زادىندا حالىققا ەڭبەگىڭدى ءسىڭىرىپ, ەل ازاماتى اتانۋ ءۇشىن مىندەتتى تۇردە ورتالىقتا ورالىمدى قىزمەت ىستەپ, تومەندەگىگە شاراپاتىڭدى توبەدەن شاشىپ وتىرۋ شارت ەمەس ەكەن. بۇعان ارامىزدا عۇمىر بويى ەل ىشىندە ەڭبەك ەتە ءجۇرىپ, تۋعان حالقىنىڭ رۋحاني ءوسىپ-تولىسۋىنا, ۇلتتىڭ ۇيىسۋىنا سۇبەلى ۇلەس قوسىپ كەلە جاتقان اتپال ازاماتتاردىڭ شوقتىعىن كورگەندە كوزىمىز جەتە تۇسەدى. بۇل باياننىڭ كەيىپكەرى ەسىمى ەلگە تانىس ءالمۇحان يساقتى سونداي جانداردىڭ ساناتىنان سانايمىن. تومەندە ايتىلاتىن ەستەلىكتەر شوعىرى وسى ءسوزىمدى سان قىرىنان نىقتاي تۇسەدى دەپ ويلايمىن.
ۇزاق جىلدار جامبىل وبلىسىندا يدەولوگيا سالاسىن باسقارىپ, ءوڭىردىڭ مادەني-الەۋمەتتىك تىنىسىنىڭ كەڭەيىپ, رۋحاني ورلەۋىنە زور ۇلەس قوسقان ءالمۇحان يساقتى جۇرتشىلىق تەك ءبىلىمدى دە بىلىكتى شەنەۋنىك رەتىندە عانا ەمەس, ساياساتتانۋشى, جۋرناليست, جازۋشى رەتىندە ەرەكشە قادىرلەيدى. ءار جىلدارى حالقىمىزدىڭ تاريحىندا تەرەڭ ءىز قالدىرعان تولە بي, سامەن, سىپاتاي باتىرلار سياقتى تاريحي تۇلعالاردىڭ قازاق حالقىنىڭ ەل بولىپ ەتەك-جەڭىن جيناۋىنا قوسقان تاريحي رولدەرىن عىلىمي زەرتتەپ, كوپشىلىككە ۇسىنىپ كەلەدى. ۇلت تۇلعالارى د.قوناەۆ, ا.اسقاروۆ, ب.مومىش ۇلى, ق.قايسەنوۆ, ءو.ءجانىبەكوۆ, ح.بەكتۇرعانوۆ, ءا.يسمايلوۆ سىندى قازاقتىڭ قايسار ۇلدارى تۋرالى كوركەمدىگىمەن كوز تارتىپ, باياندالۋىمەن باۋراپ الاتىن ەسسەلەر جازدى. ءا.بوكەيحانوۆ, ا.بايتۇرسىنوۆ, ت.رىسقۇلوۆتاردىڭ عىلىمي ءومىرباياندارى تۋرالى جازىلعان جيناقتى مايىن تامىزىپ قازاق تىلىنە اۋداردى. سونداي-اق, ءالمۇحان ءابدىراحمان ۇلىنىڭ قالامىنان تۋعان “وتكەن كۇندە بەلگى بار”, “وتپەلىنىڭ وكپەك جەلى”, ء“ومىردىڭ تاعىلىمدى مەزەتتەرى”, ء“ۇردىس پەن ۇدەرىس” كوركەم-پۋبليتسيستيكالىق, عىلىمي-كوپشىلىك كىتاپتارى كەزىندە كورنەكتى جازۋشىلارىمىزدان جاقسى باعاسىن العانى ءوز الدىنا, ءالى كۇنگە وزەكتىلىگىن جويعان جوق. بۇل جەردە قازاقستاننىڭ حالىق جازۋشىسى قالتاي مۇحامەدجانوۆتىڭ الەكەڭ تۋرالى ايتقان مىنا ءبىر جىلى لەبىزىن ەسكە العان ارتىق ەتپەس: “كوممۋنيستىك جۇيەنىڭ ءبىر زيانى – ءالمۇحاندى جازۋشى بولۋعا كوپ دەن قويدىرماعانى. ايتپەسە ءالمۇحان ۇلكەن جازۋشى, سىنشى بولاتىن ادام. قازىر دە ول جازۋشى. قىزمەت ەمەس, ادەبيەتكە مىقتاپ كىرىسكەندە ناعىز مىقتى بولاتىن ەدى”. بۇعان الەكەڭ وكىنبەيدى. ول ەل باسقارۋعا ارالاسىپ, قابىلەتى مەن قاسيەتىن, ءومىرىنىڭ مازمۇن-ماعىناسىن, ءبىلىمى مەن بىلىكتىلىگىن حالىققا ارناعان, انتقا ادال, سەرتكە بەرىك, ءوز ەلىن وزەگىم دەپ تانيتىن ومىربەك بايگەلدي, سارىباي قالمىرزاەۆ, ءانۋار جاقىپوۆ, عاينيكەن بيباتىروۆا, ەلۋباي ولجاباەۆ, ليدا احمەتوۆا, سەيىلحان اققوزيەۆ سياقتى ورەسى بيىك ازاماتتارمەن ءار كەزەڭدە يىق تىرەستىرىپ, قاناتتاس بولعان تاعدىرىنا ءدان ريزا.
