اسقار مامين جىلىتۋ ماۋسىمىنا دايىندىقتى قامتاماسىز ەتۋدى تاپسىردى

اتقارىلىپ جاتقان جۇمىستار تۋرالى ەنەرگەتيكا ءمينيسترى نۇرلان نوعاەۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, "سامۇرىق-قازىنا" ۇاق" اق باسقارما توراعاسى احمەتجان ەسىموۆ باياندادى.

2019-2020 جج. جىلىتۋ كەزەڭى شتاتتىق رەجيمدە ءوتتى. 24 تەحنولوگيالىق بۇزۋشىلىق تىركەلدى, بۇل وتكەن ماۋسىمنان 33 جاعدايعا از. بارلىق تەحنولوگيالىق بۇزۋشىلىق نورماتيۆتىك مەرزىمدە جويىلدى. جىلۋ جەلىلەرىنىڭ تەمپەراتۋرالىق كەستەسىن ساقتاماعان 48 جاعداي تىركەلدى, بۇل وتكەن جىلمەن سالىستىرعاندا 20%-عا از.

الداعى كۇزگى-قىسقى ماۋسىمعا دايىندىق اياسىندا ەلىمىزدە 8 ەنەرگەتيكالىق بلوكتى, 59 قازاندىق پەن 44 تۋربينانى جوندەۋ, سونداي-اق كوممۋنالدىق-تۇرمىستىق سەكتور مەن حالىق ءۇشىن نارىقتا كومىردىڭ بولۋىن قامتاماسىز ەتۋ كوزدەلگەن.

ۇكىمەت باسشىسى وڭىرلەردىڭ اكىمدىكتەرىنە الداعى جىلىتۋ ماۋسىمىنا ساپالى دايىندىق شارالارىن كۇشەيتۋدى, بارلىق جوسپارلانعان جوندەۋ جۇمىستارىن ۋاقىتىلى اياقتاۋدى جانە تۇرعىن ءۇي-كوممۋنالدىق شارۋاشىلىق, دەنساۋلىق ساقتاۋ جانە الەۋمەتتىك سالانىڭ بارلىق نىسانىنىڭ جىلىتۋ ماۋسىمىنا دايىندىعىن قامتاماسىز ەتۋدى تاپسىردى

"تۇرعىنداردى كومىردىڭ قاجەتتى كولەمىمەن, جەو مەن قازاندىقتاردى وتىنمەن الدىن الا قامتاماسىز ەتۋ جۇمىستارىن ۇيىمداستىرۋ كەرەك. كومىر باعاسىن ەرەكشە باقىلاۋعا الىپ, وتىننىڭ, اسىرەسە, تۇرعىندار ءۇشىن كومىر باعاسىنىڭ نەگىزسىز وسۋىنە جول بەرمەۋ شارالارىن قابىلداۋ كەرەك", — دەدى ا. مامين.

اكىمدىكتەرگە بيىلعى 1 ناۋرىزعا دەيىن جينالعان كوممۋنالدىق قىزمەتتەر ءۇشىن تۇتىنۋشىلاردىڭ دەبيتورلىق بەرەشەگىن تومەندەتۋ بويىنشا شارالار قابىلداۋ, دەربەس جىلىتۋ جۇيەلەرىن تۇرعىن ءۇي جانە قوعامدىق ءۇي-جايلاردان تىس جەرلەرگە شىعارۋدى قامتاماسىز ەتۋ, يەسىز ەلەكتر جەلىلەرىن انىقتاۋ جانە بالانسقا قابىلداۋدى جالعاستىرۋ, سونداي-اق كوممۋنالدىق جەلىلەردى ەنەرگيا بەرۋشى ۇيىمداردىڭ تەڭگەرىمىنە بەرۋدى قولعا الۋ تاپسىرىلدى.

ەنەرگەتيكا, يندۋستريا جانە ينفراقۇرىلىمدىق دامۋ مينيسترلىكتەرىنە الداعى جىلىتۋ ماۋسىمىنا دايىندىق بارىسىنا پارمەندى باقىلاۋ مەن مونيتورينگ جۇرگىزۋدى قامتاماسىز ەتۋ تاپسىرىلدى.