كوپتىڭ تىلەگى مەن پەيىلى كەڭ. ونى تاسقىننان زارداپ شەككەن قىزىلاعاشتىقتارعا كورسەتىلىپ جاتقان كومەك اۋقىمىنان كورەمىز. بۇعان دەيىن مۇندا كەلىپ تۇسكەن قارجىلاي, ماتەريالدىق قۇندىلىقتار مەن كومەك مولشەرى 3,0 ملرد. تەڭگەگە جەتىپتى. ونىڭ ىشىندە زارداپ شەككەندەرگە جالپى قۇنى 64,2 ملن. تەڭگە ازىق-ت ۇلىك پەن باسقا دا تۇرمىستىق قاجەتتىلىكتەر تاراتىلىپ بەرىلىپتى.
كورگەن ادامنىڭ كوڭىلىن قۇلازىتقان اۋىلدىڭ تىنىس-تىرشىلىگى قازىرگى كەزدە قالىپتى ارناعا ءتۇسىپ, بەل شەشىپ ەڭبەك ەتكەن قۇرىلىسشىلار مەن ولارعا كومەك قولدارىن ۇسىنعان جەرگىلىكتى تۇرعىندار ءبۇتىن ءبىر ەلدى مەكەندەگى جۇمىستىڭ بەلگىلەنگەن مەرزىمدە اياقتالۋىنا جۇمىلعان. ءبىز كەلگەندە ءبىر كوشەدەگى بۇعان دەيىن قۇرىلىسى باستالعان ۇيلەردىڭ شاتىرلارى جابىلسا, 33 ءۇيدىڭ قابىرعاسى قالانىپتى. ال, ەندى بىرەۋلەرى بىتۋگە جاقىن. كوشەلەرگە ەلەكتر جارىعى تارتىلىپ, جۇمىس جۇيەلى جالعاسقانىنا كوز جەتتى.
قىزىلاعاشتاعى كۇن-ءتۇن دەمەي جۇمىس ىستەگەن قۇرىلىسشىلارعا قوسىمشا جۇمىس قولى ارتىق بولمايتىندىقتان جاستار ۇيىمدارى دا ءوز ۇلەستەرىن قوسۋدى پارىز ساناپ, قۇرىلىس بريگادالارىن قۇرىپ, كوگالداندىرۋ, اباتتاندىرۋ, تازالىق جۇمىستارىمەن اينالىسۋعا دەن قويسا, ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ 300-گە جۋىق بىلىمگەرلەرى سەنبىلىك وتكىزدى.
جاستارمەن بىرگە قىزىلاعاش اۋىلىن قالپىنا كەلتىرۋدە 5000-نان استام ادام جۇمىس ىستەۋدە. مۇنداعى جۇمىس اۋقىمدى بولعاندىقتان تۇرعىنداردىڭ قولۇشىن بەرگەندەرگە العىستان باسقا ايتارى جوق. وتكەن سەنبىدە جۇزدەن اسا جاستار كۇنى بويى تازالىق جۇمىستارىن جۇرگىزسە, سەنبى سايىن بۇل باستاما جالعاساتىن بولدى.
تاسقىن كەزىندە تۇرعىنداردىڭ دەنىنىڭ قۇجاتتارى ۇيدە قالىپ, سۋ شايعاندىقتان ونى ورنىنا كەلتىرۋ جەدەل قولعا الىنعان ەدى. قازىرگى كەزدە 456 ادامنىڭ جەكە باسىن انىقتايتىن تولقۇجات راسىمدەلىپ, قولدارىنا بەرىلىپتى.
وزدەرىنىڭ حالىققا دەگەن ىزگى نيەتتەرىن ءبىلدىرىپ, قازاقستان حالقى اسسامبلەياسىنىڭ وبلىستىق وكىلدەرى دە جاس بوسانعان قىزىلاعاشتىق اقشايىم ماناربەك پەن بەيبىتگۇل كوككوزوۆانىڭ حال-جاعدايىن ءبىلىپ, ازىق-ت ۇلىك, كيىم-كەشەك, تۇرمىستىق جانە توسەك جابدىقتارىن, مەكتەپ جاسىنداعى بالالارىنا قاجەتتى وقۋ قۇرالدارىن اپارعان. باسقا دا كوپ بالالى وتباسىلارىنا مۇنداي كومەكتى وڭىردەگى وزگە دە مەكەمە, ۇيىم جانە جەكە كاسىپكەرلەر كورسەتىپ, قيىندىقتى جەڭىلدەتۋگە جۇمىلعان.
كۇمىسجان بايجان.
الماتى وبلىسى.
ۋنيۆەرسيتەت قالىس قالعان جوق
شاكارىم اتىنداعى سەمەي مەملەكەتتىك ۋنيۆەرسيتەتى الماتى وبلىسى قىزىلاعاش اۋدانىندا زارداپ شەككەن جۇرتشىلىققا جاردەم كورسەتۋدە. ۋنيۆەرسيتەت وقىتۋشىلارى مەن قىزمەتكەرلەرى قارجىلاي, ماتەريالدىق (جىلى كيىم, قاجەتتى زاتتارمەن) كومەكتەرىن كورسەتىپ جاتىر. ۋنيۆەرسيتەت باسشىلىعى گۋمانيتارلىق فاكۋلتەتىنىڭ ەكىنشى كۋرس ستۋدەنتى جىبەك يبرايموۆاعا ماتەريالدىق كومەك كورسەتىپ, 2009-2010 وقۋ جىلىنداعى وقۋ اقىسىن ۋنيۆەرسيتەت قاراجاتىنان تولەيتىن بولدى. ج.يبرايموۆا: “مەنىڭ وتباسىم سۋ تاسقىنىنان قاتتى زارداپ شەكتى. قىزىلاعاشتا تۇرىپ جاتقان وتباسىم بۇگىندە باسپاناسىز قالدى. ۋنيۆەرسيتەت ۇجىمىنا, رەكتور ە.سىدىقوۆقا العىسىم شەكسىز. قيىن كەزدە قولداۋ كورسەتىپ, ءجاردەم بەرگەندەرى مەن ءۇشىن ۇلكەن قاجەتتىلىك بولدى” دەپ ءوز ويىمەن ءبولىستى. سونىمەن قاتار ۋنيۆەرسيتەت قىزىلاعاشتىقتارعا قارجىلاي كومەك كورسەتۋ جونىندە ۇندەۋ قابىلدادى.
اسەم جۇماعاليقىزى, شاكارىم اتىنداعى سمۋ-ءدىڭ قىزمەتكەرى.