وتكەن كۇندەرگە ورالساق, 1986 جىلدىڭ جازىندا جامبىل وبلىستىق پارتيا كوميتەتىنىڭ يدەولوگيا جونىندەگى حاتشىسى, قازاق قىزدارىنىڭ ىشىندەگى بىلگىرلەرىنىڭ ءبىرى عاينيكەن بيباتىروۆا رەسپۋبليكا مادەنيەت ءمينيسترىنىڭ ورىنباسارى قىزمەتىنە جوعارىلاپ كەتتى دە, ورنىنا ءالمۇحان يساق كەلدى. سونىڭ الدىندا عانا مەن اۋپارتكومنىڭ حاتشىلىعىنان وبكومنىڭ ۇگىت-ناسيحات ءبولىمىنىڭ مەڭگەرۋشىسى بولىپ بەكىگەن ەدىم. ەندى, مىنە, ەجەلگى تانىس, الپىسىنشى جىلدارى كازگۋ-ءدىڭ فيلولوگيا فاكۋلتەتىن بىزدەن ءبىر كۋرس الدا وقىعان, سۋرەتى لەنيندىك ستيپەندياتتاردىڭ ساناۋلى عانا شوعىرى ىلىنگەن تاقتادان تۇسپەيتىن, كەيىننەن مەركى اۋداندىق پارتيا كوميتەتىنىڭ ەكىنشى, كراسنوگور, لۋگوۆوي اۋداندارىنىڭ ءبىرىنشى حاتشىلىعى قىزمەتتەرىن ابىرويمەن اتقارىپ, ەل اۋزىنا ىلىككەن, كوكپ ورتالىق كوميتەتى جانىنداعى ماسكەۋ جوعارى پارتيا مەكتەبىندە وقىعان جىلدارى ءتۇرلى پىكىرتالاستاردا ادام قۇقىعىنىڭ بۇزىلۋىنا, دەموكراتيانىڭ جۇتاڭدىعىنا, مەملەكەتتىك مونوپوليزمنىڭ ەكونوميكاداعى, يدەولوگياداعى ۇستەمدىگىنە سىن كوزبەن قاراۋ تۋرالى توسىن ويلارىمەن پارتيا فۋنكتسيونەرلەرىن ەلەڭ ەتكىزگەن ساياساتتىڭ ساردارىمەن قىزمەتتەس بولۋ مۇمكىندىگى بۇيىرىپ تۇر. ءبولىم قىزمەتكەرلەرىمەن تانىسۋداعى العاشقى اڭگىمە اۋانىنان-اق جاڭا لەپ كەلگەنىن ۇقتىق, يدەولوگيا جۇمىسىنىڭ وزەگى – ۇلتتىق سانادا سىلكىنىس, تاربيە جۇمىسىندا سەرپىلىس تۋدىرۋ, حالقىمىزدىڭ تاريحي زەردەسىن جاڭعىرتۋ, اعا ۇرپاقتىڭ الەۋمەتتىك-مادەني تاجىريبەسىن, ۇلتتىق قۇندىلىقتاردى جاستاردىڭ بويىنا تەرەڭ ءسىڭىرۋ, قوعامدىق ويعا قوزعاۋ سالۋ تۋرالى ونىڭ ۇستانىمدارى, ادەتتەگىدەي “قانشا لەكتسيا وقىلدى, قانشا اڭگىمە وتكىزىلدى” ەمەس, مۇلدە جاڭا اۋەندەر. جاڭا حاتشىنىڭ الدىنان ەندىگى جەردە يدەولوگيا جۇمىسىنا جاڭاشا باعىت بەرۋ قاجەتتىگىن ۇعىنىپ شىقتىق. ەلدەگى ساياسي جاعدايدىڭ ءوزى ءماز ەمەس ەدى.
