2019 جىلدىڭ 7 قىركۇيەگى ەدى. ورال قالاسىنىڭ قاربالاسى جوق تىنىش مۇيىستەرىنىڭ ءبىرى – تسيولكوۆسكي كوشەسىنىڭ №53-ۇيىندە بولعان وقيعا تالايدىڭ جانىن تۇرشىكتىردى. قاراپايىم ۇيدە قوڭىر تىرلىك كەشىپ جاتقان 85 جاستاعى كەيۋانا ماترەنا مەن مۇگەدەك ۇلى, سال اۋرۋىنا شالدىققان كونستانتين كۋلاكوۆتى الدەكىمدەر ايۋاندىقپەن ءولتىرىپ كەتكەن.
سوت مەديتسينالىق ساراپتاما مارقۇمداردىڭ دەنەسى مەن باسىنان سوققى ىزدەرىن كورسەتتى. جابىق باس-مي جاراقاتىنا قوسا, ءولىم سەبەبى – قىلقىندىرىپ تۇنشىقتىرۋدان كەلگەنى انىقتالدى. ەشكىمگە زيانى جوق, ءوز كۇنىن ارەڭ كورىپ وتىرعان قارىپتەردىڭ اجالى كىمنەن بولدى؟
قىلمىسكەرلەردىڭ ءۇي ىشىنەن ءىلىپ الار دۇنيە ىزدەگەنى, اقشا مەن التىن بۇيىمدار جوعالعانى – ولاردىڭ وڭاي ولجا ىزدەگەن قاراقشىلار ەكەندىگىن بايقاتقان. بىراق ولمەلى كەمپىر مەن ونىڭ مۇگەدەك بالاسىندا قازىنا قايدان بولسىن؟! جوعالعان زاتتىڭ كولەمى 130 مىڭ تەڭگەدەي اقشا, 75 مىڭ تەڭگەلىك التىن بۇيىمى عانا ەكەن. بار-جوعى 200 مىڭ تەڭگە ءۇشىن ەكى ادامدى ءولتىرىپ كەتكەن قانىپەزەرلەر تۋرالى نە ايتۋعا بولادى؟
ارينە تەرگەۋشىلەر بىردەن ىسكە كىرىستى. جەدەل تەرگەۋ توبىن باتىس قازاقستان وبلىستىق پوليتسيا دەپارتامەنتى تەرگەۋ باسقارماسىنىڭ اعا تەرگەۋشىسى, پوليتسيا اعا لەيتەنانتى دارمەن ءىزباساروۆ باسقاردى. كورشىلەر, كۋاگەرلەر تەرگەلدى, ىقتيمال قىلمىسكەرلەر ءتىزىمى جاسالدى. جەرگىلىكتى پوليتسيا قىزمەتى ورال قالالىق پوليتسيا باسقارماسى تۇگەل جۇمىلدى. جول پوليتسياسى, تۇنگى «ۇكى» قىزمەتى تارتىلدى. ەكى ادامنىڭ اجالىنا جەتكەن قىلمىستى اشۋ بارىسىندا پوليتسيا 2209 پاتەر, 57 جەكە ءۇي جانە 144 ساياجاي ۇيشىگىن سۇزگىدەن وتكىزدى. بۇرىن سوتتالعان 485 ادام, پسيحياترلىق ەسەپتە تۇرعان 180 ادام تەكسەرىلدى.
– ءاۋ باستا ءبىزدىڭ قولىمىزدا ناقتى ىلىك, دالەل بولمادى. وقيعا بولعان اۋماقتاعى بارلىق بەينەكامەرالار جازباسىن تەكسەردىك. قىلمىسكەرلەر اككى ەكەن. ەش ءىز قالدىرماعان, – دەيدى دارمەن.
وسىلايشا تەرگەۋ توقىراۋعا ۇشىراعانداي ەدى. قارالى كۇننەن 4 اي وتكەندە, 23 قاڭتاردا قىلمىستىق ءىس ۋاقىتشا توقتاتىلدى. بىراق كانىگى تەرگەۋشى بۇل ءىستىڭ دە اشىلاتىنىنا, كىسى ولتىرۋشىلەر تابىلاتىنىنا كۇمانسىز سەنگەن ەدى. ءبارى دە اياقاستىنان بولدى.
– كۇتپەگەن جەردەن رۋ-170/1 مەكەمەسىنىڭ قىزمەتكەرى, پوليتسيا اعا لەيتەنانتى قۋاندىق وتەشقاليەۆتان قۇپيا اقپارات ءتۇستى. ياعني سوتتالعاندار اراسىندا ادام ءولتىرۋ قىلمىسىنا قاتىستى تىڭ مالىمەت بەلگىلى بولعان. بۇل اقپاراتتى العان بويدا ۋاقىتشا توقتاتقان قىلمىستىق ءىستى قايتا قولعا الدىق. كۇدىككە الىنعان ءۇش ازامات تۋرالى بارلىق مالىمەت جيناقتالىپ, قىلمىس بولعان ۋاقىتتاعى ولاردىڭ تەلەفون قوڭىراۋلارىنا تالداۋ جاسالدى. جۇرگەن جەرلەرى, بارعان نۇكتەلەرى انىقتالدى. بەينەكامەرا جازبالارىن قايتادان قاراپ وتتىك. وسىلايشا اتىشۋلى قىلمىستىڭ انىق سۋرەتى پايدا بولدى, – دەيدى دارمەن ءىزباساروۆ.
