ءاربىر ادامنىڭ بويىندا جوعارى سانا, جاسامپاز رۋح, مىقتى ءتارتىپ بولۋ كەرەك. اسىرەسە, بۇگىنگىدەي ەل باسىنا كۇن تۋعان كەزەڭدە بۇل قاسيەتتەر اسا قاجەت. بۇكىل الەمنىڭ ءالىن كەلتىرمەي, ەركىندىگىن تۇقىرتىپ وتىرعان مىناۋ پاندەميا ۋاقتىسى – ادام بالاسىنىڭ ناعىز ويلاناتىن تۇسى.
بۇل قاتەرلى ىندەتتىڭ قازاقستانداعى جاعدايىنا بايلانىستى مەملەكەت باسشىسى ق.توقاەۆ ەلىنە جاناشىر, حالقىنا قامقور باسشى ەكەنىن كورسەتىپ-اق كەلەدى. ءوزىنىڭ اقىل-كۇشىن وسى ىندەتتىڭ بەتى قايتۋىنا جۇمساپ, ۇكىمەتكە, اكىمدەرگە, باسقا دەڭگەيدەگى باسشىلارعا تاپسىرما بەرىپ, وڭ ناتيجەسىنە مۇددەلى بولىپ وتىرعان جاعدايى بار.
قاي حالىق, قاي ۇلت وكىلى بولسا دا قۇدايدان قورقىپ, پاتشادان ىعىپ, ەلدىڭ زاڭىنا باعىنا بىلگەنى ابزال. بۇل كەزەڭ ەنجارلىقتى, بوس كوڭىلدىلىكتى, ارەكەتسىزدىكتى كوتەرمەيدى. قازىر حالىقتىڭ ءتاستۇيىن بىرلىگى مەن ىنتىماعى كەرەك. قايتكەندە دە قايرات تاۋىپ, كوروناۆيرۋسقا توسقاۋىل قويۋ كەرەك. كۇن سايىن ەستىپ وتىرعانىمىزداي, قاتەرلى ىندەتتىڭ ءورشىپ تۇرعانى – تىم قاۋىپتى. ۇلانعايىر دالامىزداعى 19 ميلليون حالىقتىڭ سانى جاعىنان بۇدان ءارى ازايىپ كەتۋى – ناعىز اپات. قۇدىرەتى كۇشتى, مەيىرىمى شەكسىز اللادان ەلدىڭ اماندىعىن, قازاقتىڭ قاۋىپسىزدىگىن سۇرايىق.
پاتشا – بىرەۋ, قالعانى وعان تىرەۋ. كۇن سايىنعى ايتىلىپ جاتقان نۇسقاۋلاردى مۇلتىكسىز ورىنداۋ – كوپشىلىك قاۋىمنىڭ مىندەتى. قامىعۋ, تورىعۋ, ۇرەي تۋعىزۋ پايدا بەرمەيدى.
ءاربىر ادامنىڭ ىشكى كۇرەسكەرلىك رۋحى مىقتى بولۋ كەرەك. قايتسەك وزىمىزگە, وتباسىمىزعا, جاقىنىمىزعا, اۋىل ايماققا, ەلگە, ۇلتقا, ۇرپاققا «زيانىمىزدى تيگىزبەيمىز؟» دەگەن سۇراق – بۇل كۇننىڭ باستى ساۋالى دا, تالابى دا.
دەرتتى جۇقتىرعان وتانداستارىمىزدىڭ ءدارى-دارىمەككە, دارىگەرلىك كومەككە ءزارۋ بولۋى – الابوتەن اڭگىمە. كوپ جايتقا ءبارىمىز دە كىنالىمىز.
ءبىز ادامگەرشىلىك, يماندىلىق, مەيىرىم, جاڭاعى ايتقان ءتارتىپ پەن سانا, ت.ب. ادامي قۇندىلىقتاردىڭ قۇلدىراپ بارا جاتۋىنان دا وسىنداي كەسەلگە كەزىگىپ وتىرعان جوقپىز با؟! ويلاناتىن ۋاقىت جەتتى, اعايىن. جەردى, سۋدى, مۇحيتتى ءبۇلدىرىپپىز. اسپاندى ىس تۇتىنگە تولتىرىپپىز, تابيعاتتى ايالاي بىلمەپپىز. وتباسىنىڭ بەرەكەسىن, شاڭىراقتىڭ شاتتىعىن, بالا تاربيەسىن الدىڭعى ورىنعا قوياتىن عاسىرلاردان كەلە جاتقان قاستەرلى سالتىمىزدى ۇكىلەپ ۇستاي الماپپىز. جاراتىلىس زاڭدىلىقتارىنا لايىقتى كوڭىل بولمەپپىز. ەندىگى جەردە ەل بولىپ, جۇرت بولىپ قاتەمىزدى تۇزەپ, قاسىرەتتەن قۇتىلۋدىڭ جولىن ىزدەيىك.
كەمەڭگەر تولە بي اتامىز ايتپاقشى, ء«بىر ءۇيدىڭ بالاسىنداي, ءبىر قولدىڭ سالاسىنداي» بولايىق. بىرلىك پەن ءتارتىپ, سەنىم مەن جىگەر السىرەمەسىن. پرەزيدەنتتىڭ ىزگى نيەت-پەيىلىنە, اردى ويلاعان ارەكەتىنە قولداۋ كورسەتەيىك.
دۇنيەگە جاڭا سانا, پاراساتتى پايىممەن قارايىق.
كۇلاش احمەتوۆا,
اقىن, مەملەكەتتىك سىيلىقتىڭ لاۋرەاتى