ۇلى اقىننىڭ ونەگەسىن دارىپتەيتىن جاڭا ارنا

جۇمىسىن ەندى باستاعان تەلەارنا ۇلتتىق جانە الەمدىك ونەر مەن مادەنيەتتىڭ ءىنجۋ-مارجاندارىن, ءتۇرلى ۇلتتاردىڭ ادەبي جانە تاريحي جاۋھارلارىن, ءتۇرلى سپەكتاكلدەر مەن قويىلىمداردى قالىڭ بۇقاراعا ۇسىنباق.

 «بۇگىن تۇساۋى كەسىلىپ وتىرعان جاڭا تەلەارنا مادەني-اعارتۋشىلىق سالاعا ۇلەس قوسۋدى, ۇلت قازىناسىن تولتىرۋدى كوزدەيدى. جاڭا ارنانىڭ «اباي» دەپ اتالۋى تەگىن ەمەس. بىرىنشىدەن, مادەني-اعارتۋ باعىتىنداعى جالعىز تەلەارناعا ۇلت رۋحانياتىنىڭ تەمىرقازىعى ابايدىڭ اتىن بەرۋ – وتە ورىندى. ويتكەنى ۇلى اقىننىڭ ونەگەلى جولى ءالى تالاي عاسىرعا جالعاسپاق. ەكىنشىدەن, جاڭا تەلەارنا ءتول مادەنيەتىمىز بەن ءداستۇرىمىزدى ناسيحاتتاۋدى ماقسات ەتىپ وتىر. بۇل تۇرعىدا ۇلى ويشىلدىڭ «پايدا ويلاما, ار ويلا», «تالاپ قىل ارتىق بىلۋگە», «اسەمپاز بولما ارنەگە, ونەرپاز بولساڭ ارقالان» دەگەن وسيەتتەرىن ەستە ۇستاۋىمىز كەرەك. سونداي-اق ول ونەر مەن كاسىپ ۇيرەنۋدى بايلىقتىڭ كىلتىنە, ۇلتتىڭ قۋاتىنا بالاعان. ۇلى اقىن تاعى ءبىر سوزىندە «ادام بالاسىن زامان وسىرەدى» دەيدى. جاڭا تەلەارنامىزدىڭ جۇمىسى دا وسى قازىرگى ءداۋىردىڭ تالابىنا بەيىمدەلەدى.

زيالى قاۋىمنىڭ باستى بورىشى – قوعامعا, اسىرەسە جاستاردىڭ بويىنا تاربيەنى, ىزگىلىكتى, وتانسۇيگىشتىكتى دارىتۋ. جاڭا تەلەارنا وسى جولدا سىزدەرگە ۇتىمدى قۇرال, اشىق پىكىر الاڭى بولادى دەپ ويلايمىن. وسى تۇرعىدا «اباي» تەلەارناسىنىڭ اشىلۋى ۇلى كەمەڭگەردىڭ مەرەيتويى اياسىنداعى شوقتىعى بيىك شارا دەۋگە بولادى», دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ.

«Abai tv» ارناسىنىڭ اشىلۋى – قازاق قوعامى ءۇشىن ۇلكەن مەرەكە. بۇل وركەنيەتىمىز بەن مادەنيەتىمىز ءۇشىن ماڭىزدى ارنالاردىڭ ءبىرى بولادى دەپ سەنەمىن.  مادەنيەت سالاسىنداعى ازاماتتاردى تەلەارناعا ونىمدەرى مەن ونەرلەرىن ۇسىنۋعا شاقىرامىن», دەپ اتاپ ءوتتى مادەنيەت جانە سپورت ءمينيسترى اقتوتى رايىمقۇلوۆا.

جاڭا تەلەارنا مەملەكەت باس­شىسىنىڭ تاپسىرماسىمەن ىسكە قوسىلدى جانە قازاقستاندىقتاردى ۇلى اباي مۇراسى, قازاقستاننىڭ جانە بۇكىل الەمنىڭ مادەنيەتى مەن ونەرىنىڭ جەتىستىكتەرىمەن تانىستىرۋ جولىندا جۇمىس ىستەمەك. ال ول ءۇشىن «اباي جولىن بىرگە وقيىق», ء«ساراسوز» باعدارلامالارى دايىندالدى. ودان بولەك تەلەارنانىڭ باعدارلامالارى قاتارىندا قازاق قالامگەرلەرىنىڭ درامالىق شىعارمالارىن تالداۋعا ارنالعان «ۇركەر», جاستاردىڭ «جىر مايدانى», قازاق مۋزىكاسىنىڭ مادە­نيەتى مەن تاريحى جايىنداعى «مۋزى­كا ۆەليكوي ستەپي», سپەكتاكل­دەر مەن بالەت قويىلىمدارىنا ارنال­عان «پرەمەرى» باعدارلاماسى كورەر­مەنگە جول تارتپاق.

قازاقستاننىڭ ەڭبەك سىڭىرگەن قاي­راتكەرى سۇلتان ورازالى جاڭا ارناعا «وسى ءبىر كەزدىڭ وزىندە قيىنشىلىق­قا قاراماستان جاڭا تەلەارنانىڭ اشىلۋى, سوعان بارلىق مۇمكىندىكتى جاساۋ – يگى ءىس. ابايدىڭ اتى – وتە ارداقتى. وسى ارنادا قىزمەت ەتەتىن قىز-جىگىتتەردىڭ موينىنا اۋىر جۇك ارتىلادى. اباي اتىن يەلەنگەننەن كەيىن ابايدىڭ ادىلدىگىن, ويشىلدىعىن, سوزگە دەگەن ەرەكشە ىقىلاسىن, عاجايىپ جىرلارى مەن اندەرىندەگى نازىكتىك پەن سۇلۋلىقتى ساقتاپ, سول بيىكتەن كورىنۋ كەرەك», دەگەن ىزگى تىلەگىن ءبىلدىردى.

تەلەارنا بۇگىننەن باستاپ قازاق جانە ورىس تىلدەرىندە تاۋلىگىنە 17 ساعات (07:00-دەن 00:00-گە دەيىن) حابار تاراتاتىن بولادى. ارناعا «Otau TV» ۇلتتىق سپۋتنيكتىك وپەراتورى, «Alma TV», «ID TV» كابەلدىك جەلىلەرى ارقىلى قوسىلۋ مۇمكىندىگى بار. سونىمەن قاتار  www.abaitv.kz رەسمي سايتىنان ونلاين رەجىمدە تاماشالاي الاسىز.