سول كەزەڭنىڭ وزىندە كادر ماسەلەسىندە ماسكەۋ ۇستانىپ كەلگەن ءتۇرى “ۇلتتىق”, مازمۇنى “ ۇلىدەرجاۆالىق وركوكىرەكتىك” ساياسات “دامىعان ءسوتسياليزمدى” تۇبىندە نە ورعا, نە سورعا جىعاتىندىعى بەلگىلى بولدى. جۇيەلى تۇردە ۇلتتىق قادىر-قاسيەتتى كەمىتۋ, وي-سانانى سانسىراتۋ قوعامدا كوكىرەك كوزى وياۋلار تاراپىنان بۇرىن دا ىشتەي قارسىلىق تۋدىرىپ كەلسە, قايتا قۇرۋ كەزىندە اسىرەسە جاستار جاعىنان قانداي جولمەن بولسا دا ەڭكىش تارتقان ۇلتتىق رۋحتىڭ, جالى جىعىلعان نامىستىڭ ەڭسەسىن تىكتەۋگە دىلگەرلىك باسىم ەدى. ول 1986 جىلعى الماتىداعى تورتكۇل دۇنيەگە تۇگەل تانىلعان اۋقىمى مەن وتكىرلىگى جاعىنان كەڭەستەر وداعىنداعى دەموكراتيالىق قوزعالىستاردىڭ كوشباسشىسى اتانعان جەلتوقسان وقيعاسى – قازاق جاستارىنىڭ بۇلقىنىسى ارقىلى كورىنىس تاپتى. كۇلكىسىز كۇندەر مەن ۇيقىسىز تۇندەر كىمنىڭ كىم ەكەندىگىن كورسەتتى. وبلىس قالالارىنداعى وقۋ ورىندارىندا, ەڭبەك ۇجىمدارىندا, جۇمىسشى جانە ستۋدەنتتەر جاتاقحانالارىندا ساعاتتاپ اڭگىمە وتكىزۋ, ءمان-جايدى ءتۇسىندىرۋ تولاسسىز ءجۇرىپ جاتتى. سالماقتىڭ دەنى يدەولوگياعا جاۋاپ بەرەتىن حاتشىعا ارتىلدى. ول كەزدە تۇزىمىز جەڭىل ەدى عوي, كەمشىلىك اتاۋلىنى بىزگە – يدەولوگتارعا اۋدارا سالاتىن. الەكەڭنىڭ كەيبىر لاۋازىمدى ارىپتەستەرى جاستارمەن كەزدەسۋلەر كەزىندە ارتىق ارەكەتتەرگە بارىپ, كۇش كورسەتۋ, وكتەم سويلەۋ, “ابايلاڭدار, پارتيانىڭ قۇرىعى ۇزىن” دەپ قورقىتۋ, تاعى دا ءتۇرلى بوپسالاۋعا ەرىك بەرىپ جاتقاندا, ءالمۇحان يساق بايسالدى ويى مەن بايىپتى ىسىنەن اينىعان جوق, يدەولوگيا قىزمەتكەرلەرىنە بارلىق مۇمكىندىكتى پايدالانىپ, قانداي دا بولسىن ارانداتۋعا, ونسىز دا شيرىعىپ تۇرعان جاعدايدى شيەلەنىستىرۋگە جول بەرمەۋ ماقساتىن ۇستانىپ وتىردى. الماتىداعى جاستار شەرۋى كۇشپەن باسىلدى. ەندى ولاردى قۋدالاۋ, قۋعىنداۋ باستالدى. ءتيىستى ورگانداردىڭ ءمالىمەتتەرى بويىنشا وقيعاعا تىپتەن كەزدەيسوق تاپ بولعان ستۋدەنتتەردىڭ, جۇمىسشى جاستاردىڭ, ىسساپارمەن استانادا بولىپ سۋرەتكە ءتۇسىپ قالعان قىزمەتكەرلەردىڭ ءتىزىمدەرى شارا قولدانۋ ءۇشىن وبكومدارعا كەلىپ جاتتى. وسى كەزدەگى ءالمۇحان ءابدىراحمان ۇلىنىڭ ازاماتتىعىن ايتپاي كەتپەسكە بولمايدى. وبكومنىڭ ءبىرىنشى حاتشىسىنىڭ بۇرىشتاماسىمەن بولىمگە شارا قولدانۋعا ۇسىنىس دايىنداۋ ءۇشىن ءتۇرلى سەبەپتەرمەن كوتەرىلىس كۇندەرى الاڭدا بولعان 89 ادامنىڭ ءتىزىمى كەلىپ ءتۇستى, 89 تاعدىر تالكەككە ۇشىراعالى تۇر. الەكەڭە كىرىپ ەدىم: “نە ىستەيتىن ويىڭىز بار؟” – دەپ سۇرادى. مەن: “ەڭ دۇرىسى تەمىر جاشىكتەگى كوپ قاعازدىڭ اراسىنا كومىپ تاستاۋ”, – دەدىم. الەكەڭ: “دۇرىس, ەكەۋمىزدىڭ تاعدىرىمىز وسىنشاما ازاماتتاردىڭ تاعدىرىنان اۋليە ەمەس. نە بولسا دا مويىنمەن كوتەرەرمىز”, – دەدى. بۇل ادالدىقتى ايالاعان ۇلتجاندى ادامنىڭ شەشىمى ەدى.
جالپاق جۇرتتىڭ ۇلتتىق ساناسىندا سىلكىنىس پايدا بولعان سول كەز بىزگە يدەولوگيالىق جۇمىستى ادامداردىڭ تالاپ-تىلەگىمەن, الەۋمەتتىك-رۋحاني سۇرانىسىمەن بايلانىستىرا جۇرگىزۋدى تالاپ ەتتى. سوعىس كەزىندە دەپورتاتسيالانعان وبلىستىڭ كەيبىر اۋداندارىندا قونىس تەپكەن تۇرىك ۇلتىنىڭ وكىلدەرى اتاقونىسى – مەسحەتياعا كەتۋ ماسەلەسىن كوتەرىپ شاعىمدانباعان ينستانتسياسى قالمادى. تالاپتارىنا ارقاۋ بولعان ۋاجدەرى: بالالارىنىڭ ۇلتتىق ءبىلىم الماۋى, سالت-داستۇرلەرىنىڭ, مادەنيەتىنىڭ ۇمىت بولا باستاۋى. ول شىندىق بولاتىن. بىراق, قازاقتاردىڭ ءوزى ءوز ەلىندە, ءوز جەرىندە جەتىمدىك كورىپ جۇرگەندە وبلىستى مەكەندەگەن جۇزدەن استام ۇلت وكىلدەرى ءۇشىن ارنايى مەكتەپ اشۋ ءمۇمكىن ەمەس ەدى. نە ىستەۋ كەرەك؟ ۇلتتىق ءتىلى ساباعىن قالاي وقۋ باعدارلاماسىنا كىرگىزەمىز؟ ول شەشىلگەن جاعدايدا وقۋ قۇرالى قايدا؟ الدىمەن تۇرىك ءتىلىنىڭ الىپپەسىن تاۋىپ, ونى باسپاحانادا كوبەيتۋ كەرەك دەپ شەشتىك. ىزدەۋ سالىپ جاتىپ 1936 جىلى ماسكەۋدە باسىلعان لاتىن ارپىمەن جازىلعان توزىعى جەتكەن “TURK ءDىLى” الىپپەسىن تاۋىپ, 100 دانا ەتىپ باستىرىپ شىعاردىق. وبكوم حاتشىسى تۇرىكتەر جيناقى تۇراتىن اۋىلدارعا بارىپ وقۋلىقتى تاراتقان كەزدەگى كورىنىستى ايتىپ جەتكىزۋ قيىن. تۇرىك تۋىستار مەرەكەدەگىدەي كيىنىپ, سىرنايلاتىپ, تايلى-تۇياعىمەن جينالىپ, اقساقالدارى كىتاپتى ەمىرەنە ءسۇيىپ, ماڭدايلارىنا باسىپ تارام-تارام كوز جاستارىن تىيا الماي تەبىرەنگەن ساتتەرىن كورگەندە ۇلتتىق ءتىلدىڭ قۇدىرەتىنە تاعزىم ەتۋدىڭ كۋاسى بولعانبىز. ءسويتىپ, ءالمۇحان يساقتىڭ قولداۋىمەن بارىمەن بازار جاساپ, تۇرىك باۋىرلاردىڭ جۇرەگىنە دە جول تابىلعان ەدى.
