قىزىلوردادا ىندەتتى بولدىرماۋ شارالارىنا كوپشىلىك تە كوپ ۇلەس قوسىپ وتىر. از ۋاقىت ىشىندە وبلىس ورتالىعىنىڭ وزىندە كاسىپكەرلەر مەن قايىرىمدىلىق شارالارىنان قالىس قالماعان تۇرعىنداردان جينالعان 38,3 ملن تەڭگەگە 45 دانا وتتەگى كونتسەنتراتورى, 2 مىڭنان اسا وتتەگى باللونى الىنىپ, ەمدەۋ مەكەمەلەرىنە تاراتىلدى. ونى جەتكىزۋمەن ەرىكتىلەر اينالىسۋدا. وسىلايشا سىربويىلىقتار جۇرت جۇمىلسا, دەرتتىڭ دە دەندەمەيتىنىن دالەلدەپ وتىر.
جۋرناليستەر جاردەمى
دەرتتىڭ دەندەمەۋىنە بارلىق سالا وكىلدەرىنىڭ ۇلەسى بار. وسى باعىتتاعى شارالاردى ناسيحاتتاپ جۇرگەن جۋرناليستەر دە قايىرىمدىلىق شارالارىنان شەت قالعان جوق. وبلىستىق ىشكى ساياسات باسقارماسىنا قاراستى «سىر مەديا» سەرىكتەستىگىنىڭ ۇجىمى كوروناۆيرۋسقا قارسى كۇرەسكە ءبىر كۇندىك جالاقىسىن اۋداردى.
ارىپتەستەرىمىزدىڭ بىركۇندىك جالاقىسىنان جينالعان قارجى 1 ملن تەڭگەگە جۋىقتاپتى. وعان وبلىستىق مەديتسينا ورتالىعى وتتەگى اپپاراتىنا قاجەتتى قۇرالداردى ساتىپ العان. جاقسىلىق جاساۋعا جۇمىلعان جۋرناليستەر اراسىندا ەرىكتىلەر قاتارىندا ەمدەۋ مەكەمەلەرىنە كومەك كورسەتىپ جۇرگەندەر دە جوق ەمەس.
وسى اي باسىنان بەرى سەرىكتەستىكتىڭ 3 قىزمەتتىك كولىگى قالا اۋماعىنداعى ەمحانالارعا, اۋرۋحانالارعا وتتەگى باللوندارىن جەتكىزۋمەن اينالىسىپ ءجۇر.
قۇرىلىسشىلار قايىرىمدىلىعى
جۋىردا ايماقتاعى قۇرىلىسشىلار اسسوتسياتسياسى كوروناۆيرۋس دەرتىمەن كۇرەسىپ جۇرگەن دارىگەرلەرگە 32 وتتەگى كونتسەنتراتورىن الىپ بەردى. 16 قۇرىلىس كومپانياسىنىڭ كومەگىمەن الىنعان قۇرىلعىلاردىڭ 10-ى وبلىستىق جۇقپالى اۋرۋلار اۋرۋحاناسىنا,7-ءى قالالىق اۋرۋحاناعا, 15-ءى اۋداندارداعى ەمدەۋ مەكەمەلەرىنە تابىستالدى.
جالپى, قايىرىمدىلىق شارالارىنا ۇلەس قوسىپ جاتقانداردىڭ قاتارى قالىڭ. وتكەن اپتا سوڭىندا «شالقيا تسينك لتد» جشس كاسىپورنىنىڭ دەمەۋشىلىگىمەن جاڭاقورعان اۋدانارالىق اۋرۋحاناسىنىڭ جۇقپالى اۋرۋلار بولىمىندەگى پروۆيزورلىق ستاتسيونارعا VG70 ماركالى 2 جاساندى تىنىس الۋ قوندىرعىسى جەتكىزىلدى. بۇل مەديتسينالىق اپپارات ەلەكتر قۋاتى سونگەن جاعدايدا اككۋمۋلياتور ارقىلى 30 مينۋتقا دەيىن ىستەپ تۇرادى. سونداي-اق كاسىپورىن وكىلدەرى دارىگەرلەرگە ارنايى ساقتىق قورعانىش كيىمدەرىن, پۋلسوكسيمەتر مەن ءدارى-دارمەكتەر تابىستادى. جاقىن كۇندەرى اۋرۋحانا بەرگەن ءتىزىم بويىنشا وتە قاجەتتى پرەپاراتتار تاعى جەتكىزىلەدى.
كاسىپكەرلەر دە ەرىكتىلەر قاتارىندا
قايىرىمدىلىق شارالارىنا ۇلەس قوسۋمەن قاتار ەرىكتىلەر ساپىندا ەڭبەك ەتىپ جۇرگەن ىسكەر ازاماتتار دا بار. قينالعان جۇرتقا قول ۇشىن بەرۋدى پارىز سانايتىن كوبى وزدەرىنىڭ اتتارى اتالعانىن دا قالامايدى. ىسكەرلەردى يگى ىسكە جۇمىلدىرۋدا وبلىستىق كاسىپكەرلىك پالاتاسى جۇيەلى جۇمىس ىستەپ وتىر.
– قازىرگى جاعداي قاي سالاعا دا جەڭىل بولىپ تۇرعان جوق. بيزنەس وكىلدەرى شاش-ەتەكتەن شىعىنعا باتقانىنا قاراماستان تۇرعىندارعا كومەك قولىن سوزىپ جاتىر. سونىڭ ءبىر ايعاعى, كەيىنگى ايدا «اباي-داۋلەت» جشس, «ابزال جانە ك» تس, «اقتوبە ي ك» جشس, «شىڭعىس لتد» جشس, «كۆانت» جشس ناۋقاستار مەن مەديتسينا مەكەمەلەرىن تەگىن ءدارى-دارمەكپەن, قاجەتتى وتتەگى قۇرالدارىمەن, ونى تاسيتىن كولىكپەن, ازىق-ت ۇلىكپەن قامتاماسىز ەتىپ جاتىر. «قىزىلوردا», «بايتەرەك» قوناقۇيلەرىندە مەديتسينا قىزمەتكەرلەرى تەگىن جاتىن ورىن مەن تاماقپەن قامتاماسىز ەتىلۋدە, – دەيدى وبلىستىق كاسىپكەرلەر پالاتاسى ديرەكتورىنىڭ ورىنباسارى پىرمۇحاممەد سىزدىقوۆ.
قىزىلوردا وبلىسى