بۇگىن قازاقستاننىڭ ەڭبەك سىڭىرگەن ءارتيسى, قازاق قۋىرشاق تەاترىنىڭ تۇڭعىش كاسىبي رەجيسسەرى, ەلوردا قۋىرشاق تەاترىنىڭ كوركەمدىك جەتەكشىسى, پروفەسسور ەشمۇراتوۆا قۇرالاي حالەكەتقىزىن 75 جاسقا تولدى, دەپ جازادى Egemen.kz
ەشمۇراتوۆا قۇرالاي حالەكەتقىزى قازاقستاننىڭ ەڭبەك سىڭىرگەن ءارتيسى, «حالىقتار دوستىعى», «قۇرمەت بەلگىسى», «ەرەن ەڭبەگى ءۇشىن», «ەڭبەك ارداگەرى» وردەندەرى مەن مەدالىنىڭ يەگەرى, قازۇوۋ-ءنىڭ پروفەسسورى, قازاق قۋىرشاق تەاترىنىڭ تۇڭعىش كاسىبي رەجيسسەرى ەشمۇراتوۆا قۇرالاي حالەكەتقىزى 1945 جىلدىڭ ء4–شى شىلدە ايىندا شىعىس قازاقستان وبلىسى كيەلى سەمەي قالاسىندا دۇنيەگە كەلگەن. 1966 جىلى كسرو حالىق ءارتيسى, پەداگوگ, قازاق دراما تەاترىنىڭ تۇڭعىش كاسىبي رەجيسسەرى, پروفەسسور اسقار توقپانوۆتىڭ شەبەرحاناسىنان ءوتىپ, الماتى قالاسىنىڭ قۇرمانعازى اتىنداعى كونسەرۆاتورياسىن ءتامامدادى. 1974 جىلى ماسكەۋ قالاسى مەملەكەتتىك ورتالىق قۋىرشاق تەاترىندا كسرو حالىق ءارتيسى, سوتسياليستىك ەڭبەك ەرى, كەڭەس قۋىرشاق ونەرىنىڭ نەگىزىن قالاۋشى س. وبرازتسوۆتىڭ قول استىندا ەكى جىلدىق جوعارعى رەجيسسەرلىك كۋرستى اياقتاپ, قازاق قۋىرشاق تەاترىنىڭ تۇڭعىش كاسىبي رەجيسسەرى اتاندى.1966-1972 جىلدارى الماتى قالاسى رەسپۋبليكالىق قۋىرشاق تەاترىنىڭ رەجيسسەرى قىزمەتىن اتقاردى.1974-1995 جىلدارى الماتى قالاسى رەسپۋبليكالىق قۋىرشاق تەاترىنىڭ باس رەجيسسەرى بولدى. 2007 جىلى استانا قالاسى اكىمدىگىنىڭ «قۋىرشاق تەاترىنىڭ» اشىلۋىنا سەبەپكەر بولىپ, ەسىمى قازاق قۋىرشاق تەاتر تاريحىنا التىن ارىپپەن جازىلدى. وسى كۇنى اتالمىش تەاتردىڭ كوركەمدىك جەتەكشىسى. 2008 جىلى استانادا اشىلعان «دجۋنگلي» انيماترونيكتىك تەاترىندا باس رەجيسسەر قىزمەتىن اتقاردى.بۇكىل سانالى عۇمىرىن تەك قۋىرشاق تەاتر ونەرى سالاسىنا ارناعان بەلدى رەجيسسەر, العىر ۇيىمداستىرۋشى, سان قىرلى سۋرەتكەر ءا.تابىلديەۆتىڭ «جارايسىڭ كىرپى», ە. ەلۋباەۆتىڭ «بالابەك», و.بودىقوۆتىڭ ء«سابيرانىڭ الەگى», س.وماروۆتىڭ «اقىماق ارىستان», و. اۋباكىروۆتىڭ «كەلىڭىزدەر! كورىڭىزدەر!», ن. گەرنەتتىڭ «الاديننىڭ سيقىرلى شامى», ك. چۋكوۆسكيدىڭ «ايبوليت», ن. ءورازاليننىڭ «اق قۇس تۋرالى اڭىز»,س. ءجۇنىسوۆتىڭ «اتامەكەن», ل. سيمونوۆانىڭ «قۇدىرەتتى ءسوز», ر. مۇقانوۆانىڭ «ماڭگىلىك بالا بەينە» سىندى 100-دەن اسا قويىلىمداردى ساحناعا شىعاردى.ق.ەشمۇراتوۆانىڭ ونەر تۋىندىلارى الدەقاشان جۇرت نازارىنا ءىلىنىپ, ماقتاۋ-ماراپاتتارعا يە بولدى. ولار تومەندەگىدەي;
1978 جىلى ق.ەشمۇراتوۆا ساحنالاعان و. بودىقوۆتىڭ 1000-شى «وراشالاق وراش» تۋىندىسى قاراقالپاق ەلىندە تويلانىپ, حالىق ءىلتيپاتىنا وراندى.
1981 جىلى ن. ءورازاليننىڭ «اق قۇس تۋرالى اڭىز», و. اۋباكىروۆتىڭ «سپورت جانە قوجا» سپەكتاكلدەرىن ۆەتنام, كامپۋچيا ەلدەرىنە كورسەتىپ, كورەرمەندەر العىسىنا بولەندى. 1994 جىلى اۆتورى ءھام رەجيسسەرى بولعان «قاڭباق شال» قويىلىمى ءۇشىن يران مەملەكەتىندە وتكەن دۇنيەجۇزىلىك قۋىرشاق تەاترلارى فەستيۆالىندە «التىن ماسكا» قۇرمەت ناگراداسىمەن ماراپاتتالدى.
2000-2015 جىلدارى ءدال وسى قويىلىممەن الماتى قالاسى رەسپۋبليكالىق قۋىرشاق تەاترى اتىنان فرانتسيا, جاپونيا, چەحوسلوۆاكيادا وتكەن حالىقارالىق تەاتر فەستيۆالدەرىنە قاتىسىپ, جەتىستىكتەرگە جەتتى. ال, ماسكەۋ قالاسىنداعى گاسترولدىك ساپاردا ن. ءورازاليننىڭ «تارقامايدى تويىمىز» تۋىندىسىن كورسەتىپ, حالىقتىڭ ىستىق ىقىلاسىنا يە بولدى. بەلگىلى رەجيسسەر شىعارماشىلىق جولىندا و.بودىقوۆ, س.وماروۆ, و.اۋباكىروۆ, ن. ورازالين, س.ءجۇنىسوۆ, ل.حاميدي, ە.راحماديەۆ, ن.تىلەنديەۆ, ش.قالداياقوۆ, ءا.بەيسەۋوۆ, ە.حاسانعاليەۆ, ۆ.بۋلگاروۆسكي سەكىلدى عاسىردا ءبىر تۋىلار اقىن, جازۋشى, كومپوزيتورلارمەن قىزمەتتەس بولدى. وسىنداي وزىق ويلى تولىمدى تۇلعا, حاس ماماندار ق. ەشمۇراتوۆانىڭ رەجيسسەرلىك قىزمەتپەن قاتار پەسا جازۋعا دا قۇشتارلىعىن ارتتىرا ءتۇستى. مىسالى, «قىز جىبەك» پوەماسى بويىنشا جازعان «ماحاببات تۋرالى اڭىز», «قاڭباق شال» تۋىندىلارىن ايتۋعا بولادى.
2015-2018 جىلدارى قۇرالاي ەشمۇراتوۆا اتىنداعى «I-ءIIشى حالىقارالىق «قۇرالاي» قۋىرشاق تەاترلار فەستيۆالى» ءوتتى قازاق قۋىرشاق تەاتر تاريحىندا تىڭ جاڭالىعىنا اينالدى. سانالى عۇمىرىن قۋىرشاق تەاترىنا ارناعان ءسارۋار كوڭىلدى, ءسابي جۇرەكتى اياۋلى جانعا زور دەنساۋلىق, قاجىماس قايرات تىلەيمىز!