ءالمۇحان ءابدىراحمان ۇلى وزىنە ءتان پروبلەمانىڭ جاندى جەرىنەن ۇستاپ, وسال تۇستارىن تالماي شيراتا بەرەتىن قايراتكەرلىك قاسيەتىنەن ەش تانعان جوق. الەۋمەتتىك توپتاردىڭ رۋحاني-مادەني سۇرانىستارىن قاناعاتتاندىرۋ ماقساتىمەن ورىس, ۋكراين, تۇرىك, كۇردى, ءازىربايجان, نەمىس, تاتار-باشقۇرت مادەني ورتالىقتارى قۇرىلىپ, “فرويندشافت” نەمىس, “ناينيك”, “ستەرك” كۇردى, “داستەگيۋل” تۇرىك, ءازىربايجان ۇلتتىق انسامبلدەرى كورەرمەندەردى كوزايىم ەتتى. وبلىستىڭ ءار ءوڭىرىندە ايتىسكەر اقىندار: شورابەك ايداروۆتىڭ, ءازىمحان جانقۇليەۆتىڭ, سەرىك قاليەۆتىڭ مەكتەپتەرى قالىپتاستى. كەزىندە تاڭعالدىرعان, قازىردە ەلدى اۋزىنا قاراتىپ جۇرگەن اينۇر تۇرسىنباەۆا, كۇمىس سارسەنباەۆا, شىرىنبەك قويلىباەۆ, التىنكۇل قاسىمبەكوۆا, مۇحامەدجان تازابەكوۆ, تاعى باسقالارى اتالعان ۇستازداردان ءتالىم العان اقىندار. ۇلتىمىزدىڭ ۇمىتىلا باستاعان جىرشى, جىراۋ, تەرمە ونەرلەرى قايتا ءتىرىلدى.
جالپى, ەل تىزگىنىن ۇستاعان ءبىرىنشى باسشىنىڭ كورگەنى مول كوشەلى بولىپ, ونىڭ جانىنداعى ورىنباسارلارىنىڭ ويعا وي قوسا الاتىن ورنىقتى دا ساليقالى بولۋى جۇرتشىلىق ءۇشىن شىن مانىندە ىرىس-قۇت ەمەس پە. سول كەزدە وبلىستىق پارتيا كوميتەتىنىڭ ءبىرىنشى حاتشىسى بولعان, بۇگىندە تاۋەلسىز ەلىمىزدىڭ تۇلعالى قايراتكەرى ومىربەك بايگەلدي مەن ءالمۇحان يساقتىڭ ءبىر جەڭنەن قول, ءبىر جاعادان باس شىعارا بىرلەسىپ قىزمەت ەتۋى جامبىل ءوڭىرىنىڭ جان-جاقتى گۇلدەنۋىنە, تىڭنان ءتۇرلەنۋىنە ايرىقشا سەرپىن بەرگەنىن ايتۋىمىز كەرەك.