وقيعا بىلاي بولعان ەكەن. قىلمىسكەرلەر ءۇش ادام, ۇشەۋى دە بۇرىن قاراقشىلىق شابۋىل جاساعانى, ۇرلىق قىلعانى ءۇشىن بىرنەشە رەت سوتتالعان. ونىڭ ۇستىنە ۇشەۋى دە ەسىرتكىگە تاۋەلدى. ءسويتىپ قىركۇيەكتىڭ سول ءبىر كۇنى كەزەكتى قۇرباندىعىنا بەت العان. توپ باسشىسى ز. بالا كۇنىنەن وسى اۋداندا وسكەن, ماترەنا كەمپىر مەن ونىڭ ۇلىنىڭ وڭاشا تۇراتىنىن, قورعانسىز ەكەنىن, ءتىپتى زەينەتاقى الاتىن كۇنىنە دەيىن بىلگەن. وسىلايشا وڭاي ولجا ىزدەگەن ۇشەۋ شىمىرىكپەستەن قىلمىس جاساپ, قوس ادامنىڭ قانىن موينىنا جۇكتەگەن. قىلمىستىق توپتىڭ ەكى مۇشەسى كوپ كەشىكپەي وزگە ءبىر قىلمىسى ءۇشىن ۇستالىپ, قازان-قاراشا ايلارىندا تۇرمەدەن ءبىر-اق شىققان.
– وقيعانىڭ ءدال وسى ءۇش ادامنىڭ قولىمەن جاسالعانىنا انىق كوزىمىز جەتكەن سوڭ ولاردىڭ بىرىمەن جەكە كەزدەسىپ, وڭاشا تەرگەدىم. ول قىلمىس جاساعانىن تولىق مويىنداپ, ءتىپتى «جاقىندا پوليتسياعا ءوز ەركىمەن بارعىسى كەلگەنىن, ار-ۇياتى مازا بەرمەگەنىن» ايتتى. ءسويتىپ تەرگەۋگە كومەكتەسۋگە ۋادە بەردى. وسىلايشا وقيعانىڭ بارلىق قىر-سىرى اشىلدى, – دەيدى داۋرەن قۋات ۇلى.
بۇل قىلمىستىڭ تەرگەۋى ەندى قورىتىندىلانىپ, جاقىن كۇندەرى سوتقا جولدانعالى جاتىر.
– كۋلاكوۆتاردىڭ ولىمىنە قاتىستى قىلمىستىق ءىستى تەرگەۋ توبى وتە جەمىستى جۇمىس ىستەدى. تەرگەۋ بارىسىندا قوسىمشا 63 قىلمىس اشىلدى. ماسەلەن, ۆەلوسيپەد ۇرلىعىنىڭ 40 فاكتىسى, 3 پاتەر ۇرلىعى ءىزى سۋىماي اشىلدى. ساياجايلار مەن گاراج كووپەراتيۆتەرىندە جاسالعان 8 ۇرلىقتى اشكەرەلەدىك. وزگەنىڭ مۇلكىن ۇرلاعان 8 وقيعانىڭ جولى كەسىلدى. ءبىر توناۋ وقيعاسى اشىلدى. بۇعان قوسا, پوليتسيانىڭ ىزدەۋىندە جۇرگەن 11 ادام تابىلىپ, تۇتقىندالدى, – دەيدى باتىس قازاقستان وبلىستىق پوليتسيا دەپارتامەنتىنىڭ باستىعى, پوليتسيا گەنەرالى ماقسۇتحان ءابىلازىموۆ.
كۋلاكوۆتاردىڭ ولىمىنە قاتىستى ءىستى تەرگەۋ كەزىندە ورال قالالىق پوليتسيا باسقارماسى كريمينالدىق پوليتسيا ءبولىمىنىڭ اعا جەدەل ۋاكىلى, پوليتسيا كاپيتانى تولەگەن تۇرىمبەتوۆتىڭ دە ەڭبەگى زور بولىپتى. ال وڭىردەگى اسا اۋىر قىلمىستاردىڭ تالايىن ءىز سۋىتپاي اشىپ, «قازاقستان رەسپۋبليكاسى ىشكى ىستەر مينيسترلىگىنىڭ ۇزدىگى» بەلگىسىنە يە بولعان دارمەن ءىزباساروۆتىڭ ءجونى ءبىر بولەك. ءاردايىم قاۋىرت قىزمەتىمەن جۇرەتىن تەرگەۋشى كاسىبي مەرەكەسى قارساڭىندا ءوزى اشقان اۋىر قىلمىستاردىڭ ءبىرى تۋرالى ايتىپ بەرۋگە ۋاقىتتى ارەڭ تاپتى.
باتىس قازاقستان وبلىسى