كەنشىلەر استاناسىنداعى وبلىستىق كلينيكالىق اۋرۋحانا جانىنان 350 توسەكتىك پۋلموپروۆيزورلىق گوسپيتال اشىلدى, – دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
مەديتسينالىق مەكەمەدە 100 توسەك ينفەكتسيالىق, ال 250 توسەك پۋلموپروۆيزورلىق بولادى. سونداي-اق, گومپيتالدە وكپەنى جاساندى جەلدەتۋ (وجج) اپپاراتتارىمەن, پاتسيەنت مونيتورلارىمەن جانە پەرفۋزورلارمەن جابدىقتالعان جان ساقتاۋ ءبولىمى بار.
ەپيدەميولوگيالىق قاۋىپسىزدىك ماقساتىندا بارلىق ءۇي-جايلار وقشاۋلانىپ, بەينەباقىلاۋ جۇيەسىمەن جابدىقتالعان. عيماراتتىڭ ىشىندە كومپيۋتەرلىك توموگراف ورناتىلعان, ال ەكىنشى اپپارات مۇندا جاقىن ارادا جەتكىزىلەدى. گوسپيتال كوروناۆيرۋس ينفەكتسياسىن جۇقتىرعان ناۋقاستاردى عانا ەمەس, سونىمەن بىرگە ءتۇرلى برونحو-وكپە اۋرۋلارىنان زارداپ شەگەتىندەردى دە قابىلدايتىن بولادى.
مەديتسينالىق مەكەمەدە ءبىر اۋىسىمدا 20 دارىگەر, 30 مەدبيكە مەن سانيتار جۇمىس ىستەيدى. تاياۋدا مەديتسينالىق قىزمەتكەرلەرگە كومەككە اسكەري دارىگەرلەر دە كەلدى. ولار جۇقپالى اۋرۋلار بولىمىنە جەتەكشىلىك ەتەتىن بولادى.
جاڭا پۋلموپروۆيزورلىق گوسپيتالدىڭ باسشىسى ءلاززات شولانوۆا جۇقپالى اۋرۋلار بولىمشەسى اشىلعان سوڭ, كۆي-مەن اۋىراتىن ناۋقاستاردى ينفەكتسيالىق گوسپيتالدارعا جىبەرۋدىڭ قاجەتى بولمايتىنىن اتاپ ءوتتى.
"پاتسيەنت كەلىپ تۇسكەندە, ءبىز قاننىڭ وتتەگىمەن قانىعۋ دەڭگەيىن – ساتۋراتسياسىن تەكسەرەمىز. ەگەر ول جاقسى بولسا, كومپيۋتەرلىك توموگرافيا جاسايمىز. قاجەت بولعان جاعدايدا ناۋقاستى پۋلموپروۆويزورلىق بولىمشەگە ورنالاستىرامىز. وسى كەزەڭدە ءبىز كوروناۆيرۋس ينفەكتسياسىن انىقتاۋ ءۇشىن پتر-تەست الامىز. ەگەر, ول راستاعان ناتيجە بەرسە, ناۋقاستى جۇقپالى اۋرۋلار بولىمىنە اۋىستىرامىز", – دەپ ءتۇسىندىردى ول.
مەديتسينالىق مەكەمەنىڭ تىنىس-تىرشىلىگىمەن تانىسۋعا ارنايى كەلگەن وبلىس اكىمى جەڭىس قاسىمبەك اتقارىلعان جۇمىستارعا وڭ باعا بەردى.