كەشە پرەمەر-ءمينيستردىڭ ورىنباسارى ەربول ورىنباەۆ جۇمىس بابىمەن ماڭعىستاۋ وبلىسىندا بولدى. ول اقتاۋدا رەسپۋبليكا بويىنشا ءبىرىنشى رەت سالىنعان ورالمانداردى بەيىمدەۋ جانە كىرىكتىرۋ ورتالىعىنىڭ اشىلۋ سالتاناتىنا قاتىستى. 2008 جىلدىڭ اياعىندا قۇرىلىسى باستالعان بۇل نىسانعا 1,8 ملرد. تەڭگە قاراجات باعىتتالىپتى. ونىڭ اشىلۋ سالتاناتىندا وبلىس اكىمى قىرىمبەك كوشەرباەۆ ايماققا 1991-2010 جىلدارى 98887 ادام كەلگەندىگىن, ال “نۇرلى كوش” باعدارلاماسىنا وراي 2010-2011 جىلدارى 5400 ورالمان كۇتىلۋدە ەكەندىگىن جەتكىزدى. ورتالىقتا 2 جەتى قاباتتى جاتاقحانا جانە اكىمشىلىك عيمارات بار. ول 200 ورالمان وتباسىن 5-6 اي مەرزىمگە ۋاقىتشا قابىلداۋعا ەسەپتەلگەن. وعان ورنالاساتىن ءار ورالمان وتباسى كەلىسىم-شارتقا وتىرادى. ولارعا ءتىل ۇيرەتۋ, كاسىبي ماماندىققا باۋلۋ, ەلدىڭ نەگىزگى زاڭنامالارىنا وقىتۋ, كاسىپكەرلىكپەن اينالىسۋ, جۇمىسقا ورنالاستىرۋ جانە باسقا دا قىزمەتتەر كورسەتىلەدى. ورتالىقتا مادەني-تۇرمىستىق قىزمەت كورسەتۋ ورىندارى دا اشىلماقشى.
سونداي-اق ە.ورىنباەۆ اقتاۋدا 280 ورىندىق بالاباقشانىڭ اشىلۋىنا دا قاتىستى. وبلىستا ەلباسى تاپسىرماسىنا وراي مەكتەپكە دەيىنگى بىلىممەن قامتۋدى جاقسارتۋ قولعا الىنۋدا. وعان وسى جىلى عانا 10 بالاباقشا قۇرىلىسى باستالىپ, 10 بالاباقشانى قالپىنا كەلتىرۋ جۇمىستارى ءجۇرىپ جاتقانى ءدالەل. ال جىل اياعىندا بالاباقشامەن قامتىلۋ دەڭگەيى 70 پايىزعا جەتپەكشى. جۇمىس ساپارىندا ۆيتسە-پرەمەر اقتاۋداعى جوعارى وقۋ ورىندارى, دەنساۋلىق ساقتاۋ جانە مادەنيەت وشاقتارى مەن جاڭادان ىسكە قوسىلعان ساۋدا ورىندارىن ارالاپ كوردى. سونداي-اق وبلىستىڭ الەۋمەتتىك سالاسىن ودان ءارى دامىتۋ جانە “بيزنەستىڭ جول كارتاسى-2020” باعدارلاماسىن جۇزەگە اسىرۋ ءماسەلەسىنە ارنالعان كەڭەس وتكىزدى.
جولامان بوشالاق.
اقتاۋ.