قاراعاندى وبلىسىنىڭ اكىمى جەڭىس قاسىمبەك وڭىردەگى قالالار مەن اۋدانداردىڭ اكىمدەرىنە الەۋمەتتىك جەلىلەردە تۇرعىندارمەن كەرى بايلانىس ورناتۋ جۇمىسىنىڭ تيىمدىلىگىن ارتتىرۋ جونىندە تاپسىرما بەردى, – دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
ياعني, بۇدان بىلاي اكىمدەر الەۋمەتتىك جەلىلەردەگى بەلسەندىلىكتەرىن ارتتىرىپ, Facebook پەن Instagram-دا ءوز اككاۋنتتارىن جۇرگىزۋمەن قاتار, "اكىم ساعاتى" تىكەلەي ەفيرىن وتكىزۋگە مىندەتتى بولدى.
وبلىس اكىمى جەڭىس قاسىمبەك پاندەميانىڭ اكىمدىكتەردىڭ جۇمىسىنا تىكەلەي اسەرىن تيگىزىپ, وزگەرىستەر ەنگىزىپ جاتقانىن اتاپ ءوتتى. ماسەلەن, قازىرگى تاڭدا جەكە قابىلداۋلار وتكىزىلمەيدى, حالىقپەن جيىندار مەن كەزدەسۋلەر ۇيىمداستىرۋعا بولمايدى. ياعني, مۇنداي جاعدايدا ازاماتتاردىڭ ماسەلەلەرىن شەشۋ جانە وتىنىشتەرىنە قۇلاق اسۋ ۇشىن قاراپايىم ءارى ءتيىمدى مەحانيزم ۇسىنۋدىڭ قاجەتتىلىگى تۋىندادى.
"وبلىس تۇرعىندارىنىڭ وڭىردەگى بارلىق دەڭگەيدەگى اكىمدەرمەن تىكەلەي ءوزارا ارەكەتتەستىك ورناتۋ مۇمكىندىگى بولۋى ءتيىس. "اكىم ساعاتى" اۋىل جانە قالا تۇرعىندارىنىڭ ناقتى ماسەلەلەرىن شەشۋ بويىنشا ءتيىمدى الاڭقايعا اينالادى دەگەن سەنىمدەمىن", – دەدى اپپارات كەڭەسىندە جەڭىس قاسىمبەك.
مۇنداي ەفيرلەر سەيسەنبى كۇنى ساعات 09.00-دەن 10.00-گە دەيىن جانە جۇما كۇنى ساعات 15.00-دەن 16.00-گە دەيىن اپتاسىنا ەكى رەت وتكىزىلەتىن بولدى. مىسالى, نۇرا اۋدانىنىڭ اكىمى سەيسەنبى جانە جۇما كۇندەرى ساعات 11.00-دەن 12.00-گە دەيىن حالىقپەن ينتەرنەت-كەزدەسۋلەر وتكىزسە, ۇلىتاۋ اۋدانىڭ باسشىسى دا سول كۇندەرى 12:00-دەن 13:00-گە دەيىن ونلاين-كەزدەسۋ ۇيىمداستىرادى.
قالا جانە اۋدان اكىمدەرى تۇرعىندار تاراپىنان قويىلاتىن سۇراقتارعا ونلاين رەجىمىندە جاۋاپ بەرىپ, ولاردىڭ ءوتىنىش-تىلەكتەرىن قابىلدايتىن بولادى.