قانداي قىزمەتتىڭ تۇتقاسىن ۇستاسا دا جەكە باسىنىڭ قامىن ويلاپ دامەگوي, باقاي ەسەپپەن جۇمىس ىستەۋ المۇحانعا جات قىلىق. قاتارىنان ەكى رەت, 1991 جانە 1999 جىلدارى پرەزيدەنتتىك سايلاۋلاردا ەلباسىنىڭ سەنىمدى وكىلى بولىپ, وبلىستاعى سايلاۋالدى شتابىن باسقارۋى ونىڭ حالىق اراسىنداعى بەدەلىن, ازاماتتىعىن, مەملەكەت باسشىسىنا دەگەن اق ادال نيەتىن باعالاعاندىق ەدى. ءالمۇحان يساق قاي كەزدە دە پرەزيدەنتتى قولداۋى ارقىلى ءوز ەلىنىڭ كەلەشەگى ءۇشىن ۇلەس قوسۋ ۇستانىمىنان ەش تايعان ەمەس. 1999 جىلى ناۋرىز ايىندا “وتان” پارتياسىن قۇرۋعا قاتىستى. ءالمۇحان ءابدىراحمان ۇلى “وتان” پارتياسى ساياسي كەڭەسىنىڭ مۇشەلىگىنە سايلانىپ, 2002-2006 جىلدارى پارتيانىڭ جامبىل وبلىستىق فيليالىنىڭ توراعاسى, كەيىننەن توراعالىق وبلىس اكىمىنە اۋىسقاندا ونىڭ ءبىرىنشى ورىنباسارى بولىپ قىزمەت اتقاردى. ءالى كۇنگە دەيىن “نۇر وتان” حدپ-نىڭ وبلىستىق فيليالىنداعى ءىس-شارالار ءا.يساقتىڭ قاتىسۋىنسىز وتكەن ەمەس. وبلىستىق اقپارات قۇرالدارىنان ءالمۇحاننىڭ ماتەريالدارىن ءجيى وقۋعا, ءجيى كورۋگە بولادى. ونى جەرگىلىكتى تەلەديداردىڭ جۇلدىزى دەسە بولعانداي. ءالمۇحان ساياسي قىزمەتىن وبلىس جاستارىن تاربيەلەۋ-ءبىلىم بەرۋ جۇمىستارىمەن ۇشتاستىرىپ, “تاراز” ينستيتۋتىنىڭ ساياساتتانۋ پروفەسسورى رەتىندە ستۋدەنتتەرگە ءدارىس وقۋمەن دە اينالىسقان جايى بار.
جاڭا قوعام ادامي قۇندىلىقتارعا ۇمتىلعان شاقتا ءا.يساق ءۇشىن ۋاقىتىن بوسقا وتكىزۋ وكىنىش. قاشان دا جۇرتقا پايدالى ىسپەن شۇعىلداناتىن ادەتىمەن ول 2007 جىلدان بەرى ۇلى وتان سوعىسىنا قاتىسىپ امان ورالىپ, بەيبىت ەڭبەككە ارالاسقان جاسى جەتىپ ءومىردەن وزعان ارداگەرلەر تۋرالى كىتاپ شىعارۋمەن اينالىساتىن رەداكتسيالىق توپتىڭ جەتەكشىسى. ۇلى جەڭىستىڭ 65 جىلدىعىن اتاپ ءوتۋ قۇرمەتىنە جاقىن ارادا كىتاپ 3 توم بولىپ ەگەمەن ەلىمىزدىڭ ەرتەڭى – جاستارعا ءتاۋ ەتۋگە ۇسىنىلعالى وتىر.
بۇل كۇندەرى جەتپىس جاستىڭ بەلەسىنە شىققان ءا.يساق اكەدەن ەرتە ايىرىلىپ, بالالىق داۋرەننىڭ بالىن ەمەس, كەرمەك ءدامىن تاتىپ, ءتۇرلى قيىندىقتى اناسى كۇلزادامەن بىرگە قايسارلىقپەن جەڭىپ, ەش قولداۋ-قولپاشتاۋسىز ءوزىنىڭ ساليقالى تىرلىگى, سالماقتى بولمىسىمەن رەسپۋبليكاعا تانىمال قايراتكەرلىك دەڭگەيگە جەتتى. ۋنيۆەرسيتەتتە ءبىر كۋرستا وقىپ تاعدىر قوسقان جارى گۇلدىرايحان شاڭىراقتىڭ ءسانىن كەلتىرىپ, وتباسىنا مەيىرىن توسىپ, اقىلىن قوسىپ, اسىقتاي ۇلدارىن ۇياعا, اقىقتاي قىزدارىن قياعا قوندىرىپ, نەمەرەلەرىن ايالاپ, ەكەۋى جۇپتارىن جازباي باقىتتى عۇمىر كەشىپ كەلەدى. “جارى جاقسىنىڭ – ءبارى جاقسى” دەگەن وسى.
ەلگە ەلەۋلى, پەرزەنتتىك پارىزىن العا قويعان ازاماتتىق ماقساتىمەن تىنىمسىز, تىڭعىلىقتى ءورىپ, پاراسات بيىگىندە تۇرعان جامبىل وبلىسىنىڭ قۇرمەتتى ازاماتى ءالمۇحان ءابدىراحمان ۇلى يساق تۋرالى ايتپاعىم وسى ەدى
جاندار كارىباي ۇلى, ساياساتتانۋشى.