ەرىكتىلەرگە مۇقتاجدارعا ازىق-ت ۇلىك جيىنتىعىن جەتكىزۋ بويىنشا قايىرىمدىلىق اكتسيالارىن توقتاتپاۋ تۋرالى ءوتىنىش ءبىلدىردى.
رىسقالي ابدىكەروۆ تۇرعىنداردى باسپانامەن قامتاماسىز ەتۋ جوسپارىمەن دە تانىستى. الداعى ۋاقىتتا وبلىستىڭ ءتورت اۋىلىندا 400-گە جۋىق ءۇي سالىنادى. قازىر مەملەكەتتىك باعدارلاماعا سايكەس بىرنەشە كوپپاتەرلى تۇرعىن ءۇي كەشەندەرى سالىنىپ جاتىر. ولاردى قامتاماسىز ەتۋ ءۇشىن «جۇمىسپەن قامتۋدىڭ جول كارتاسى-2020» باعدارلاماسى بويىنشا بۇقار جىراۋ اۋدانىندا جاڭا ءمودۋلدى قازاندىق سالىندى.
دەپۋتات قۇقىق قورعاۋ ورگاندارىنىڭ قىزمەتكەرلەرىمەن دە كەزدەستى. ولار ۋچاسكەلىك ينسپەكتورلاردىڭ شتات سانىن كەڭەيتۋ جانە قىزمەتتىك كولىكپەن قامتاماسىز ەتۋ قاجەتتىلىگى تۋرالى ايتتى. قاراعاندى وبلىسىنىڭ پوليتسەيلەرى سەناتورعا جولداردى بۇزاتىن جۇك كوتەرگىشتىگى 25 توننا جانە 40 توننا بولاتىن اۋىر كولىك قۇرالدارىنىڭ قوزعالىسىن شەكتەۋ ءۇشىن «اۆتوموبيل كولىگى تۋرالى» زاڭعا تولىقتىرۋلار ەنگىزۋ مۇمكىندىگىن قاراستىرۋدى ۇسىندى.
سەنات دەپۋتاتى رىسقالي ابدىكەروۆتىڭ قاراعاندى وبلىسىنا جۇمىس ساپارى جالعاسۋدا. الدا ءوڭىر باسشىلىعىمەن كەزدەسۋلەر جانە تاعى بىرنەشە اۋدانعا ساپارلار جوسپارلانعان.