دۇنيەجۇزىلىك اللەرگولوگيالىق ۇيىمى (WAO) جىل سايىن ءداستۇرلى تۇردە 8 شىلدەدە اتاپ وتىلەتىن دۇنيەجۇزىلىك اللەرگيا كۇنى اياسىندا ءتۇرلى وزەكتى تاقىرىپتاردى ۇسىنادى. بيىلعى اتاۋلى كۇن "اللەرگيامەن اۋىراتىندارعا قامقورلىق جاساۋ COVID-19 كەزىندە دە توقتاتىلمايدى" ۇرانىمەن وتكىزىلەدى, دەپ حابارلايدى Egemen.kz.
وسى باستامانى الماتىداعى كارديولوگيا جانە ىشكى اۋرۋلار عزي رەسپۋبليكالىق اللەرگولوگيالىق ورتالىعى دا قولداپ وتىر.
قازاقستان شىلدە ايىندا كوروناۆيرۋس ينفەكتسياسى ىندەتىنىڭ قايتالانۋىن باسىنان وتكىزۋدە, بۇل كوبىنە اللەرگيالىق اۋرۋلاردىڭ باستى قوزدىرعىشى بولىپ تابىلاتىن ارام شوپتەردىڭ گۇلدەنە باستاۋىمەن سايكەس كەلىپ وتىر.
اللەرگيالىق رينيت, برونح دەمىكپەسى, ەسەكجەم – جاز مەزگىلىندەگى توزاڭدىق اللەرگيانىڭ ادەتتەگى كلينيكالىق كورىنىسى. اللەرگيا سيمپتومدارىنىڭ كوبى جرۆي نەمەسە پنەۆمونياعا ۇقساس. اللەرگيامەن اۋىراتىندارعا دارىلىك زاتتاردى قابىلداۋ كەزىندە قوسىمشا قاۋىپتەر بار, ال دەمىكپەسى بارلاردىڭ كۆي كەزىندە دەرتى تەز اسقىنادى. وسى جانە باسقا تاقىرىپتار بويىنشا رەسپۋبليكالىق اللەرگولوگيا ورتالىعىنىڭ اللەرگولوگ دارىگەرلەرى پاتسيەنتتەرگە قاشىقتىقتان نەمەسە كونسۋلتاتسيا بەرۋ كەزىندە جەكە تۇسىنىك بەرە الادى.
ورتالىقتىڭ باسشىسى, مەديتسينا عىلىمىنىڭ دوكتورى, پروفەسسور تاير نۇرپەيىسوۆتىڭ ايتۋىنشا, رەسپۋبليكالىق اللەرگولوگيالىق ورتالىق بيىلعى بارلىق قيىندىقتارعا قاراماستان, ەلىمىزدىڭ بارلىق وڭىرلەرىنىڭ حالقىنا كونسۋلتاتسيالىق-دياگنوستيكالىق قىزمەت كورسەتۋدە ءوز جۇمىسىن توقتاتقان جوق.
- ءبىز پاتسيەنتتەردىڭ قاۋىپسىزدىگى ءۇشىن بارلىق قاجەتتى تەحنولوگيالاردى مەڭگەردىك جانە ونى تاجىريبەمىزگە ەنگىزدىك. ەرەسەكتەرگە دە, بالالارعا دا كونسۋلتاتسيانى مىندەتتى الەۋمەتتىك مەديتسينالىق ساقتاندىرۋ شەڭبەرىندە تەگىن الۋعا بولادى, – دەدى تاير تەمىرلان ۇلى.
ال ەندى ءوزىمىزدىڭ تاجىريبەمىزدەن اللەرگياعا شالدىققاندار ءۇشىن مىناداي بىرنەشە قاجەتتى كەڭەس بەرەمىز:
– انتيبيوتيكتەر ءالى كۇنگە دەيىن اللەرگيالىق رەاكتسيالاردى تۋدىرۋشى رەتىندە باسقا دارىلەردىڭ اراسىندا ءبىرىنشى كەزەكتە تۇر! پروفيلاكتيكالىق ماقساتتا انتيبيوتيكتەردى قابىلداماڭىزدار! دارىگە دەگەن اللەرگيالىق رەاكتسيا ءسىزدىڭ ءومىرىڭىز بەن دەنساۋلىعىڭىزعا قاۋىپ توندىرەدى.
– اللەرگيالىق اۋرۋلاردى ەمدەۋ كۆي قاۋپىنەن توقتاتىلماۋى ءتيىس. اللەرگولوگ دارىگەردىڭ تاعايىندامالارىن ورىنداڭىز, نەگىزگى پرەپاراتتاردى قابىلداڭىز!
– اللەرگيالىق اۋرۋلاردىڭ قاتتى اسقىنۋىن كۇتپەي-اق, اللەرگولوگتان الدىن الا كەڭەس الىڭىز.
– ەگەر ءسىز اللەرگياعا شالدىعىپ, باسقا پرەپاراتتاردى شۇعىل قابىلداۋعا مۇقتاج بولساڭىز, بۇل رەتتە ولاردىڭ قاۋىپسىزدىگىنە سەنىمدى بولماساڭىز – ولاردى قابىلداۋدى زاماناۋي انتيگيستاميندى زاتتار (مىسالى, لەۆوتسەتيريزين) كورىنىسىندە باستاڭىز. ولار شوكتىڭ دامۋ قاۋپى مەن باسقا اللەرگيالىق اسقىنۋلاردىڭ قاۋپىن ازايتادى.
– ەگەر ءسىز اللەرگياعا شالدىقساڭىز – بيولوگيالىق بەلسەندى قوسپالار, پوليۆيتاميندەر جانە وسىمدىكتەن جاسالعان پرەپاراتتاردان باس تارتىڭىز – ولاردىڭ پايداسى بار دا شىعار, الايدا قاۋپىنىڭ بولاتىندىعى مەيلىنشە ناقتى.
– "تابيعاتتا", اۋىلشارۋاشىلىق جۇمىستارىندا, وسىمدىك, جاندىكتەرمەن تىعىز بايلانىستا بولۋدى شەكتەڭىز.
– ءوزىڭىزدى حلوردان جانە قوعامدىق ورىنداردا سەبىلەتىن باسقا انتيسەپتيكتەردەن قاشىقتىقتا ۇستاڭىز, ولار دەنساۋلىققا زيان كەلتىرۋى مۇمكىن, ۇيدە حيميانى پايدالانۋدى شەكتەڭىز.
– ديەتا ۇستاڭىز.
– دۇربەلەڭگە جول بەرمەڭىز, اللەرگيانى توقتاتۋعا ارنالعان زاتتار قولجەتىمدى جانە ولار ساتىلىمدا بار!
– عالامتورداعى "ساراپشىلاردىڭ" "پايدالى" كەڭەسىن تىڭداماڭىز. اقپاراتتى مامانداردان تەكسەرىڭىز.
كارديولوگيا جانە ىشكى اۋرۋلار عزي رەسپۋبليكالىق اللەرگولوگيا ورتالىعى تەلەفون, E-mail, بەلگىلى مەسسەندجەرلەر جانە الەۋمەتتىك جەلىلەر ارقىلى كومەك كورسەتۋگە دايىن.